ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރަން އެމްޑީޕީން ހުށަހެޅި ގަރާރު އެޖެންޑާކުރި ޖަލްސާ މިއަދު ނުބޭއްވުމުން އެ މައްސަލަ ކޯޓަށް ހުށަހަޅަން މަޝްވަރާ ފަށައިފި އެވެ.
ރައްޔިތުންގެ މަޖިލީހުގެ ހުޅުމާލެ ދާއިރާގެ އެމްޑީޕީ މެމްބަރު އަލީ ނިޔާޒު "އަދަދު" އަށް ވިދާޅުވީ ނަޝީދު ވަކިކުރަން ހުށަހެޅި ގަރާރު އެޖެންޑާކުރި ޖަލްސާ ބޭއްވޭނެ ގޮތެއް ހޯދަން ކޯޓަށް ދާން އެމްޑީޕީގެ ޕާލަމެންޓްރީ ގްރޫޕުން އެ ޕާޓީގެ ސެކްރެޓޭރިއަޓާ މިއަދު މަޝްވަރާކޮށް ގޮތެއް ނިންމާނެ ކަމަށެވެ.
މިއަދުގެ ޖަލްސާ ނުބޭއްވުނީ މަޖިލީހުގެ ނައިބު ރައީސް އީވާ އަބްދުﷲ ސަލާމުގައި ހުންނެވުމުންނެވެ. މަޖިލިސް ގަވާއިދު ބުނާ ގޮތުން، ރައީސް ވަކި ކުރާ ގަރާރު އިއްވާ ޖަލްސާގެ ރިޔާސަތު ބަލަހައްޓަންޖެހޭނީ ނައިބު ރައީސް އެވެ.
ނަމަވެސް އެމްޑީޕީން ގަބޫލު ކުރަނީ، ގަވާއިދު ލިޔެފައި އޮތީ ގާނޫނު އަސާސީން ލިބިދޭ ބާރެއް ހަނިކޮށްފައި ކަމަށެވެ. އަދި ގަވާއިދުގެ ތެރެއިން، އެހެން މީހަކަށް އެ ޖަލްސާގެ ރިޔާސަތު ބެލެހެއްޓޭނެ ކަމަށް ވެސް އެމްޑީޕީން ގަބޫލު ކުރެ އެވެ.
ނަޝީދު ލީޑު ކުރައްވާ އަދި އީވާ ވެސް ނިސްބަތްވެވަޑައިގަންނަވާ ދަ ޑިމޮކްރެޓްސް އިން ބުނަނީ ނަޝީދު ވަކި ކުރުމުގެ ގަރާރު ދެ ވަނަ ފަހަރަށް ހުށަހެޅީ ގަވާއިދާ ހިލާފަށް ކަމަށެވެ. އެ ޖަލްސާ ބޭއްވިޔަނުދޭން މަސައްކަތް ކުރާނެ ކަމަށް ކުރިން ވެސް ވިދާޅުވެފައިވެ އެވެ.
އެމްޑީޕީގެ ޕާލަމެންޓަރީ ގްރޫޕުން ބުނަނީ، ނަޝީދުގެ ވަކި ކުރުމުގެ ޖަލްސާ ނުބާއްވާ މަޖިލީހުގެ އެއްވެސް މަސައްކަތެއް ކުރިއަށް ނުގެންދެވޭނެ ކަމަށާއި އޭގެ ތެރޭގައި އިންތިހާބީ ރައީސް ހުވާ ކުރުމަށް ބާއްވާ ޖަލްސާ ވެސް ހިމެނޭނެ ކަމަށެވެ. އިންތިހާބީ ރައީސް ހުވާ ކުރައްވަން ޖެހެނީ މަޖިލީހުގެ ޖަލްސާއެއްގަ އެވެ.
މަޖިލީހުގެ ގަވާއިދު ބުނާ ގޮތުން، އެ މަޖިލީހުގެ ރައީސް ވަކި ކުރުމަށް ގަރާރެއް ހުށަހަޅައިފި ނަމަ ދެން އިތުރު މަސައްކަތެއް ކުރެވޭނީ އެ ގަރާރާމެދު ގޮތެއް ނިންމުމަށްފަހެވެ.
