ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެ މަގާމުން ވަކިކުރަން ރައްޔިތުންގެ މަޖިލީހަށް ހުށަހަޅާ މައްސަލާގައި އެމްޑީޕީގެ ޕާލަމެންޓްރީ ގްރޫޕުގެ 45 އަށް ވުރެ ގިނަ މެމްބަރުން ސޮއިކުރައްވައިފި އެވެ.
ނަޝީދު ވަކިކުރުމުގެ މައްސަލަ މަޖިލީހަށް ހުށަހަޅަން އެމްޑީޕީގެ ޕާލަމެންޓްރީ ގްރޫޕުން ފާސްކުރީ މިއަދު ބޭއްވި ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އިއްތިފާގުންނެވެ.
ރައްޔިތުންގެ މަޖިލީހުގެ ރައީސްކަމުން ނަޝީދު ވަކިކުރަން އެމްޑީޕީން ފުރަތަމަ ހުށަހެޅި މައްސަލަ އެމްޑީޕީން އަނބުރާ ގެންދިޔައީ ރިޔާސީ އިންތިހާބުގެ ފުރަތަމަ ބުރުގައި އެ ޕާޓީއާ ކުރިމަތިވި ނާކާމިޔާބީއަށް ފަހުގަ އެވެ. އޭގެ އެތައް ދުވަހެއް ކުރިން ހުށަހެޅި އެ މައްސަލަ ދިގުލައިގެން ދިޔައީ އެ މައްސަލަ އެޖެންޑާ ނުކުރައްވައި ނަޝީދު އެކި އުޒުރުތައް ދެއްކެވުމުންނެވެ.
ރައްޔިތުންގެ މަޖިލީހުގެ ހުޅުމާލެ ދާއިރާގެ މެމްބަރު އަލީ ނިޔާޒު "އަދަދު" އަށް މިއަދު ވިދާޅުވީ މިފަހަރު ހުށަހަޅާ މައްސަލަ ކުރިއަށް ނުގެންދަވަން ދައްކަވާނެ އުޒުރެއް ނޯންނާނެ ކަމަށެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަކިކުރަން އެމްޑީޕީން ހުށަހެޅުމުން އެ މައްސަަލަ އެޖެންޑާ ނުކުރައްވައި ނަޝީދު އޭރު ދެއްކެވި އެެއް އުޒުރަކީ މަޖިލީހުގެ ރައީސާއި ނައިބު ރައީސްގެ މައްސަލަ އެއްފަހަރާ ހުށަހެޅުމެވެ. އެހެންވެ ރިޔާާސަތު ބަލަހައްޓަވާނެ ބޭފުޅަކު ނެތް ކަމަށް ވިދާޅުވެ، ޖަލްސާތައް ބޭއްވުން ހުއްޓަވައި ލެއްވި އެވެ. ދެވަނަ އުޒުރަކީ އެމްޑީޕީގެ ބައެއް މެމްބަރުން އެޕާޓީން ވަކިވެވަޑައިގެންނެވުމުން މަޖިލީހުގެ ދާއިމީ ކޮމިޓީތަކަށް އަލުން މެމްބަރުން އައްޔަންކުރަން ޖެހިފައި އޮތުމެވެ.
އަލީ ނިޔާޒު ވިދާޅުވީ މިހާރު އެ ދެ އުޒުރު ވެސް ނެތިގޮސްފައިވާ ކަމަށެވެ.
"މިފަހަރު އަޅުގަނޑުމެން ފުރަތަަ މި ހުށަހަަޅަނީ ހަމަ އެކަނި މަޖިލީހުގެ ރައީސްގެ މައްސަލަ. އެހެންވީމާ ނައިބު ރައީސަށް ޖަލްސާތަކުގެ ރިޔާސަތު ބެލެހެއްޓެވޭނެ. އޭރު ދެން ވިދާޅުވީ ކޮމިޓިތައް އެކުލަވައި ނުލެވި އޮތީމައޭ. މިހާރު ކޮމިޓީތައް ވެސް އެހެރީ އެކުލަވައިލާފައި،" އަލީ ނިޔާޒު ވިދާޅުވި އެވެ.
އޭނާ ވިދާޅުވީ އިތުބާރު ނެތްކަމުގެ މައްސަލަ ކުރިއަށް ނުގެންދަވަން އުޒުރެއް ނެތަސް ޖަލްސާތައް ނުބޭއްވުން ފަދަ ގޮތަކުން އެކަން ލަސްކުރައްވަން ރައީސް ނަޝީދު މަަސައްކަތްކުރައްވަފާނެ ކަމަށެވެ.
