މަޖިލީހުގައި މިއަދު ބާއްވަން އެޖެންޑާކުރި ޖަލްސާ އަށް ކޯރަމް ހަމަވާ ވަރަށް މެމްބަރުން ވަޑައިނުގެންނެވުމުން ޖަލްސާ ބޭއްވޭ ގޮތެއް ނުވި އެވެ.
އާދައިގެ މަތިން ހެނދުނު 9:00 ގައި ފަށަން އެޖެންޑާކޮށްފައި އޮތް ޖަލްސާ ފަށާ ގަޑި ޖެހުނުއިރު މެމްބަރުން ވަޑައިނުގަނެންނެވި ނަމަވެސް މަޖިލީހުގެ ރައީސް މުހައްމަދު ނަޝީދު ވަޑައިގެން ރިޔާސަތުގެ މޭޒުގައި އިންނެވި އެވެ. އަދި އެ މަންޒަރު މަޖިލީހުގެ ޗެނަލްތަކުން އެ މަންޒަރު ވަގުތުން ދުރަށް ދައްކަން ވެސް ފެށި އެވެ.
ނަޝީދު ވިދާޅުވި ގޮތުގައި މިއަދުގެ ޖަލްސާ ފަށާ ގަޑި ޖެހުނު އިރު ތަޅުމުގައި ވަޑައިގެން ތިއްބެވީ އެންމެ 15 މެމްބަރުން ކަމަށެވެ. މަޖިލީހުގައި ޖުމްލަ 87 މެމްބަރުން ތިއްބަވަ އެވެ.
"ކޯރަމްގެ ރަނގަބީލު ޖެހުމަށް ފަހުގައި ބަލަން ޖެހޭ ވަގުތަށް ވެސް ބަލައި ނިމިއްޖެ. އިއްޒަތްތެރި މެމްބަރުން މަޖިލީހަކަށް ވަޑައެއް ނުގަންނަވާ. އަަޅުގަނޑަށް މަޖުބޫރުވެ މިދަނީ މިއަދުގެ މަޖިލިސް ބައްދަލުވުން ނޯންނާނެ ކަމަށް އަންގައި އިއުލާނުކުރުން،" ނަޝީދު ވިދާޅުވި އެވެ.
ޖަލްސާގެ އެޖެންޑާގައި އެ މައްސަލައިގެ އިތުރުން މަޖިލީހުގެ މެމްބަރުން އިތުރުވުން ހިފެހެއްޓުމަށް ހުޅުދޫ ދާއިރާގެ މެ،ްބަރު އިލްޔާސް ލަބީބު ހުށަހެޅުއްވި ބިލާއި، ޖުޑީޝަލް ސާވިސް ކޮމިޝަންގެ އެކުލެވުން ބަދަލުކުރުމަށް އެމްޑީޕީގެ ޕާލިމެންޓްރީ ގްރޫޕްގެ ލީޑަރު މުހައްމަދު އަސްލަމް ހުށަހެޅުއްވި ބިލު ވެސް ހިމެނެ އެވެ.
ވެރިކަމުގެ ނިޒާމު ބަދަލުކުރުމާ ގުޅޭ ގޮތުން ފެންނަ ނުފެންނަ ވޯޓެއް މި މަހުގެ 30، ގެ ކުރިން ނެގުމަށް މަޖިލީހުން ގަރާރެއް ފާސްކުރި ނަމަވެސް އެ ވޯޓުގެ ކަރުދާހުގައި ބަޔާން ކުރަންވީ ސުވާލާއި، ނިޒާމުތަކުގެ އޮނިގަނޑާއި، ހޭލުންތެރިކުރުމުގެ ޕްރޮގްރާމް ބައްޓަންކުރަންވީ ގޮތާ ގުޅޭ މައުލޫމާތުތައް ދިނުމަށް އީސީން މަޖިލީހުގައި އެދިފައިވެ އެވެ.
މަޖިލީހުގައި މިދިޔަ ހަފުތާގައި ބާއްވަން އުޅުނު ޖަލްސާއަކަށް ވެސް މެމްބަރުން ވަޑައިނުގެންނެވުމުން ކެންސަލް ކުރަން ޖެހުނެވެ. ރިޔާސަތުން ނަޝީދު އެ ދުވަހު އިއުލާނުކުރެއްވީ ޖަލްސާއެއް ބޭއްވޭތޯ އެމްޑީޕީއާ މަޝްވަރާކުރައްވާނެ ކަަމަށެވެ.
