ނޭޕްލްސް، އިޓަލީ (ސެޕްޓެމްބަރު 29) - ނައިޖީރިއާ އަށް އުފަން، ފޯވާޑް ވިކްޓަ އޮސީމެން އަށް ރައްދުވާ ގޮތަށް އޭނާ ކުޅެމުން އަންނަ ކްލަބް، ނަޕޯލީން ޓިކްޓޮކަށް ލި ވީޑިއޯއެއްގެ މައްސަލަ ހޫނުވެއްޖެ އެވެ.
ނަޕޯލީގެ ރަސްމީ ޓިކްޓޮކް އެކައުންޓްގައި ހިމެނި ވީޑިއޯއެއްގައި ހިމަނާފައިވަނީ އިޓާލިއަން ލީގުގައި ބޮލޯނިއާއާ ދެކޮޅަށް ނަޕޯލީ ކުޅުނު މެޗުގައި އޮސީމެން އަތުން ޕެނަލްޓީ ނާކާމިޔާބުވި މަންޒަރެވެ. އެ ވީޑިއޯގެ އޯޑިއޯގައި އޮސީމެން، އޭނާ އަށް ޕެނަލްޓީ ޖަހަން ދިނުމަށް ޓީމުގެ ކުޅުންތެރިން ގާތުގައި ބުނާ އަޑު ސާފުކޮށް އިވެ އެވެ. މި މައްސަލައިގައި ނަޕޯލީ އަށް އެކި ފަރާތްތަކުގެ ފާޑުކިޔުން އަމަޒުވުމާއި، އިޓަލީ މީޑިއާގެ ސަމާލުކަން ހުއްޓުމާ އެކު، ނަޕޯލީން ވަނީ ވީޑިއޯ ޓިކްޓޮކުން ނަގައިފަ އެެވެ.
ޓިކްޓޮކުން އެ ވީޑިއޯ ފޮހެލި ކަމުގައި ވިޔަސް، އޮސީމެން، 24، ގެ އޭޖެންޓް މި މައްސަލައިގައި ގާނޫނީ ފިޔަވަޅު އަޅާނެ ކަމަށް ބުނެފައިވާއިރު، ނަޕޯލީން ވަނީ ކަން ހިނގައިދިޔަ ގޮތް މީޑިއާގައި ސާފުކޮށްދީފަ އެވެ.
މި މައްސަލަ ހިނގައިދިޔަ ގޮތް އޮޅުންފިލުވައިދިނުމުގެ ގޮތުން، ނަޕޯލީން ވަނީ ބަޔާނެއް ނެރެފަ އެވެ.
ނަޕޯލީން ބުނީ ވީޑިއޯ ނެރުނު މަގުސަދަކީ އެއްވެސް ފަރާތެއް ބަދުނާމުވާ ފަދަ ކަމެއް ކުރުމުގެ ގޮތުން ނޫން ކަމަށެވެ. އެއީ އުފެއްދުންތެރި ގޮތެއްގައި ކްލަބްގެ ކަންކަން ޒަމާނީ ގޮތްތަކަށް އެކި ޕްލެޓްފޯމްތަކުގައި ގެެނެސްދިނުމުގެ ވިސްނުމުގައި ކުރި ކަމެއް ކަމަށް ނަޕޯލީން ވަނީ ބުނެފަ އެވެ.
ސީޒަނުގެ މިހާތަނަށް ނަޕޯލީ އަށް ކުޅެދިން ހަ މެޗުން ތިން ލަނޑު ޖަހާފައިވާ އޮސީމެން، އަކީ މިދިޔަ ސީޒަނުގައި އިޓާލިއަން ލީގުގެ ޗެމްޕިއަންކަން ނަޕޯލީން ހޯދިއިރު، ޓީމުގެ އެންމެ މުހިންމު ކުޅުންތެރިޔާ އެވެ.
އެކަމަކު، މި ވީޑިއޯގެ މައްސަލައިގައި އޮސީމެން ނަޕޯލީ ދޫކޮށްލަން އުޅޭ ކަމުގެ ވާހަކަތައް މީޑިއާގައި އަންނަނީ ދެކެވެމުންނެވެ. އެ ގޮތުން ޖެނުއަރީ ޓްރާންސްފާގައި އޮސީމެން ހޯދަން އިނގިރޭސި ޕްރިމިއާ ލީގުގެ ތިން ކްލަބަކުން އޮފާ ލިބިފައިވާ ކަމަށް މީޑިއާގައި ވަނީ ވާހަކަ ދެކެވިފަ އެވެ. އޭގެ ތެރޭގައި ޗެލްސީ އާއި މެންޗެސްޓާ ޔުނައިޓެޑް ހިމެނެ އެވެ.
