ބިންވެރިޔާ ސްކީމުގެ ދަށުން މާލޭ ރައްޔިތުންނަށް ދޫކުރި ގޯތީގެ ރަޖިސްޓްރީ ހަވާލުކުރުން ދެން ކުރިއަށް ދާނީ ކުރީގެ ސީއެޗްއެސްއީ އިމަރާތުގައި ކަމަށް ހައުސިން މިނިސްޓްރީން ބުނެފި އެވެ.
މިރޭ ހައުސިން މިނިސްޓްރީން ކުރި އިއުލާނެއްގައި ބުނީ އަންނަ އަންގާރަ ދުވަހުން ފެށިގެން ގޯތީގެ ރަޖިސްޓްރީ ދޫކުރުން ކުރިއަށް ގެންދިއުމަށް ހަމަޖެހިފައި ވަނީ ކުރީގެ ސީއެޗްއެސްއީ އިމާރާތުގައި ކަމަށެވެ. މިހާތަނަށް ރަޖިސްޓްރީ ހަވާލުކުރުން ކުރިއަށް ދިޔައީ ހުޅުމާލޭ ސިންތަޓިކް ޓްރެކުގަ އެވެ.
ބިންވެރިޔާ ސްކީމުގެ ދަށުން ގޯއްޗަށް އެދި ހުށަހެޅި 97 ޕަސެންޓު މީހުންނަށް ގޯތި ދިނުމަށް ސަރުކާރުން ވަނީ ނިންމާފަ އެވެ. އެއީ 18،955 މީހުންނަށް 9003 ގޯއްޗެވެ.
ގޯތި ދެނީ ހުޅުމާލެއާއިި ގުޅީފަޅާއި ގިރާވަރުފަޅުންނެވެ. ގެދޮރުވެރިޔާ ސްކީމުން ހުޅުމާލޭން 1351 ގޯތި، ގުޅިފަޅުން 2219 އަދި ގިރާވަރު ފަޅު ހިއްކައިގެން 5433 ދިނުމަށް ނިންމާފައި ވެއެވެ.
މާލޭ ރައްޔިތުންނަށް ގޯތި ދިނުމަށް ސަރުކާރުން ހިންގާ 'ބިންވެރިޔާ' ސްކީމުގެ ދަށުން މާލެ ސަރަހައްދުން ގޯތި ލިބުނު ފަރާތްތަކަށް ގޯތީގެ ރަޖިސްޓްރީ ހަވާލުކުރަން ފެށީ މިދިޔަ އޮގަސްޓް 27 ވަނަ ދުވަހު އެވެ.
