ރާއްޖޭގެ ސަރަހައްދު ބެލެހެއްޓުމުގެ ގާބިލުކަން ދިވެހި ސިފައިންގެ އެބަހުރި ކަމަށާއި ނޮވެމްބަރު 3، 1988 ގައި ރާއްޖެއަށް ދިން ކަހަލަ އުދުވާނީ ހަމަލާއެއް މިހާރު ނުދެވޭނެ ކަމަށް ޑިފެންސް މިނިސްޓަރު ހަސަން ރަޝީދު މިރޭ ވިދާޅުވެއްޖެ އެވެ.
ޕީއެސްއެމްއިން ގެނެސްދޭ "އަހާ" ފޯރަމްގައި ހަސަން ރަޝީދު މިހެން ވިދާޅުވީ ރާއްޖޭގެ ސަރަހައްދަށް ވަދެ ބޭރުގެ ބަޔަކު ހިންގާފާނެ ހަރަކާތަކަށް ދިވެހި ސިފައިން ތައްޔާރީ ކިހާ މިންވަރަކަށްތޯ އެހި ސުވާލަކަށް ޖަވާބު ދެއްވަމުންނެވެ.
"އަޅުގަނޑުމެން ވާނެ ތަޖުރިބާކޮށްފަ 1988 ނޮވެމްބަރު 3 ގައި، ދިވެހިރާއްޖެއަަށް ދިން ޓެރަރިސްޓު ހަމަލާ. [] އަޅުގަނޑަށް ޔަގީންކަމާއެކު ދަންނަވަން ކެރޭ މިހާރު އެފަދަ ހަމަލާއެއް ނުދެވޭނެކަން،" ހަސަން ރަޝީދު ވިދާޅުވި އެވެ.
ހަސަން ރަޝީދު ވިދާޅުވި ގޮތުގައި ދިވެހި ސިފައިން އަބަދު ވެސް ތިބޭނީ ތައްޔާރަށެވެ. މިހެން ނަމަވެސް ސިފައިންގެ ވަސީލަތްތައް މަދު ކަމަށް އޭނާ ފާހަގަކުރެއްވި އެވެ.
މި ސަރުކާރުން އެކަން ރަނގަޅު ކުރަން ކުރަމުން އަންނަ މަސައްކަތުގެ ދަށުން ގިނަ ވަސީލަތްތަކެއް ހޯދާފައިވާ ކަމަށް ހަސަން ރަޝީދު ވިދާޅުވި އެވެ. މީގެ ތެރޭގައި ތުރުކީ ސަރުކާރުން ހަދިޔާ ކުރި މަނަވަރާއި އޮސްޓްރޭލިއާ ސަރުކާރުން ހަދިޔާކުރި މަނަވަރާއި ސަރުކާރުން ބޮޑު ހަރަދުކޮށްގެން ގެނައި ޑްރޯންތަކުގެ އިތުރުން ޕެޓްރޯލް ބޯޓުތައް ހިމެނޭ ކަމަށް އޭނާ ވިދާޅުވި އެެވެ.
"މި އެންމެހާ ވަސީލަތްތަކެއް މި ގާއިމުކުރަނީ [] ރާއްޖޭގެ ސަލާމަތާއި ރައްކާތެރިކަން، ކަނޑުގެ ސަރަހައްދު ހާއްސަކޮށް ބެލެހެއްޓުމަށް ޓަކައި، އަދި ވައިގެ ތެރޭގައި ވެސް އަޅުގަނޑުމެންގެ ވަސީލަތްތައް ހުރި މިންވަރަކުން [] އޮޕަރޭޝަންތައް ކުރިއަށް ގެންދިއުމަށް ޓަކައި، ވަސީލަތްތައް ގާއިމުކުރެވުނުު ވަރަކުން ކުރިއަށް އެ ގެންދަނީ،" ހަސަން ރަޝީދު ވިދާޅުވި އެވެ.
މި ހުރިހާ ވަސީލަތެއް ހުރި ނަމަވެސް، އެއްވެސް ގައުމަކީ ސަތޭކަ ޕަސެންޓު ރައްކާތެރި ގައުމެއް ނޫން ކަމަށް ހަސަން ރަޝީދު ފާހަގަކުރެއްވި އެވެ. މީގެ މިސާލަކަށް އޭނާ ނެންގެވީ، މީގެ 25 އަހަރު ކުރިން ސެޕްޓެމްބަރު 11 ގައި އެމެރިކާއަށް ދިން ޓެރަރިސްޓު ހަމަލާ އެވެ. އޭނާ ވިދާޅުވީ، އެމެރިކާއަކީ ދުނިޔޭގެ އެންމެ ރައްކާތެރި ކަމަށް ގިނަ ބަޔަކު ގަބޫލުކުރާ ގައުމު ކަމަށެވެ.
ޑިފެންސް މިނިސްޓަރު ވަނީ ކަނޑާއި ވައިގެ މަގުން ރާއްޖެ ދިފާއުކުރަން ދިވެހި ސިފައިން އަބަދު ވެސް ތަައްޔާރަށް ތިބި ކަމުގެ ޔަގީންކަން އަރުވާފަ އެވެ.
މި ފަހުގެ ތާރީހުގައި ރާއްޖެ ދުށް އެންމެ ބިރުވެރި ހަމަލާގައި، ދިވެހިންގެ ބަޔަކާ ގުޅިގެން ރާއްޖެ ހިފަން އައި ތަމަޅައިން ބަޔަކު ވަނީ 19 ދިވެހިން ޝަހީދުކޮށްލާފަ އެވެ.
