މި ސަރުކާރުގެ މައްޗަށް ތުހުމަތު ކުރެވޭ ވައްކަމާއި ހިޔާނާތުގެ މައްސަލަތައް ބަލަން ދަ ޑިމޮކްރެޓްސްގެ އިސް މެމްބަރުން މިރޭ ގޮވާލާން ފަށައިފި އެވެ.
އެ ޕާޓީއަށް ނިސްބަތްވާ މެމްބަރުން އެމްޑީޕީގައި ތިއްބެވި އިރު ވެސް މި ސަރުކާރަށް ވައްކަމުގެ ތުހުމަތުތައް ދިޔައީ ކުރަމުންނެވެ.
މި ސަރުކާރުގެ ކޮރަޕްޝަންގެ މައްސަލަތައް ބަލަން ގޮވާލައި ޑިމޮކްރެޓުން މިރޭ ފުލުފުލުގައި އެކްސްގައި ޕޯސްޓް ކުރަން ފެށީ، ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ހުށަހަޅަން އެމްޑީޕީން ނިންމާފައި ވަނިކޮށެވެ.
ހެންވޭރު ހުޅަނގު ދާއިރާގެ މެމްބަރު އަދި ދަ ޑިމޮކްރެޓްސްގެ ޗެއާޕާސަން ހަސަން ލަތީފު ވިދާޅުވީ އެ ޕާޓީން އަބަދު ވަކާލާތު ކުރަމުން އައި، އެއް ކަމަކީ ވައްކަމާއި ކޮރަޕްޝަންގެ މައްސަލަތައް އިތުބާރު ހިފޭ ގޮތަކަށް ބެލުމެވެ.
"ރައީސް ސޯލިހު އާއި އެމްޑީޕީ ސަރުކާރުގެ ވައްކަމާއި ކޮރަޕްޝަންގެ މައްސަލަތައް ބަލަން ޖެހޭ،" އޭނާގެ ޕޯސްޓުގައިވެ އެވެ.
ރައްޔިތުންގެ މަޖިލީހުގެ ނައިބު ރައީސް، އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވިދާޅުވީ ޑިމޮކްރެޓުން އެމްޑީޕީން ވަކިވި މައިގަނޑު ސަބަބަކީ ރައީސް ސޯލިހު ސަރުކާރުގެ ހުއްޓުމެއް ނެތި ހިންގާ ހިޔާނާތާއި، ރިޝްވަތުގެ ނެޓްވޯކް ކަމަށެވެ. އެ ނެޓްވޯކުގައި ރައްޔިތުންގެ މަޖިލީހުގެ މެމްބަރުންނާއި ވަޒީރުންނާއި ކުންފުނިތަކުގެ މެނޭޖިން ޑިރެކްޓަރުން އަދި ރައީސް ސޯލިހާ ގާތް ބޭފުޅުން ހިމެނޭ ކަމަށް ވިދާޅުވެފައިވެ އެވެ.
"ތަހުގީގުކޮށް، ނެޓްވޯކް އިންސާފުގެ ކުރި މައްޗަށް ގެންނަން ޖެހޭ" އީވާ ގޮވާލެއްވި އެވެ.
ވަކި ކަމެއް ފާހަގަ ނުކުރުއްވައި، މެދުހެންވޭރު ދާއިރާގެ މެމްބަރު އަލީ އާޒިމް ވިދާޅުވީ ރިޔާސީ އިންތިހާބުން އެމްޑީޕީ ބަލިވުމުން، "ބަލި ގަބޫލު ނުކުރެވިގެން ތެޅިގަތުން އެހާ ބުއްދިވެރިއެއް ނުވާނެ" ކަމަށެވެ.
އެ އިޝާރާތް ކުރަނީ ބެލެވޭ ގޮތުގައި ނަޝީދުގެ އިތުބާރު ނެތްކަމުގެ މައްސަލަ އަށެވެ.
"ދަ ޑިމޮކްރެޓްސް އަވަސްވެ މި ގަންނަނީ ނިމި މިދާ ސަރުކާރުގެ ކޮރަޕްޝަންގެ މައްސަލަތައް ބެލުމަށް ކަމާ ގުޅޭ އިދާރާތަކުގައި އެދުމަށް،" އާޒިމް ވިދާޅުވެފައިވެ އެވެ.
ދަ ޑިމޮކްރެޓްސްގެ އެހެން ބޭފުޅުން ވެސް ވަނީ މި ސަރުކާރުގެ ހިޔާނާތާއި ވައްކަމުގެ މައްސަލަތައް ބަލަން ގޮވާލައިފަ އެވެ.
އިތުބާރު ނެތްކަމުގެ މައްސަލައާ ގުޅޭ ގޮތުން ނަޝީދު އަދި ރައްދެއް ނުދެއްވަ އެވެ. އެ މައްސަލަ ރައްޔިތުންގެ މަޖިލީހަށް ހުށަހަޅަން ބޭނުންވާ ގާނޫނީ އަދަދަށް ވުރެ ވެސް އިތުރަށް މެމްބަރުން މިހާރު ސޮއި ކުރައްވާފައިވާކަން ވަނީ އެނގިފަ އެވެ.
