ބާސެލޯނާ (އޮކްޓޫބަރު 11) - މިދިޔަ ދެ އަހަރު ބާސެލޯނާ އަށް ގެނައި ކުޅުންތެރިންގެ ޓްރާންސްފާ ފީ އަށާއި، އެހެނިހެން ހަރަދުތަކަށް އެ ކުޅުންތެރިން ގެނައި ކުލަބުތަކަށް 212 މިލިއަން ޑޮލަރު ބާސެލޯނާ އިން ނުދައްކާ އޮތްކަން ހާމަވެއްޖެ އެވެ.
ސްޕެއިންގެ ޗެމްޕިއަން ބާސެލޯނާ އަަށް މާލީ މައްސަލަތައް ކުރިމަތިވާން ފެށީ މީގެ ތިން އަހަރު ކުރިންނެވެ. ކުލަބުގެ ހިންގުން ދޯދިޔާވެ، ދަރަނިތައް ގިނަވެ މާލީ ގޮތުން އުނދަގޫ ހާލަތަކަށް ކުލަބު ދިޔަ އެވެ. އޭގެ ފަހުން ކުލަބުގެ ކުޅުންތެރިންގެ މުސާރަތައް ކުޑަކުރަން މަޖުބޫރުވެ، ޓީމުގެ މުހިންމު ކުޅުންތެރިން ވިއްކާލަން ވެސް ޖެހުނެވެ.
މިދިޔަ ދޮޅު އަހަރަށް ބަލާއިރު ކުލަބުގެ ދަރަނި އަންނަނީ މަދުވަމުންނެވެ. އަދި ކުލަބަށް މާލީ ގޮތުން ވެސް ރަނގަޅު ފައިދާތަކެއް ވަމުންނެވެ.
ދާދިފަހުން ލީކުކޮށްލި ރިޕޯޓްތައް ބުނާ ގޮތުން ކުލަބުން ދައްކަންޖެހޭ ދަރަނީގެ ގޮތުގައި މިދިޔަ ދެ އަހަރު އެކުލަބާ ގުޅުނު ކުޅުންތެރިންގެ ފީތައްވެސް ހިމެނެ އެވެ. އެ ގޮތުން ހަތަރު ކުލަބަކަށް 212 މިލިއަން ޑޮލަރު ނުދައްކާ އެބައޮތެވެ.
ބާސެލޯނާ އިން ޓްރާންސްފާ ފީ އާއި ކޮމިޝަންގެ ގޮތުގައި ފައިސާ ދައްކަން ޖެހެނީ ރަފީނިއާ ކުރިން ކުޅުނު ލީޑްސް ޔުނައިޓެޑާއި، ރޮބާޓް ލެވަންޑޯސްކީ ކުޅުނު ބަޔާން މިޔުނިކާއި، ފެރާން ޓޮރޭސް ކުރިން ކުޅެފައިވާ މެންޗެސްޓާ ސިޓީގެ އިތުރުން ޖޫލްސް ކޫންޑޭ ކުޅުނު ސެވިއްޔާ އަށެވެ.
އެ ގޮތުން، 212 މިލިއަން ޑޮލަރުގެ ތެރެއިން 95 މިލިއަން ޑޮލަރު ކުރިއަށް އޮތް 12 މަސްތެރޭގައި ބާސެލޯނާ އިން ދައްކަން ޖެހެ އެވެ. ބާކީ 127 މިލިއަން ޑޮލަރު ފަހުން ދެއްކިޔަސް މައްސަލައެއް ނުޖެހޭނެ އެވެ.
ލީޑްސް، ސިޓީ، ބަޔާން އަދި ސެވިއްޔާ އަށް ދައްކަން ޖެހޭ ފައިސާގެ އިތުރުން، ނެދަލެންޑްސްގެ އަޔަކްސް އަށް 17 މިލިއަން ޑޮލަރު ބާސާއިން ދޭން ޖެހެ އެވެ. މީގެ އިތުރުން އެކުލަބުން ދޫކޮށްލި ބައެއް ކުޅުންތެރިންކަމަށްވާ ނެޓޯ މުރައުއާ، ޖިއާން ޓޮޑީބޯ، އެމަސަން ރޮޔާލް، ޖޫނިއާ ފިރްޕޯ އަދި މިރަލެމް ޕިޔަނިކް އަށް ވެސް ކުލަބުން ފައިސާ ދޭން ޖެހެ އެވެ.
ކުލަބުގެ މާލީ ހާލަތު ރަނގަޅު ކުރުމަށް ބާސެލޯނާއިން އެކުލަބުގެ ގިނަ އެސެޓުތަކެއް ކުއްޔަށް ދޫކުރަމުން އަންނައިރު، އެޓީމުން އަންނަނީ ހަރުދަނާ އުސޫލެއްގެ ދަށުން ކުލަބުގެ ހިންގުން ވަރުގަދަ ކުރަން އިދާރީ ގޮތުން ވެސް ބަދަލުތަކެއް ގެންނަމުންނެވެ. އެ ގޮތުން ޓްރެއިނިން ފެސިލިޓީތަކާއި ސްޓޭޑިއަމްތައް ވެސް ފުޓްބޯޅައިގެ އިިިތުރުން ކޮންސެޓުތަކާއި ޝޯތަކަށް ވެސް އެ ކުލަބުން އަންނަނީ ދޫކުރަމުންނެވެ.
