ރައްޔިތުންގެ މަޖިލީހުގެ ރައީސް އަދި އެމްޑީޕީގެ ކުރީ ރައީސް މުހައްމަދު ނަޝީދު އެނބުރި އެޕާޓީއަށް ވަޑައިގަންނަަވަން ތައްޔާރަށް ހުުންނެވިކަން އެޕާޓީގެ ޗެއާޕާސަން ފައްޔާޒް އިސްމާއީލަށް އަންގަވާފައިވާ ކަން އެނގިއްޖެ އެވެ.
އިތުބާރުހުރި މަސްދަރަކުން "އަދަދު" އަށް އެނގިފައިވާ ގޮތުގައި އެމްޑީޕީގެ ގައުމީ މަޖިލީހުގެ 50 ޕަސެންޓް މެމްބަރުން އެދިވަޑައިގަންނަވާ ނަމަ އެޕާޓީއަށް އެނބުރި ވަޑައިގަންނަވަން ތައްޔާރަށް ހުުންނެވި ކަމަށް ވިދާޅުވެ ނަޝީދު ވަނީ އެމްޑީޕީއަށް އަންގަވާފަ އެވެ.
ނަޝީދު އެމްޑީޕީން ވަކިވެވަޑައިގެންނެވީ އެޕާޓީން މިދިޔަ ޖެނުއަރީ މަހު ބޭއްވި ރިޔާސީ ޕްރައިމަރީ ނާކާމިޔާބުވެވަޑައިގެންނެވުމުން އުފެދުނު ދެބަސްވުމުގަ އެވެ. "ފިކުރެއްގެ ދިރުން" ނަމުގައި އެެމަނިކުފާނު އޭރު އުފެއްދެވި ފެކްޝަނުން ފަހުން ޕާޓީއެއް އުފެއްދެވި އެވެ.
ދަ ޑިމޮކްރެޓްސްގެ ނަމުގައި އުފެއްދި އެ ޕާޓީގެ ފަރާތުން ރިޔާސީ އިންތިހާބަށް ނެރުނު ކެންޑިޑޭޓް އިލްޔާސް ލަބީބަށް އިންތިހާބުގެ ދެވަނަ ބުރަށް ވަޑައެއް ނުގެންނެވުނެވެ. އިންތިހާބުގެ ދެވަނަ ބުރުގައި އޭނާއަށް ލިބިވަޑައިގެންނެވީ ތިން ވަނަ އެވެ. އެއީ ވޯޓުގެ ހަތް ޕަސެންޓެވެ.
އިންތިހާބުގެ ދެވަނަ ބުރުގައި ނަޝީދާއި ދަ ޑިމޮކްރެޓްސްގެ ތާއީދޫ ހޯދަން އެމްޑީޕީން މަސައްކަތް ކުރި ނަމަވެސް އެކަން ކާމިޔާބު ނުވެ އެމްޑީޕީއަށް ވީ ނާކާމިޔާބެވެ.
