މިއުނިކް (އޮކްޓޫބަރު 18) - ޖަރުމަނުގެ ޗެމްޕިއަން، ބަޔާން މިއުނިކަށް ކުޅެމުން އަންނަ ޒުވާން މިޑްފީލްޑަރު، ޖަމާލް މުސިއާލާ އަށް ލިވަޕޫލުން ޝައުގުވެރިވާ ކަމަށް ޖަރުމަނުގެ މީޑިއާ ރިޕޯޓްތައް ބުނެފި އެވެ.
މިދިޔަ ދެތިން އަހަރު އެންމެ ހަލުވި ސްޕީޑެއްގައި ކުރިއެރުން ހޯދަމުން އައި އެއް ޒުވާން ތަރި އަކީ މުސިއާލާ، 20 އެވެ. ބަޔާންގެ އާ ކޯޗު ތޯމަސް ޓުޗެލްގެ ޕްލޭނުގައި ވެސް މުސިއާލާ އަކީ މުހިންމު ކުޅުންތެރިއެކެވެ. ބަޔާނާ އެކު، މުސިއާލާ ހަދާފައި އޮތް ކޮންޓްރެކްޓްގައި ބާކީ ތިން އަހަރު އޮތްއިރު، އޭނާގެ ކޮންޓްރެކްޓް ވީ އެންމެ އަވަހަށް އާ ކުރަން ބަޔާނުން އަންނަނީ މަސައްކަތް ކުރަމުންނެވެ.
ޖަރުމަނުގެ މީޑިއާ، ބިލްޑް އިން ރިޕޯޓްކުރާ ގޮތުގައި ލިވަޕޫލުން އަންނަނީ މުސިއާލާ އަށް ފާރަލަމުންނެވެ. އަދި މި ސީޒަނަށް ފަހު، ލިވަޕޫލުން ބިޑް ކުރަން ޝައުގުވެރިކަން ފާޅުކޮށްފައިވާ ކުޅުންތެރިންގެ ތެރޭގައި ބަޔާންގެ ލެރޯއި ސާނޭގެ އިތުރުން މުސިއާލާ ވެސް ހިމެނޭ ކަމަށް ރިޕޯޓްތައް ބުނެ އެވެ.
މުސިއާލާ ގަންނަން ކްލަބަކުން މަދުވެގެން 100 މިލިއަން ޑޮލަރު ހަރަދުކުރަން ޖެހޭނެ ކަމަށް ރިޕޯޓްތައް ބުނެ އެވެ.
ބަޔާނުން މުސިއާލާގެ ސޮއި ހޯދީ އޭނާގެ އުމުރުން 16 އަހަރުގަ އެވެ. އޭރު މުސިއާލާ ހުރީ ޗެލްސީގަ އެވެ. އިނގިރޭސި ޔޫތު ޓީމުތަކަށް ކުޅެފައިވާ މުސިއާލާ، ސީނިއާ ޕްރޮފެޝަނަލް ލެވަލްގައި ޖަރުމަނު ޓީމަށް ކުޅެން ނިންމީ 2021 ވަނަ އަހަރުގެ ފެބްރުއަރީ މަހުގަ އެވެ.
