ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ރާއްޖޭން ބޭރުން ލިބޭ ފައިސާ ނަހަމަ ގޮތުގައި އަމިއްލަ މަންފާ ހޯދަން ބޭނުންކުރާ މައްސަލައިގެ ތަހުގީގަށް އެފްއޭއެމް ހައުސް ބަލައި ފާސްކުރަމުންދާއިރު، އެ ކަންކަމާ ބެހޭގޮތުން ވާހަކަ ދައްކާނީ ތަހުގީގަށް ފަހު ކަމަށް އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވެއްޖެ އެވެ.
މާފަންނުގައި ހުންނަ އެފްއޭއެމް ހައުސް އަށް މިއަދު ހެނދުނު ފުލުހުންގެ ޓީމެއް ވަދެ، ފާސްކުރަން ފެށީ، އެފްއޭއެމާ ގާތްގުޅުމެއް އޮންނަ، ބައިނަލްއަގުވާމީ ފުޓްބޯޅަ ފެޑެރޭޝަންތަކާއި އެސޯސިއޭޝަންތަކުން އެފްއޭއެމް އަށް ދޭ ސްޕޮންސަޝިޕް ފައިސާ ވަކިވަކި މީހުންގެ އެކައުންޓްތަކަށް، ފޮނުވައި މަނީ ލޯންޑަރިން އާއި ހިޔާނާތަށް ތުހުމަތުކުރެވޭ ކަންތައްތަކެއް ހިންގާ ކަމަށް ތުހުމަތުކުރެވިގެން ޕްރޮސިކިއުޓާ ޖެނެރަލް (ޕީޖީ) ގެ އަމުރަކަށެވެ.
އެފްއޭއެމް ހައުސް، ބަލައި ފާސްކުރަމުންދިޔަ ވަގުތުގައި ބައްސާމް ވަނީ އެ އޮފީސް ކައިރިއަށް ގޮސް، ފުލުހުންނާ ވާހަކަ ދައްކައިފަ އެވެ.
ރާއްޖޭގެ އެންމެ ބޮޑު ކުޅިވަރު އެސޯސިއޭޝަން، އެފްއޭއެމްއާ ގުޅުވައިގެން މަނީ ލޯންޑަރިން ފަދަ ސީރިއަސް ބޮޑު ތުހުމަތެއް ކޮށްފައިވާ މި ވަގުތުގައި އެފްއޭއެމްގެ ބަހެއް އޮޅުންފިލުވަން، އެ އެސޯސިއޭޝަންގެ ވަޓްސަޕް ގްރޫޕްގައި ސުވާލުކުރުމުން ބައްސާމް ވިދާޅުވީ، "މި ވަގުތު ކުރިއަށްދާ ކަންކަން (ތަހުގީގުގެ ކަންކަން) ނިމުމުން ޖަވާބުދާރީ ވާނެ" ކަމަށެވެ.
ޕީޖީ އޮފީހުން އެފްއޭއެމް މައްސަލައިގައި ނެރެފައިވާ ބަޔާނުގައި ބުނެފައިވަނީ ރާއްޖެ އަކީ ބައިނަލްއަގުވާމީ ޖަމިއްޔާތަކާ ގާތްގުޅުމެއް އޮވެ، އެ ޖަމިއްޔާތަކުގެ އިތުބާރާއި ޔަގީންކަން އޮތް ގައުމެއް ކަމަށެވެ. އަދި އެފަދަ ގައުމެއްގައި އެފްއޭއެމް ފަދަ ޖަމިއްޔާ އަކުން އަމަލުކުރަމުން އަންނަނީ ގައުމުގެ ނަޒާހަތްތެރިކަމާއި އިންސާފުވެރި ކަމަށް އަސަރުކުރާ ގޮތަށް ކަމަށް ފެންނާތީ އެފްއޭއެމްގެ މި ކަންކަން ބަލަން ޖެހޭ ކަމަށެވެ.
".... ދައުލަތުގެ އިދާރާތަކުގެ ނަޒާހާތްތެރިކަމާއި، އިންޞާފުވެރިކަން އަބަދުމެ ކަށަވަރުވެފައި އޮތުމަކީ މުޅި ދިވެހި ދައުލަތުގެ ގައުމީ މަސްލަހަތާ ސީދާގޮތުން ގުޅުން ހުރި ކަމަކަށްވާތީ، ދިވެހިރާއްޖެއާ މުއާމަލާތްކުރާ ބައިނަލްއަގުވާމީ އިދާރާތަކުން، ވަކި ހަމަތަކާއި އުސޫލުތަކެއްގެ ދަށުން ފޮނުވާ ފައިސާ، އެ ކަމަށް ދިވެހިރާއްޖޭގައި ހެދިފައިވާ އުސޫލުތަކާއި ގާނޫނުތަކާ ހިލާފަށް، ކުށްކުރުމަށް ނުވަތަ ކުށްކުރުމަށް ފަހިވާގޮތަށް ބޭނުންކުރެވޭކަމުގެ ތުހުމަތެއް އޮތުމަކީ ޕްރޮސިކިއުޓަ ޖެނެރަލް ކަންބޮޑުވެވަޑައިގަންނަވާ ކަމެކެވެ،" ޕީޖީ އޮފީހުގެ ބަޔާނުގައިވެ އެވެ.
އެފްއޭއެމް ހައުސް އަށް ވަންނަން ބައްސާމަށް ހުރަހެއް އޮތްތޯ ސުވާލުކުރުމުން، އޭނާ ވިދާޅުވީ އެފަދަ ކަމެއް ނެތް ކަމަށެވެ.
އެފްއޭއެމްގެ ވެރިންނާއި ގާތް ފަރާތްތަކުގެ އަމިއްލަ އެކުންޓްތަކަށް ފައިސާ ފޮނުވި ކަމުގެ ތުހުމަތުތަކެއް
ބައިނަލްއަގުވާމީ ގިނަ އެސޯސިއޭޝަންތަކާއި ފެޑެރޭޝަން އެފްއޭއެމްގެ މިހާރުގެ ލީޑަޝިޕާ ގާތްގުޅުމެއް އޮވެ އެވެ. އެފްއޭއެމް އިން ކްލަބްތަކަށް ދޭ މާލީ އެހީތެރިކަން ފޯރުކޮށްދެނީ ވެސް ބޭރުގެ އެސޯސިއޭޝަންތަކާއި ފެޑެރޭޝަންތަކާ އެކު ވެވިފައިވާ އެއްބަސްވުންތަކުގެ ތެރެއިން ލިބޭ ސްޕޮންސަޝިޕްތަކުން ކަން މީގެ ކުރިން އެފްއޭއެމްގެ ނޫސްވެރިންގެ ބައްދަލުވުންތަކުގައި ބައްސާމް ވިދާޅުވެފައިވެ އެވެ.
ފުލުހުން މިހާރު ކުރަމުން އަންނަ ތަހުގީގަށް ލިބިފައިވާ މައުލޫމާތުތަކަށް ބަލާއިރު، "އަދަދު" އަށް އެނގިފައިވާ ގޮތުގައި، ފީފާ އާއި އޭއެފްސީ އަދި އެކި ގައުމުތަކުގެ އެސޯސިއޭޝަންތަކުން އެފްއޭއެމް އަށް ދޭ މާލީ އެހީތަކުގެ ފައިސާ، އެފްއޭއެމްގެ ވެރިންނާއި ގާތް ފަރާތްތަކުގެ އެކައުންޓްތަކުގެ އިތުރުން ކުންފުނިތަކަށް ފޮނުވާފައިވެ އެވެ.
މީގެ އިތުރުން، އެފްއޭއެމްއާ ގުޅިގެން، ޑޮލަރު ވިއްކުމުގެ ކަންކަން ވެސް ބައެއް ފަރާތްތަކުން ކުރާކަން ވަނީ އެނގިފައިވެ އެވެ.
މި ހުރިހާ ތުހުމަތުތަކެއް އެފްއޭއެމަށް އަމާޒުވެފައިވާއިރު، އެ އެސޯސިއޭޝަނާ ގުޅޭ މާލީ ގިނަ މައްސަލަތަކެއް މިހާރު ވެސް އެބައޮތެވެ. އެ ގޮތުން، އެފްއޭއެމްގެ މުވައްޒަފުންނަށް މުސާރަ ނުދޭތާ ހަތް މަަހަށް ވުރެން ގިނަ ދުވަސް ވެފައިވާއިރު، ކުރިން ގައުމީ ޓީމުތަކަށް ކޯޗުކޮށްދިން ބިދޭސީ ކޯޗުންނަށް ނުދީ ހުރި މުސާރަ ދައްކަން ފީފާ އިން އޮތީ އަމުރުކޮށްފަ އެވެ.
އޭގެ އިތުރުން، ސިވިލް ކޯޓުން ވަނީ އެފްއޭއެމްގެ މައްޗަށް ގިނަ މައްސަލަތަކެއްގައި އެކި ކުންފުނިތަކަށް ފައިސާ ދައްކަން އަންގައިފަ އެވެ.
މީގެ ދެ އަހަރު ކުރިން، މަޝްހޫރު ވިޔަފާރިވެރިޔާ މުހައްމަދު މޫސާ (އުއްޗު)ގެ ހާއްސަ ދައުވަތަކަށް ޅ. ކުރެއްދޫ ރިސޯޓްގައި ގާއިމްކޮށްފައިވާ ފުޓްބޯޅަ ދަނޑުގައި ގައުމީ ޓީމު ކުޅުނު މެޗުން ލިބުނު އިނާމް ފައިސާ ކުޅުންތެރިންނަށް ބަރާބަރަށް ނުދީ އެ ފައިސާ އެފްއޭއެމްގެ ކަންކަމަށް ވެސް ވަނީ ބޭނުންކޮށްފަ އެވެ. އެކަމާ ހިތްހަމަނުޖެހުން ފާޅުކޮށް ގިނަ ކުޅުންތެރިން ސުވާލުކުރި ނަމަވެސް އެކަށީގެންވާ ޖަވާބެއް ނުލިބެ އެވެ.
ރާއްޖޭގެ ފުޓްބޯޅަ އެސޯސިއޭޝަން، އެފްއޭއެމާ ގުޅޭ ކޮރަޕްޝަންގެ ތަހުގީގަކަށް ފުލުހުން އެފްއޭއެމް ހައުސް އަށް ވަދެފައިވާއިރު، މި ކަމާ ހެދި ފީފާ އިން ރާއްޖެ ސަސްޕެންޑް ކޮށްފާނެ ކަމަށް ބެލެވޭ ހާލަތެއް ވެސް އެބައޮތެވެ. އެއީ، ފީފާ އިން މި ފަދަ ކަންކަން މާނަ ކުރާ އެއްގޮތަކީ އެސޯސިއޭޝަން ހިންގުމަށް ތިން ވަނަ ފަރާތެއްގެ ނުފޫޒު ފޯރުމެވެ. މި ފަދަ ކަންކަމުގެ ސަބަބުން މީގެ ކުރިން ފީފާ އިން ޕާކިސްތާން ފުޓްބޯޅަ އެސޯސިއޭޝަން ސަސްޕެންޑްކޮށްފައިވެ އެވެ.
އެފްއޭއެމްގެ މައްޗަށް މި ކުރެވޭ ތުހުމަތުތަކުގެ މައްސަލައިގެ ތަހުގީގުގައި ފުލުހުން އެސޯސިއޭޝަންގެ މައި އިމާރާތަށް ވަދެ ފާސްކުރަމުން އަންނައިރު، މި ކަމާ ގުޅިގެން ބައިނަލްއަގުވާމީ އިދާރާއެއްގެ ހަރަކާތެއް އަދި ނެތެވެ.
