ރައްޔިތުންގެ މަޖިލީހުގެ ރައީސް އަދި މައްޗަންގޯޅި މެދު ދާއިރާގެ މެމްބަރު ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ އެޖެންޑާ ނުކޮށް މާދަމާގެ ޖަލްސާއަށް އަންނަ އަހަރަށް ލަފާކުރާ ދައުލަތުގެ ބަޖެޓު ހުށަހެޅުން ތާވަލުކޮށްފި އެވެ.
މަޖިލީހުގެ އިދާރާއިން އާންމުކޮށްފައިވާ އެޖެންޑާގައިވާ ގޮތުން މާދަމާގެ ޖަލްސާގައި އޮތީ ދެ އައިޓަމެކެވެ. އެއީ, މިއަހަރުގެ ސަޕްލިމެންޓަރީ ބަޖެޓާއި އަންނަ އަހަރަށް ލަފާކުރާ ދައުލަތުގެ ބަޖެޓު ހުށަހެޅުމެވެ.
ނަޝީދު މަގާމުން ވަކި ކުރުމަށް ހުށަހަޅާފައިވާ ގަރާރު އިއްވުމަށް މިއަދު ވެސް އެޖެންޑާ ކުރި އެވެ. އަދި, ޝެޑިއުލް ކުރި ޖަލްސާއަށް ނައިބު ރައީސް އީވާ އަބްދުﷲ ވަޑައިނުގަތުމުން މިއަދު ވެސް ޖަލްސާ ކެންސަލްކުރީ އެވެ.
މާދަމާގެ އެޖެންޑާގައި އެ މައްސަލަ ނުހިމެނި ނަމަވެސް ބުދަ ދުވަހުގެ ޖަލްސާއަށް އެޖެންޑާކޮށްފައި ވަނީ ހަމައެކަނި އެ ގަރާރެވެ.
އެ ގަރާރު އިއްވުމަށް އިއްޔެ ޝެޑިއުލް ކުރި ޖަލްސާ އަށް ވެސް އީވާ ވަޑައިނުގަތުމުން ވަނީ ކެންސަލްކޮށްފަ އެވެ. އެފަދަ ގަރާރެއް އިއްވާ ޖަލްސާގެ ރިޔާސަތު ބަލަހައްޓަން ޖެހޭނީ މަޖިލީހުގެ ނައިބު ރައީސް ކަމަށް ގަވާއިދުގައި ބުނެފައި އޮތުމުން މަޖިލީހުގެ އިދާރާއިން ގަބޫލު ކުރަނީ އީވާ ނެތި ޖަލްސާ ކުރިއަށް ނުގެންދެނެވޭނެ ކަމަށެވެ.
ނަމަވެސް، ވެރިކަން ހިންގާ އެމްޑީޕީން ގަބޫލު ކުރަނީ މަޖިލީހުގެ ރައީސް ރިޔާސަތު ބަލަހައްޓަން އުޒުރުވެރިވެއްޖެ ހާލަތެއްގައި އެ ޒިންމާ އަދާ ކުރާނެ ފަސް މެމްބަރަކު ކަނޑައަޅަން ގަވާއިދުގައި ބުނެފައި އޮތް މާއްދާގެ ދަށުން އެ ޖަލްސާ ހިންގޭނެ ކަމަށެވެ.
އެގޮތަށް ޖަލްސާ ކުރިއަށް ގެންދިޔުމަށް އެމްޑީޕީން އިއްޔެ މަޖިލީހުގެ އިދާރާއަށް ހުށަހެޅި އެވެ. ނަމަވެސް އަމީންއާންމު ފާތިމަތު ނިއުޝާ އެކަމަށް އެއްބަސްވެވަޑައިނުގަތުމުން ޖަލްސާ ބޭއްވޭ ގޮތެއްނުވި އެވެ.
އެހެންކަމުން، ނަޝީދު ވަކި ކުރުމަށް ހުށަހަޅާފައި އޮތް ގަރާރު އިއްވުމަށް ބާއްވަންޖެހޭ ޖަލްސާ ކުރިއަށްގެންދެވޭނެ ގޮތެއް ހޯދުމަށް އެމްޑީޕީން ވަނީ އިއްޔެ ސުޕްރީމް ކޯޓަށް ދުސްތޫރީ މައްސަލައެއް ހުށަހަޅައިފަ އެވެ. އެ މައްސަލަ މިހާރު ވަނީ އެ ކޯޓަށް ބަލައިގަނެފަ އެވެ.
