ބާސެލޯނާ (އޮކްޓޫބަރު 19) - ސްޕެނިޝް ލީގުގެ ރެފްރީ ކޮމިޓީގެ ކުރީގެ ނައިބް ރައީސް އެންރިކޭޒް ނެގްރެއިރާގެ ހިއްސާ އޮންނަ ކުންފުންޏަކަށް ބާސެލޯނާ އިން ފައިސާ ދިން ކަމަށް ބަލައި އެ ކުލަބުގެ ރައީސް ޖޮއާން ލަޕޯޓާއަށް ރިޝްވަތުގެ ދައުވާ އުފުލައިފި އެވެ.
މި އަހަރުގެ މާޗު މަހު ސްޕެއިންގެ މީޑިއާތަކުން ނެރުނު ރިޕޯޓްތަކެއްގައިވާ ގޮތުން ސްޕެއިން ލީގުގެ ރެފްރީސް ކޮމިޓީގައި އިސްކޮށް އުޅުނު ނެގްރެއިރާގެ ހިއްސާ އޮންނަ ކުންފުންޏަކަށް ބާސެލޯނާ އިން ވަނީ 2001 އިން 2018 އަށް ޖުމްލަ އެކު، ނުވަ މިލިއަން ޑޮލަރު ދީފަ އެވެ.
ގަވާއިދާ ހިލާފަށް މާލީ މަންފާ ހޯދަން މަކަރު ހެދުމާ އެކު، މަގާމުގެ ނުފޫޒުގައި ފައިދާތަކެއް ނަގަން ކޮރަޕްޝަންގެ އަމަލެއް ހިންގަން ބާސެލޯނާ އިން މަސައްކަތް ކޮށްފައިވާ ކަމަށް ބުނެ، ބާސެލޯނާގެ ކޯޓަކުން ވަނީ އެކުލަބާ ދެކޮޅަށް ތަހުގީގެއް ފަށައިފަ އެވެ.
އެ ކަމާ ދެކޮޅަށް ބާސެލޯނާގެ ވެރިން އެކި ފަހަރުމަތިން ވާހަކަދެއްކި ނަމަވެސް ރިޝްވަތު ދީފައިވާކަން ހާމަވާ ހެކި އެކަށީގެންވާ ވަރަށް ހުރިކަމަށް ކޯޓުން ވަނީ ނިންމާފަ އެވެ.
އިއްޔެ ކޯޓުން ވަނީ ބާސެލޯނާގެ މިހާރުގެ ރައީސް ލަޕޯޓާ އާއި ކުރީގެ ދެ ރައީސުން ކަމަށްވާ ސަންދްރޯ ރޮސެލް، ޖޯސެފް މާރިއާ ބާޓެމޮއު އަދި އެ ކުލަބުގެ ދެ ޑިރެކްޓަރުން ކަމަށްވާ އޮސްކާ ގްރާއޫ އަދި އަލްބާޓް ސޮލާއާ ދެކޮޅަށް ރިޝްވަތުދިނުމުގެ ދަައުވާ އުފުލައިފަ އެވެ. މި ހުރިހާ ފަރާތެއްގެ މައްޗަށް ކުށް ސާބިތުވެއްޖެ ނަމަ މަދުވެގެން 10 އަހަރުގެ ސަސްޕެންޝަނެއް އަންނާނެ ކަމަށް ބެލެވެ އެވެ.
ކޯޓުން ނިންމި ނިންމުމުގައި ވަނީ ބާސެލޯނާއި ފައިދާ ދީފައިވާ ދުވަސްވަރު ލީގުގައި އެކުލަބާ އެއްކޮޅަށް ކަންކަން ނިންމާފައިހުރި ކަމަށް ފާހަގަކުރެވޭ ކަމަށެވެ.
ބާސެލޯނާއާ ދެކޮޅަށް ކުރިއަށްދާ މި ތަހުގީގުގައި އެކުލަބަށް ހަރުކަށި ފިޔަވަޅު އެޅުމަށް ބާސެލޯނާގެ ވާދަވެރިން ކުލަބުތަކުން އަންނަނީ ގޮވާލަމުންނެވެ. އެ ގޮތުން ރެއާލް މެޑްރިޑާއި އެތުލެޓިކޯ މެޑްރިޑުން ވެސް ވަނީ ބާސެލޯނާއާ ދެކޮޅަށް ކުރިއަށްދާ މައްސަލައިގައި ބާސެލޯނާއިން ކޮށްފައިވާ އަމަލުތައް ކުށްވެރިކޮށްފަ އެވެ.
