ބާސެލޯނާ (އޮކްޓޫބަރު 15) - ނިއުކާސަލް ޔުނައިޓެޑަށް ކުޅެމުން އަންނަ ބްރެޒިލްގެ މިޑްފީލްޑަރު، ބްރޫނޯ ގިމާރޭސްގެ ކޮންޓްރެކްޓްގައި އޭނާ ބާސެލޯނާ އަށް ވިއްކާލަން ހާއްސަ ޑީލެއް ހިމަނާފައިވާ ކަމަށް މީޑިއާތަކުން ރިޕޯޓްކޮށްފައިވާ ވާހަކަ ނިއުކާސަލް އިން ދޮގުކޮށްފި އެވެ.
ސައުދީގެ ސަރުކާރުގެ ހިއްސާ އޮންނަަ، ސައުދީ އަރަބިއްޔާގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިން މީގެ ދެ އަހަރެއްހާ ދުވަސް ކުރިން، ނިއުކާސަލް ގަތުމަށް ފަހު، ޓީމު ވަރުގަދަކުރަން ދުރު ރާސްތާ ޕްލޭނެއްގެ ދަށުން ގަތް ފުރަތަމަ ކުޅުންތެރިންގެ ތެރޭގައި ބްރެޒިލް ގައުމީ ޓީމުގެ މިޑްފީލްޑަރު، ގިމާރޭސް، 25 ހިމެނެ އެވެ.
ނިއުކާސަލް އިން ވަނީ މިދިޔަ އަހަރުގެ ޖޫން މަހު، ހަތަރު އަހަރާއި ބައިގެ ކޮންޓްރެކްޓެއްގެ ދަށުން ލިޔޯންގައި ހުއްޓައި، ގިމާރޭސްގެ ސޮއި ހޯދަން، 50 މިލިއަން ޑޮލަރު ހޭދަކޮށްފަ އެވެ. އޭގެ ފަހުން، މި މަހު ގިމާރޭސް ވަނީ މުސާރަ ބޮޑުކޮށް ފަސް އަހަރުގެ ކޮންޓްރެކްޓަކަށް އެއްބަސްވުން އާ ކޮށްފަ އެވެ.
ލިވަޕޫލުން ވެސް މި ސީޒަން ފެށުމުގެ ކުރިން ގިމާރޭސް ހޯދަން މަސައްކަތް ކުރި ކަމަށް ރިޕޯޓްތައް ބުނެ އެވެ. އެއީ، 100 މިލިއަން ޑޮލަރު ދީފައި ގިމާރޭސްގެ ސޮއި ހޯދުމަށް ކަމަށް ބްރެޒިލްގެ މީޑިއާތަކުން ވަނީ ރިޕޯޓްކޮށްފަ އެވެ.
ބްރެޒިލްގެ ބައެއް މީޑިއާތަކުން ރިޕޯޓްކުރާގޮތުގައި ގިމާރޭސްގެ އާ ކޮންޓްރެކްޓްގައި ބާސެލޯނާ އަށް އަގުހެޔޮކޮށް ބަދަލުވެވޭނެ މާއްދާއެއް ވަނީ ހިމަނައިފަ އެވެ. އެއީ، ނިއުކާސަލްގެ ކޮންޓްރެކްޓްގެ ފުރަތަމަ އަހަރު ނިމުމާ އެކު، ބާސެލޯނާ އިން 50-60 މިލިއަން ޑޮލަރުގެ އަގެއް ހުށަހަޅައިފިނަމަ ވިއްކާލާ ގޮތަށް އޮތް މާއްދާއެއް ކަމަށް ވަނީ ރިޕޯޓްކޮށްފަ އެވެ.
އެކަމަކު، އެ ވާހަކަތައް ނިއުކާސަލް އިން ވަނީ ދޮގުކޮށްފަ އެވެ.
ނިއުކާސަލްގެ ކޯޗު އެޑީ ހޯވް ބުނީ ގިމާރޭސް އަކީ އެ ޓީމުގެ މުސްތަގުބަލަށް ވަރަށް މުހިންމު ކުޅުންތެރިއެއް ކަމަށެވެ. އަދި ގިމާރޭސް އަށް ތައުރީފު ކުރަމުން ހޯވް ބުނީ ބައެއް ފެންވަރުގެ ކުޅުންތެރިންގެ ވާހަކަ މީޑިއާގައި އެކި ގޮތްގޮތަށް ދެއްކޭނެ ކަމަށެވެ. އެކަމަކު، އޭގެއިން ކޮންމެ ވާހަކަ އަކީ ހަގީގަތެއް ނޫން ކަމަށް ވެސް ހޯވް ބުނެފައިވެ އެވެ.
