މިއުނިކް (އޮކްޓޫބަރު 8) - ބަޔާން މިއުނިކާ އެކު ޓްރެއިން ކުރަމުންދިޔަ އެ ޓީމުގެ ކުރީގެ ޑިފެންޑަރު ޖެރޯމް ބޯޓެންގް އަށް އެ ކްލަބުން ކޮންޓުރެކްޓެއް ހުށަނާޅާނެ ކަމަށް އެ ކްލަބުން ބުނެފި އެވެ.
މި ވަގުތު ކްލަބެއް ނެތި ހުރި ބޮއަޓެން ވަނީ ހުސްވި ހަފުތާގައި ބަޔާންގެ ޓްރެއިނިންތަކުގައި ބައިވެރިވެފަ އެވެ. އަދި ބަޔާންގެ ޑިފެންޑަރުންނަށް ދިމާވެފައިވާ އަނިޔާގެ މައްސަލަތަކާ ގުޅިގެން، ކުރު މުއްދަތުގެ ކޮންޓުރެކްޓެއްގައި ބަޔާން އިން ބޮއަޓެން ސޮއިކުރުވާނެ ކަމަށް ބެލެވުނެވެ.
އެކަމަކު، ބަޔާން އިން ހުކުރު ދުވަހު ބުނީ އެ ޓީމުގެ ޑިފެންޑަރުންނަށް ލިބިފައިވާ އަނިޔާގެ މައްސަލަތައް ހައްލުވެފައިވާތީ، ބޮއަޓެން އަށް ކޮންޓުރެކްޓެއް ނުދޭން ނިންމާފައިވާ ކަމަށެވެ.
"މިހާރު ޑިފެންޑަރުންގެ މައްސަލަ ހައްލުވެއްޖެ. ޑަޔޯ އުޕަމެކާނޯ އާއި މިން ޖައެ ކިމް އަށް ލިބިފައިވާ އަނިޔާގެ މައްސަލަތައް ރަނގަޅުވެއްޖެ. އަދި މެޓިއަސް ޑިލިޓްގެ އަނިޔާވެސް މިހާރު އަންނަނީ ރަނގަޅުވަމުން،" ބަޔާން އިން ނެރުނު ބަޔާނެއްގައި ބުނެފައިވެ އެވެ. "މި ހުރިހާ ކަމަކަށް ވިސްނާފައި، ބަޔާން އިން ނިންމީ ބޮއަޓެން އަށް ކޮންޓުރެކްޓެއް ނުދޭން."
ބޯޓެން 35، އަކީ 2011 އިން ފެށިގެން 2021 އާ ހަމައަށް ބަޔާންއާ އެކު ކާމިޔާބު ސީޒަންތަކެއް ހޭދަކުރި ކުޅުންތެރިއެކެވެ. އޭނާ ވަނީ އެ ކުލަބަށް 363 މެޗު ކުޅެދީ ޔޫރަޕްގެ އެންމެ ބޮޑު ފުޓްބޯޅަ މުބާރާތް ކަމަށް ޔުއެފާ ޗެމްޕިއަންސް ލީގު ދެ ފަހަރު ކާމިޔާބުކޮށްފަ އެވެ.
މީގެ ދެ އަހަރު ކުރިން، 2021 ގައި ބަޔާން ދޫކޮށްލުމަށްފަހު ބޯޓެން މިދިޔަ ދެ ސީޒަންގައި ކުޅުނީ ފްރާންސްގެ އޮލިމްޕިކް ލިޔޯން އަށެވެ. މިދިޔަ ސީޒަނަށް ފަހު އެ ކުލަބުން ބޯޓެން ދޫކޮށްލުމުން، އޭނާ ހުރީ ކުޅޭނެ ކުލަބެއް ނެތިފަ އެވެ.
