ޗެންނާއީ، އިންޑިއާ (އޮކްޓޫބަރު 24) - އައިސީސީ ވަންޑޭ އިންޓަނޭޝަނަލް (އޯޑީއައި) ކްރިކެޓް ވޯލްޑް ކަޕްގައި އަފްގާނިސްތާނުން ޕާކިސްތާންގެ މައްޗަށް ވަނީ ތާރީހީ މޮޅެއް ހޯދައިފި އެވެ.
އަފްގާނިސްތާނުން އަށް ވިކެޓުން މި މެޗު ކާމިޔާބުކުރިއިރު، މިއީ އެ ގައުމުން ތާރީހުގައި ވެސް އޯޑީއައި ކްރިކެޓްގައި ޕާކިސްތާންގެ މައްޗަށް ހޯދި ފުރަތަމަ މޮޅެވެ. އަފްގާނިސްތާން ޓީމުގައި ޕާކިސްތާނަށް ނިސްބަތްވާ ކުޅުންތެރިން ވެސް ހިމެނެ އެވެ. އޭގެ ތެެރެއިން ބައެއް ކުޅުންތެރިންނަކީ ޕާކިސްތާނުން ފުރުސަތު ނުލިބޭތީ އަފްގާނިސްތާނަށް ކުޅެން ބަދަލުވި ކުޅުންތެރިންނެވެ.
މި ފަހަރުގެ ކްރިކެޓް ވޯލްޑް ކަޕްގައި އަފްގާނިސްތާނުން ވަނީ އެންމެ ފަހުގެ ޗެމްޕިއަން، އިންގްލެންޑް ވެސް ބަލިކޮށްފަ އެވެ.
ޗިދަމްބަރަމް ސްޓޭޑިއަމްގައި ކުޅުނު މެޗައި ޓޮސް ދިމާވުމުން ޕާކިސްތާނުން ނިންމީ ކުޅެން އަރާށެވެ. އެ ގޮތުން، 50 އޯވަރު ތެރޭގައި ހަތް ކުޅުންތެރިން ނުބައިވެގެން 282 ލަނޑު ހެދި އެވެ. އެންމެ ރަނގަޅު ކުޅުމެއް ދެއްކީ 74 ލަނޑު ހެދި، ޓީމުގެ ކެޕްޓަން، ބާބަރު އާޒަމް އެވެ. އެ ޓީމުގެ އަބްދުﷲ ޝަފީގު ވެސް ވަނީ 58 ލަނޑު ހަދައިފަ އެވެ.
ޖަވާބުގައި އަފްގާނިސްތާނުން ކުޅެން އަރައި، 49 އޯވަރުގެ ތެރޭގައި ދެ ކުޅުންތެރިން ނުބައިވިއިރު، 286 ލަނޑު ހަދައިގެން މެޗުން މޮޅުވި އެވެ. އެންމެ ރަނގަޅު ކުޅުމެއް ދެއްކީ 87 ލަނޑު ހެދި އިބްރާހިމް ޒަދްރާން އެވެ. އެ ޓީމުގެ ރަހުމަތު ޝާހު ވަނީ 77 ލަނޑު އެއްކޮށްފަ އެވެ.
ހޯދި ދެ ވަނަ މޮޅާ އެކު، އަފްގާނިސްތާން ވަނީ ފުރަތަމަ ބުރުގެ ތާވަލުގެ ހަ ވަނަ އަށް ޖެހިލައިފަ އެވެ.
ކްރިކެޓް ވޯލްޑް ކަޕްގައި މިއަދު ކުޅޭ މެޗުގައި ބަންގްލަދޭޝް ބައްދަލުކުރާނީ ދެކުނު އެފްރިކާއާ އެވެ.
