ރައްޔިތުންގެ މަޖިލީހުގެ ރިޔާސަތު އެމްޑީޕީއަށް ހޯދުމަށްޓަކައި، މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލަ ހުށަހަޅަން ނިންމައި، ސޮއި ހަމަކޮށްފި އެވެ.
މިދިޔަ ހޮނިހިރު ދުވަހު ބޭއްވި ރިޔާސީ އިންތިހާބު އެމްޑީޕީއަށް ގެއްލިގެން ދިޔުމަށް ފަހު، ބޭއްވި އެ ޕާޓީގެ ގައުމީ މަޖިލީހުގެ ފުރަތަމަ ބައްދަލުވުމުގައި މަޖިލީހުގެ ރިޔާސަތު އެމްޑީޕީ އަށް މި ދަނޑިވަޅުގައި އޮތުން މުހިންމުކަން ފާހަގަ ކުރެއްވެވި އެވެ.
އެމްޑީޕީއަށް ނިސްބަތްވާ މަޖިލީހުގެ މެމްބަރަކު މިރޭ "އަދަދު" ނޫހަށް ވިދާޅުވީ ނަޝީދުގެ އިތުބާރު ނެތްކަމުގެ މައްސަލަ ހުށަހެޅުމުގެ މައިގަނޑު ސަބަބަކީ، މަޖިލީހުގެ މެޖޯރިޓީ ޕާޓީއަކީ އެމްޑީޕީއަށް ވެފައި، މަޖިލީހުގެ ރައީސްކަމުގެ މަގާމަކީ އެ ޕާޓީގެ މެމްބަރަކަށް ވުން މުހިންމު ވާތީ ކަމަށެވެ.
"މިހާރުގެ ރިޔާސަތުން މި ވަގުތަށް މުހިންމު ނޫން އެތައް ކަމެއް ކޮށް މަޖިލީހުގެ ވަގުތު ބޭކާރު ކުރާތީ. ސަރުކާރުން ވަނީ މިހާރު ވެސް މުހިންމު ގިނަ ބިލްތަކެއް މި ދައުރަށް ވެސް ހުށަހަޅާފައި،" އެ މެމްބަރު ވިދާޅުވި އެވެ.
އަދަދު ނޫހަށް އެނގިފައިވާ ގޮތުގައި އިތުބާރު ނެތްކަމުގެ މައްސަލަ ހުށަހެޅޭ މިންވަރަށް މިހާރު ވަނީ ސޮއި ހަމަކޮށްފަ އެވެ.
މަޖިލީހުގެ ރައީސް ނުވަތަ ނައިބު ރައީސްގެ މަގާމުގައި ހުންނަވާ ބޭފުޅަކު އެ މަގާމުން ވަކިކުރަން ހުށަހެޅޭނީ މަޖިލިހުގެ ޖުމުލަ މެމްބަރުންގެ ހަތަރުބައިކުޅަ އެއްބަޔަށް ވުރެ މަދު ނޫން އަދަދެއްގެ މެމްބަރުންގެ ސޮޔާއެކު ހުށަހަޅާ ގަރާރަކުންނެވެ. އެއީ މިހާރު ތިއްބެވި 87 މެންބަރުންގެ ތެރެއިން 22 މެމްބަރުންގެ ސޮޔެވެ.
އެމްޑީޕީއަށް ނިސްބަތްވާ 55 މެމްބަރުން މަޖިލީހުގައި އެބަ ތިއްބެވެ.
ނަޝީދުގެ އިތުބާރު ނެތްކަމަށް ޖޫން މަހު ވެސް ހުށަހެޅި އެވެ. މަޖިލީހުގެ ނައިބު ރައީސް އީވާ އަބްދުﷲ ގެ އިތުބާރު ނެތް ކަމަށް ވެސް ހުށަހެޅި އެވެ. އެ މައްސަލައިގެ ފަހުން މަޖިލީހުގެ ޖަލްސާތައް ކުރިއަށް ގެންދިޔުން ހުއްޓިފައި އޮތުމަށް ފަހު، މައްސަލަތައް އެމްޑީޕީން ނެގީ ސެޕްޓެމްބަރު 9 ގައި ބޭއްވި ރިޔާސީ އިންތިހާބުގެ ފުރަތަމަށް ބުރަށް ފަހު އެވެ.
ނަޝީދު މަޖިލީހުގެ ރައީސް ކަމަށް ހޮވިވަޑައިގެންނެވިއިރު، އެ މަނިކުފާނަކީ އެމްޑީޕީގެ މެމްބަރެކެވެ. ނަމަވެސް، އެމްޑީޕީގެ ރިޔާސީ ޕްރައިމަރީ އަށް ފަހު، ދަ ޑިމޮކްރެޓްސް އުފެއްދުމަށް ފަހު، އެ މަނިކުފާނު ވަނީ އެ ޕާޓީއާ ގުޅިވަޑައިގެންފަ އެވެ.
ދަ ޑިމޮކްރެޓްސް އުފެއްދުމަށްޓަކައި އެމްޑީޕީ ދޫކޮށް 13 މެމްބަރު ދިޔަ އެވެ. އެ ޕާޓީ އުފައްދާކަން އިއުލާނުކުރީ މެދުހެންވޭރު ދާއިރާގެ މެމްބަރު އަލީ އާޒިމް ޕާޓީން ވަކިކުރުމާ އެކު އެވެ.
