މަޖިލީހުގެ ރައީސް، މުހައްމަދު ނަޝީދުގެ އިތުބާރު ނެތްކަމުގެ މައްސަލަ އަލުން މަޖިލީހަށް ހުށަހެޅުމަށް އެމްޑިޕީން މަސައްކަތް ކުރަމުން ދާތީ އެ ޕާޓީގެ މަޖިލީހުގެ ބައެއް މެމްބަރުންނަށް ގުޅައި ނަޝީދު އިންޒާރު ދެއްވަމުން ގެންދަވާ ކަމަށް އެމްޑީޕީގެ ޕާލަމެންޓަރީ ގުރޫޕުގެ ލީޑަރު، މުހައްމަދު އަސްލަމް މިރޭ ވިދާޅުވެއްޖެ އެވެ.
އެކަމާ ގުޅޭގޮތުން "އަދަދު" އާ ވާހަކަ ދައްކަވަމުން އަސްލަމް ވިދާޅުވީ ނަޝީދު ކުރައްވަމުން އެ ގެންދަވަނީ ވަރަށް ދަށު ދަރަޖައިގެ އަމަލެއް ކަމަށާއި އެމްޑީޕީގެ ވަރަށް ގިނަ މެމްބަރުންގެ ފަރާތުން އެ ޝަކުވާ ލިބިފައިވާ ކަމަށެވެ.
"އަޅުގަނޑަށް ވަރަށް ބައިވަރު މެމްބަރުން ޝަކުވާ ހުށަހަޅަމުން އެބަދޭ ރައީސް ނަޝީދު އިންޒާރު ދީފައި މެސެޖު ކުރާ ވާހަކަ، ތިމަންނަ ގައިގައި ޖަހައިފިއްޔާ ޖަހާނަމޭ، ކޮރަޕްޝަންގެ މައްސަލަތައް ބަލާނަމޭ، މިކަހަލަ ވާހަކަތައް ލިޔުއްވާފައި،" އަސްލަމް ވިދާޅުވި އެވެ.
އޭނާ ވިދާޅުވީ މަޖިލީހުގެ ރައީސްގެ އިހުލާސްތެރިކަމެއް ކުޑަކޮށް ނަމަވެސް ހުރީވިއްޔާ އެފަދަ އިންޒާރުތައް ދެއްވުމުގެ ބަދަލުގައި، އެ މައްސަލަތައް މަގާމުން ލިބިދޭ ބާރުތަކުގެ ދަށުން ބަލާނެ ކަމަށެވެ.
"އެ މަގާމުގައި އެ ހުންނަވަނީ އެފަދަ ކަމެއް އޮތިއްޔާ ބަލަން ނޫންތޯ؟ އެފަދަ މައްސަލަތައް ނުބަލާކަށް ނޫން ދެއްތޯ މަގާމު ދީފައި އެ ހުންނަނީ،" އަސްލަމް ސުވާލު ކުރެއްވި އެވެ.
އެމްޑީޕީގެ މަޖިލިސް މެމްބަރުންނަށް އިންޒާރުދެއްވައި ރައީސް ނަޝީދު މެސެޖު ކުރައްވާ ކަމަށް އަސްލަމް ވިދާޅުވިއިރު، މިއަދު ވަނީ ނަޝީދު މަގާމުން ދުރު ކުރުމުގެ މައްސަލައިގައި އެމްޑީޕީ ޕީޖީ ގުރޫޕުގެ 45 އަށްވުރެ ގިނަ މެމްބަރުން ސޮއި ކުރައްވައިފަ އެވެ.
އެކަމާ ގުޅިގެން މަޖިލީހުގެ ވަޓްސްއެޕު ގުރޫޕަށް ނަޝީދު ކުރެއްވި މެސެޖެއްގައި ވިދާޅުވީ، އެކަކުގެ އިތުބާރު ނެތް ކަމުގެ ދެ މައްސަލަ އެއް ދައުރެއްގައި ހުށަނޭޅޭނެ ކަމަށެވެ.
"އަސްލު ދައުރެއްގައި ބަލައިގަނެވޭނީ އިތުބާރުނެތް ކަމުގެ އެއް މައްސަލަ. މި ފަހަރު މައްސަލަ ބަލައިގަންނަން ދަތިވާނެ. މި ދައުރުގައި އިތުބާރު ނެތްކަމުގެ މައްސަލަ އެޖެންޑާކޮށް އަނބުރާ ނަގައިފި. ދެން މި އަންނަ ދައުރުގައި ކަންނޭނގެ މިކަން ވާނީ،" ނަޝީދު ވިދާޅުވެފައިވެ އެވެ.
ރައްޔިތުންގެ މަޖިލީހުގެ ރައީސްގެ އިތުބާރުގެ ނެތްކަމުގެ މައްސަލައެއް ހުށަހަޅާ ނަމަ ކަންތައް ކުރަންވީ ގޮތް އެ މަޖިލީހުގެ ގަވާއިދުގެ 205 ވަނަ މާއްދާގެ ދަށުން ލިޔެފައިވާ އަށް ނުކުތާއެއްގައި ބަޔާންކޮށްފައިވާއިރު، އެއް ދައުރެއްގައި ދެ ފަހަރަށް އެފަދަ ގަރާރެއް ހުށަނޭޅޭނެ ކަމަށް ބުނެފައެއް ނެތެވެ.
އެކަން ފާހަގަކުރައްވައި އަސްލަމް ވިދާޅުވީ މަޖިލީހަށް މައްސަލަ ހުށަހެޅޭނެތޯ ނޫންތޯ ބެލުމަކީ އެއީ މަޖިލީހުގެ ރައީސް ކުރައްވަން ޖެހިވަޑައިގަންނަވާ ކަމެއް ނޫން ކަމަށާއި އެކަން ކުރުމުގެ ޒިންމާ އޮންނަނީ އަމީންއާންމަށް ކަމަށެވެ.
