ރާއްޖެއަށް ކޭޝް ކާޑު ތައާރަފްކުރިތާ 22 އަހަރުތެރޭ 1.2 މިލިއަނަށްވުރެ ގިނަ ކާޑު ދޫކޮށްފައިވާ ކަމަށް މޯލްޑިވްސް މަނިޓަރީ އޮތޯރިޓީ(އެމްއެމްއޭ)ގެ ތަފާސްހިސާބުތަކުން ދައްކައިފި އެވެ.
ރާއްޖެއަށް އެންމެ ފުރަތަމަ ބޭންކު ކާޑު ތައާރަފްކުރީ ބެންކް އޮފް މޯލްޑިވްސް (ބީއެމްއެލް އިންނެވެ. އެއީ 2000 ވަނަ އަހަރުގެ ޖެނުއަރީމަހު ބީއެމްއެލް އިން ރާއްޖެއަށް ތައާރަފްކުރި އޭޓީއެމް ތަކާއެކު ބީއެމްއެލް ކޭޝް ކާޑުގެ ނަމުގައި ތައާރަފްކުރި ބޭންކުގެ އަމިއްލަ ޑެބިޓް ކާޑެކެވެ.
މަރުކަޒީ ބޭންކުން އާއްމުކޮށްފައިވާ ތަފާސްހިސާބުތަކުން އެނގޭ ގޮތުގައި އެއިރުން ފަށައިގެން މިދިޔަ އަހަރުގެ ނިޔަލަށް ބޭންކުތަކުން ވަނީ 1.2 މިލިއަން ކާޑު ދޫކޮށްފަ އެވެ. އަދި އޭގެ ތެރެއިން 74 ޕަސެންޓު ކާޑަކީ އަދިވެސް އެކްޓިވް ކާޑުތައް ކަމަށް އެމްއެމްއޭ އިން ބުންޏެވެ.
މީގެ ތެރެއިން 60 ޕަސެންޓަކީ ޑެބިޓް ކާޑެވެ. އަދި 36 ޕަސެންޓަކީ ޕްރިޕެއިޑް ކާޑު ނުވަތަ ފައިސާ އަޅައިގެން ބޭނުންކުރާ ކާޑެވެ. ކްރެޑިޓް ކާޑުގެ އަދަދަކީ ހަތަރު ޕަސެންޓެވެ.
ތަފާސްހިސާބުތަަކަށް ބަލާއިރު ރާއްޖޭގައި އެންމެ މަގުބޫލީ ވިސާ ކާޑުތަކެވެ. އެގޮތުން ޑެބިޓް އަދި ކްރެޑިޓް ކާޑުގެ 45 ޕަަސެންޓް ވިސާ އިން ދޫކޮށްފައިވާއިރު އެމެރިކަން އެކްސްޕްރެސް އިން ދޫކޮށްފައިވަނީ 23 ޕަސެންޓް ކާޑެވެ. އަދި މާސްޓާ ކާޑުގެ އަދަދަކީ 20 ޕަސެންޓެވެ.
ޕްރީޕެއިޑް ކާޑުތަކަށް ބަލާއިރު މާސްޓާކާޑަކީ އެންމެ މަގުބޫލު ކާޑު ސްކީމެވެ.
ކާޑުގެ މަގުބޫލުކަން އަހަރުން އަހަރަށް އިތުރުވަމުން އަންނަ އިރު ކާޑު ބޭނުންކޮށްގެން ކުރާ މުއާމަލާތްތައްވެސް އަންނަނީ އިތުރުވަމުންނެވެ. އެގޮތުން މިދިޔަ އަހަރު އެކަނިވެސް ކާޑު ބޭނުންކޮށްގެން ޖުމްލަ 17.9 ބިލިއަން ރުފިޔާގެ ޓްރާންސެކްޝަން ވަނީ ހިންގާފަ އެވެ. އެއީ ޖުމްލަ 45.7 މިލިއަން ޓްރާންސެކްޝަނެވެ. މިއީ 2019 ވަނަ އަހަރާ އަޅާބަލާއިރު 66 އިންސައްތަ އިގެ އިތުރުވުމެކެވެ.
ކާޑުތަކާއެކު އޭޓީއެމް އާއި ޕީއޯސް މެޝިންތައްވެސް އިތުރު
އެމްއެމްއޭގެ ތަފާސް ހިސާބުތަކުން އެނގޭ ގޮތުގައި ރާއްޖޭގެ އާބާދީގެ ކޮންމެ ލައްކައަކަށް 65 އޭޓީއެމް ހުރެއެވެ.
މިދިޔަ އަހަރު ނިމުނު އިރު ރާއްޖޭގައި ޖުމްލަ 182 އޭޓީއެމް އެއް އޮޕަރޭޓުކުރި އެވެ. މިއީ 2019 ވަނަ އަހަރާ އަޅާބަލާއިރު 22 އިންސައްތައިގެ ކުރިއެރުމެކެވެ. މީގެ ތެރެއިން 42 ޕަސެންޓް އޭޓީއެމް މާލެ ސަރަހައްދުގައި ހުރިއިރު ބާކީ 58 އިންސައްތަ އޭޓީއެމް ހުންނަނީ ރާއްޖެތެރޭ ރަށްރަށުގަ އެވެ.
ތަފާސް ހިސާބުތަކަށް ބަލާއިރު، ރާއްޖޭގެ އާބާދީގެ ކޮންމެ ލައްކައަކަށް ތިންހާސް ޕީއޯއެސް ޓާމިނަލް އެބަހުއްޓެވެ. އެމްއެމްއޭއިން ބުނިގޮތުގައި މިދިޔަ އަހަރުގެ ނިޔަލަށް ރާއްޖޭގައި 8،700 އަށްވުރެ ގިނަ ޕީއޯއެސް ޓާމިނަލްތައް ހިންގަމުން ދިޔައެވެ. އޭގެ ތެރެއިން 90 ޕަސެންޓަށްވުރެ ގިނަ ޕީއޯއެސް ޓާމިނަލްތަކަކީ ބޭންކުތަކުން ހިންގާ ޓާމިނަލްތައް ކަމަށާއި އޭގެ ތެރެއިން 80 ޕަސެންޓް އަކީ އެއް ބޭންކެއްގެ މެޝިންތައް ކަމަށްވެސްް ބުންޏެވެ.
