ސްޕެއިންގެ ބޮޑުވަޒީރު ޕެޑްރޯ ސަންޗޭޒްގެ އަނބިކަނބަލުން ބެގޯނިއާ ގޯމޭޒްގެ މައްޗަށް ކުރެވޭ ކޮރަޕްޝަންގެ ތުހުމަތުތަކާ ގުޅިގެން ޝަރީއަތް ކުރިއަށް ގެންދިއުމަށާއި، އޭނާ ގައުމުން ބޭރަށް ފުރުން މަނާކުރުމަށް އެ ގައުމުގެ ފަނޑިޔާރަކު ހޮނިހިރު ދުވަހު އަމުރުކުރައްވައިފި އެވެ.
ބެގޯނިއާ ގޯމޭޒްގެ މައްޗަށް ތަހުގީގު ހިންގަމުންދަނީ ބޮޑުވަޒީރުގެ އަނބިކަނބަލުންގެ ހައިސިއްޔަތާއި ނުފޫޒު ބޭނުންކުރައްވައިގެން މަސައްކަތުގެ ކޮންޓްރެކްޓްތައް ހޯއްދެވި ކަމަށް ބުނާ މައްސަލަތަކެއްގަ އެވެ. ނަމަވެސް، ގޯމޭޒް ވަނީ އެއްވެސް ގޯސް ކަމެއް ކުރައްވާފައި ނުވާނެ ކަމަށް ވިދާޅުވެ އެ ތުހުމަތުތަކަށް އިންކާރު ކުރައްވާފަ އެވެ. މި މައްސަލަ ކޯޓަށް ހުށަހަޅާފައިވަނީ އެ ގައުމުގެ ކަނާތު ފިޔައިގެ ގްރޫޕްތަކުންނެވެ.
މި މައްސަލަ ބެއްލެވި ނޑިޔާރު ހުއާން ކާލޯސް ޕެއިނާޑޯ ވަނީ ގޯމޭޒްގެ ޕާސްޕޯޓް ހަވާލުކުރުމަށް އަމުރުކުރައްވައި، ސްޕެއިންއިން ބޭރަށް ފުރުން މަނާކުރައްވާފަ އެވެ. މީގެ އިތުރުން، ކޮންމެ މަހަކު ދެ ފަހަރު ކޯޓަށް ހާޒިރުވެ ރިޕޯޓް ކުރުމަށް ވެސް ފަނޑިޔާރު ވަނީ އަމުރުކުރައްވާފަ އެވެ.
ޔޫރަޕްގައި މިހާރު ތިއްބެވި މަދު ވައަތު ފިޔައިގެ ލީޑަރުންގެ ތެރޭގައި ހިމެނިވަޑައިގަންނަވާ ބޮޑު ވަޒީރު ސަންޗޭޒްގެ ސަރުކާރަށް، ކޮރަޕްޝަންގެ މިފަދަ މައްސަލަތަކުގެ ސަބަބުން ވަނީ ބޮޑެތި ގޮންޖެހުންތަކެއް ކުރިމަތިވެފަ އެވެ. މީގެ ތެރެއިން ބައެއް މައްސަލަތަކުގެ ޝަރީއަތް ފެށުމާ ގާތްވެފައިވާއިރު، އަނެއް ބައި މައްސަލަތަކުގެ ޝަރީއަތްތައް މިހާރު ވެސް ދަނީ ހިނގަމުންނެވެ. އެއްވެސް މައްސަލައެއްގައި ސަންޗޭޒްގެ ނަން ހިމެނިފައި ނުވާއިރު، އޭނާ ވިދާޅުވަނީ މިއީ އޭނާ މަގާމުން ދުރުކުރުމަށް ހިންގާ ސިޔާސީ ކެމްޕޭނެއްގެ ބައެއް ކަމަށެވެ.
ސަންޗޭޒްގެ އަރިސް ބައެއް ބޭފުޅުންގެ މައްޗަށް ވެސް މިހާރު ދަނީ ތަހުގީގުތައް ހިންގަމުންނެވެ. އޭގެ ތެރޭގައި ސޯޝަލިސްޓް ޕާޓީގެ ތިންވަނައަށް އެންމެ އިސްވެރިޔާ އާއި ސަންޗޭޒް ސަރުކާރުގެ ކުރީގެ ޓްރާންސްޕޯޓް މިނިސްޓަރު ހިމެނިވަޑައިގަންނަވަ އެވެ. އެ ބޭފުޅުންގެ މައްޗަށް ތުހުމަތު ކުރެވެނީ ސަރުކާރުގެ މަޝްރޫއުތަކާއި، ތެލާއި ގޭހުގެ ކޮންޓްރެކްޓްތަކުގެ އިތުރުން ކޮވިޑް-19 ގެ ބަލިމަޑުކަމުގެ ތެރޭގައި މާސްކް ހޯދުމުގެ މުއާމަލާތްތަކުން ރިޝްވަތު ނެންގެވި ކަމަށެވެ. ނަމަވެސް އެ ބޭފުޅުން ވެސް ވަނީ އެ ތުހުމަތުތަކަށް އިންކާރު ކުރައްވާފަ އެވެ.
މީގެ އިތުރުން، ސްޕެއިންގެ ހައިކޯޓުން ބުނެފައިވަނީ އެ ގައުމުގެ ކުރީގެ ބޮޑުވަޒީރު ހޯސޭ ލުއިސް ރޮޑްރިގޭޒް ޒަޕަޓޭރޯގެ މައްސަލައެއް ވެސް ބަލަމުންދާ ކަމަށެވެ. އޭނާގެ މައްޗަށް ކުރެވެނީ "ޕްލަސް އަލްޓްރާ" އެއާލައިން ފަދަ ތިންވަނަ ފަރާތްތަކުގެ މަންފާއަށްޓަކައި ދައުލަތުގެ އިދާރާތަކަށް ނުފޫޒު ފޯރުވައިގެން މާލީ ފައިދާ ހޯދާ ނެޓްވޯކެއް ހިންގެވި ކަމުގެ ތުހުމަތެވެ. ޒަޕަޓޭރޯ ވެސް ވަނީ މި ތުހުމަތުތައް ދޮގުކުރައްވާފަ އެވެ.
