އިޒްރޭލުން ފަލަސްތީނުގައި ހިންގަމުންދާ ގަތުލުއާންމުގެ ތެރެއިން ރޭ ގާޒާގައި ހުންނަ އަލް އަހްލީ ހޮސްޕިޓަލަށް ދިން ހަމަލާ ރާއްޖޭގެ ސަރުކާރުން ކުށްވެރިކޮށްފި އެވެ.
މި މަހުގެ ހަތްވަނަ ދުވަހު، ފަލަސްތީނުގެ ހަމާސްއިން އިޒްރޭލަށް ދިން ހަމަލާތަކަށްފަހު ހަނގުރާމަ އިއުލާނުކޮށް ފެށި މި ގަތުލްއާމުގައި ރޭ ދިން މި ހަމަލާގައި ޝަހީދުވި މީހުންގެ އަދަދު ކަށަވަރެއް ނުވެ އެވެ. ގާޒާގެ ހެލްތު މިނިސްޓްރީން އެންމެ ފަހުން ބުނި ގޮތުގައި ހަމަލާގައި 500 އަށްވުރެ ގިނަ މީހުން ވަނީ ޝަހީދުވެފަ އެވެ. އެހެން ރިޕޯޓުތަކުން ބުނާ ގޮތުން އެ އަދަދު 900 އާ ގާތްކުރެ އެވެ.
އާންމު ރައްޔިތުންނަށް އަމާޒުކޮށް، ހޮސްޕިޓާތަކާއި އާންމު ރައްޔިތުންގެ ބޭނުންތަކަށް ބޭނުންކުރާ އުމުރާނީ ވަސީލަތްތަކަށް ހަމަލާދިނުމަކީ ބައިނަލްއަގުވާމީ އިންސާނީ ހައްގުތަކާ ބެހޭ ގާނޫނުތަކާ ކަނޑައެޅިގެން ހިލާފު އަދި އެއްވެސް ގޮތަކަށް ބަލައިގަނެވޭނެ ކަންކަމެއް ނޫން ކަމަށް ފޮރިން މިނިސްޓްރީން ނެރުނު ބަޔާނުގައި ބުނެފައިވެ އެވެ.
"ފަލަސްތީނުގެ ކުށެއް ނެތް އާއްމު ރައްޔިތުންނާ ދެކޮޅަށް އެއްވެސް ރަހުމެއް ނެތި ދެމުންދާ ހަމަލާތައް ހުއްޓުވުމަށް ކުރެވެން ހުރި ހުރިހާ މަސައްކަތެއް ކުރުމަށް ބައިނަލްއަގުވާމީ މުޖުތަމައަށް ދިވެހިރާއްޖެއިން ގޮވާލި ގޮވާލުން ތަކުރާރުކުރަމެވެ. އަދި ޣައްޒާއަށް ބޭނުންވާ ބޭހާއި ކާބޯތަކެއްޗާއި ޟަރޫރީ ބޭނުންތަކަށް ބޭނުންވާ ތަކެތި ފޯރުކޮށްދިނުމަށް އިންސާނިއްޔަތުކަމުގެ ކޮރިޑޯތަކެއް ހުޅުވުމަށް ކުރަމުންދާ މަސައްކަތްތައް އިތުރަށް އަވަސްކުރުމަށް ވެސް ދިވެހިރާއްޖެއިން ގޮވާލަމެވެ." ރާއްޖޭން ނެރުނު ބަޔާނުގައި ބުނެފައިވެ އެވެ.
މި ހަމަލާ ކުށްވެރިކުރައްވާ ފޮރިން މިނިސްޓަރު ޝާހިދު މިއަދު 'އެކްސް' ގައި ކުރެއްވި ޕޯސްޓެއްގައި ވިދާޅުވީ، އެތައް ސަތޭކަ މީހުން ޝަހީދުކޮށްލާ އިޒްރޭލުން ދިން މި ހަމަލާ ދިވެހި ދައުލަތާއި ދިވެހިންގެ ނަމުގައި އެންމެ ހަރުކަށި އިބާރާތުން ކުށްވެރިކުރައްވާ ކަމަށެވެ. އަދި، އާންމުން ހިދުމަތް ލިބިގަންނަ ހޮސްޕިޓަލު ފަދަ އިމާރާތްތަކަށް ހަމަލާދިނުމަކީ ބައިނަލްއަގުވާމީ އިންސާނީ ގާނޫނުތަކާ ހިލާފު ކަމެއް ކަންވެސް ފާހަގަ ކުރެއްވި އެވެ.
"އަދި، އަނެއްކާވެސް ބައިނަލްއަގުވާމީ މުޖުތަމައަށް އަޅުގަނޑުމެން މި ގޮވާލަނީ މި ލާއިންސާނީ ހަމަލާތައް ހުއްޓުވަން މަސައްކަތް ކުރުމަށާއި ގާޒާއަށް އިންސާނީ އެހީ ފޯރުކޮށްދިނުމުގައި އޮތް ހުރަސްތައް ނައްތާލުމަށް" މީގެ ކުރިން އދ. ގެ އާންމު މަޖިލީހުގެ ރައީސްކަންވެސް ކުރެއްވި ޝާހިދު ވިދާޅުވި އެވެ.
އޮކްޓޯބަރު ހަތްވަނަ ދުވަހުން ފެށިގެން މެދުކެނޑުމެއްނެތި އިޒްރޭލުން އަންނަނީ ގާޒާއަށް ބޮން އަޅަމުންނެވެ. ޓެރަރިސްޓުންނާ ދެކޮޅަށް ދެމުންދާ ހަމަލާތަކެއް ކަމަށް އިޒްރޭލުން ބުނި ނަމަވެސް މިއީ ސީދާ ގާޒާގައި އުޅޭ ފަލަސްތީނުގެ ރައްޔިތުން ނައްތާލުމަށް ދެމުންދާ ހަމަލާތަކެކެވެ.
ކަރަންޓު ކަނޑާލުމުގެ ސަބަބުން އަނދިރީގައި އޮތް ގާޒާގައި އަލް އަހްލީ އަރަބް ހޮސްޕިޓަލަށް އިޒްރޭލުން މިރޭ ބޮން އަޅައި ދިން ހަމަލާގައި އެ ހޮސްޕިޓަލުގެ ގޯތި ތެރޭގައި ހިމާޔަތް ހޯދަމުންދިޔަ އެތައް ސަތޭކަ ރައްޔިތުންނެއްވެސް ވަނީ ޝަހީދުވެފަ އެވެ. އެމީހުން އެ ތަނުގައި ހިމާޔަތް ހޯދަމުން ދިޔައީ ހޮސްޕިޓަލަކަށް ވުމާ އެކު ހަމަލާ ދިނުމުގެ ފުރުސަތު ކުޑަކަމަށް ބެލުމަށް ފަހު އެވެ.
އިޒްރޭލާ ދެކޮޅަށް ހަމާސްއިން ދިން ހަމަލާތަކުގައި އިޒްރޭލުން 1400 އަށްވުރެ ގިނަ މީހުން ވަނީ މަރާލާފަ އެވެ. ބަދަލުގައި އިޒްރޭލުން ހިންގަމުން އަންނަ ގަތުލުއާމުގައި މަރުވި މީހުންގެ އަދަދު، ރޭގެ ހަމަލާގެ ކުރިން ހުރީ 3،000 އަށްވުރެ މަތީގަ އެވެ.
