އިޒްރޭލުން ފަލަސްތީނުގައި ހިންގަމުންދާ ގަތުލްއާއްމުގެ ތެރެއިން މުވާސަލާތީ ގުޅުންތައް ކަނޑާލުމަށް އިޒްރޭލުން ކުރިމަތިކުރި ފިއްތުންތަކުން އަރައިގަތުމަށް ފަލަސްތީނުގެ ނޫސްވެރިން އީ-ސިމް ބޭނުންކުރަން ފަށައިފި އެވެ.
އެތައް ދުވަހެއްގެ އިންޒާރުތަކަށްފަހު އިޒްރޭލުން އުތުރު ގާޒާއަށް އެއްގަމުން އަރައިގަތުމާއެކު ހޮނިހިރު ދުވަހުގެ ރެއިން ފެށިގެން އިއްޔެގެ ވަގުތުތަކާ ހަމައަށް ގާޒާއިން އެކީހެން މުވާސަލާތީ ވަސީލަތްތައް ކަނޑާލި އެވެ. އިންޓަނެޓުގެ ހިދުމަތްދޭ ސްޓާލިންކު ކުންފުނީގެ ވެރިޔާ އިލޯން މަސްކު، ގާޒާގައި ހަރަކާތްތެރިވާ އިންސާނީ ހިދުމަތްދޭ ޖަމްއިއްޔާތަކަށް އިންޓަނެޓުގެ ހިދުމަތް ދޭނެ ކަމަށް ބުނުމުން އިޒްރޭލުން ވަނީ ސްޓާލިންކާއެކު އޮތް ހުރިހާ ގުޅުމެއްވެސް ކަނޑާލާފަ އެވެ.
ގާޒާއަށް އަލުން މުވާސަލަތީ ހިދުމަތްތައް ލިބެން ފެށި ނަމަވެސް، ގާޒާގައި ހަރަކާތްތެރިވަމުންދާ ނޫސްވެރިންނާއި ސިއްހީ ހިދުމަތްދޭ ފަރާތްތައް އަދި އާންމުންވެސް މިހާރު ދަނީ އެހެން ގައުމުތަކުގެ ޖަމްއިއްޔާތަކާއި ހެޔޮއެދޭ ފަރާތްތަކުގެ އެހީގައި އީ-ސިމް އިން ހިދުމަތް ހޯދަން ފަށާފަ އެވެ.
މި މަސައްކަތުގައި އިސްކޮށް ހަރަކާތްތެރިވަމުން ގެންދާ މިސްރުގެ ނޫސްވެރިޔާ، މިރުނާ އަލް ހެލްބާވީ، 31، އޭނާގެ އެކްސް އެކައުންޓުގައި ލިޔެފައިވާ ގޮތުގައި މިހާތަނަށް 1،000 އަށްވުރެ ގިނަ އީ-ސިމް ވަނީ ގާޒާއަށް ފޯރުކޮށްދީފަ އެވެ.
އޭނާ އިތުރު ޕޯސްޓެއްގައި ބުނެފައިވަނީ އިޒްރޭލަށް ގާޒާގެ އަޑު ކަނޑުވައިނުލެވޭނެ ކަމަށާއި، ގާޒާގައި ތިބި ސިމް ބޭނުންވާ ހުރިހާ ފަރާތްތަކަށް އީ-ސިމް ފޯރުކޮށްދޭނެ ކަމަށެވެ.
އިޒްރޭލުން ގާޒާގެ ސެލް ޓަވަރުތަކުން ހިދުމަތް ކަނޑާލިޔަސް މި އުކުޅު ބޭނުންުކޮށްގެން އިޒްރޭލުގެ ސެލް ޓަވަރެއް ބޭނުންކޮށްގެން އިންޓަނެޓު ހޯދާ މުވާސަލާތް ކުރެވެނޭ އެވެ. އިޒްރޭލުގެ ފޯނުގެ ހިދުމަތްދޭ ފަރާތްތަކުގެ ސިމް ކާޑު ހޯދަން ގާޒާގައި ތިބި ފަރާތްތަކަށް އުނދަގޫވި ނަމަވެސް އީ-ސިމް އަކީ ދުނިޔޭގެ ކޮންމެ ތަނެއްގައި ހުރި މީހަކަށްވެސް ގަނެ، އެ ފަލަސްތީނުގެ ރައްޔިތުންނަށް ފޯރުކޮށްދެވޭނެ އެއްޗެކެވެ.
މުއާސަލާތީ ގުޅުންތަކުގެ އިތުރުން މި މަހު ހަތެއްގައި ފަލަސްތީނުގެ ހަމާސް ޖަމާއަތުން ދިން ހަމަލާތަކުގެ ބަދަލުގައި ހަނގުރާމަ އިއުލާންކޮށް، ވޭތުވެދިޔަ 75 އަހަރު އިޒްރޭލުން ހިންގަމުންދާ ގަތުލުއާއްމު ވަރުގަދަކޮށް ދެމުންދާ ހަމަލާތަކުގެ ތެރެއިން އިޒްރޭލުން ވަނީ ގާޒާއިން ފެނާއި ކަރަންޓު އަދި ތެޔޮ ލިބޭނެ މަގުތައް ބަންދުކޮށްފަ އެވެ.
ބައިނަލްއަގުވާމީ އެކި ޖަމްއިއްޔާތަކުންނާއި ގައުމުތަކުން ގާޒާއަށް ފޮނުވި އެހީ ރަފާހު ބޯޑަރުގައި ތޮއްޖެހިފައި ވީ ނަމަވެސް އިޒްރޭލުން އެ އެހީގެ އުޅަނދުތައް ވެއްދުމަށް ވަނީ ދެކޮޅުހަދާފަ އެވެ. މި މަހުގެ ހަތަކުން ފެށިގެން މިއަދާ ހަމައަށް ގާޒާއަށް ވަދެފައިވަނީ 100 އެއްހާ އެހީގެ އުޅަނދެވެ.
މި މަހުގެ ހަތްވަނަ ދުވަހު ދޭން ފެށި ހަމަލާތަކުގައި އިޒްރޭލުން ފަލަސްތީނުގެ 8000 އަށްވުރެ ގިނަ މީހުން ޝަހީދުވެފައިވާއިރު ފަލަސްތީނުގެ ހަމާސް ޖަމާއަތުން ދިން ހަމަލާތަކުގައި އިޒްރޭލުގެ 1400 އަށްވުރެ ގިނަ މީހުން ވަނީ މަރާލާފަ އެވެ.
