ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒުގެ ދޮންމަންމަ، އަވަށްޓެރި ސްރީލަންކާއަށް އުފަން، ޖީ ސްކީލާން ހުސެއިން ރާއްޖޭގެ އިމިގްރޭޝަންގެ ބްލެކްލިސްޓުން ނަގައި، ރާއްޖެ އެތެރެވުން ހުއްދަކޮށްފި އެވެ.
މުއިއްޒުގެ ބައްޕަ، ޝެއިޚް ހުސައިން އަބްދުއްރަހުމާން 2015 ވަނަ އަހަރު އަވަހާރަ ވުމަށް ފަހު، ހުވަފަތް އަނބިކަނބަލުން ސްކީލާން ރާއްޖެ ދޫކޮށް ދާންޖެހުނު ގޮތާއި އޭނާ ބްލެކްލިސްޓްކުރި ގޮތް، ހެއްކާއި، އިންޓަވިއުއާއެކު އަދަދު ނޫހުން ރިލީޒުކުރި ތަހުގީގީ ޑޮކިއުމެންޓަރީގައި ގެނެސްދީފައިވެ އެވެ.
އިމިގްރޭޝަންގެ ގާނޫނާ ހިލާފަށް ސްކީލާން ބްލެކްލިސްޓްކުރީ، އިންސާނީ ވަގުފާރީގެ ތުހުމަތުގައި 2016 ވަނަ އަހަރު އެވެ.
ޝެއިޚް ހުސައިން އަވަހާރަވުމުން، ސްކީލާން ރާއްޖޭން ފުރީ ޖެނުއަރީ 12، 2016 ގަ އެވެ. އެނބުރި ރާއްޖެ އައީ މާޗް 4، 2016 ގަ އެވެ. އޭގެ ދެ ދުވަސް ކުރިން މާޗް 2، 2016 ގައި އޭނާ ބްލެކްލިސްޓްކޮށްފައި އޮތުމުގެ ސަބަބުން، ރާއްޖެއަށް އެތެރެ ނުވެވި އެނބުރި ދާންޖެހުނީ ސްރީ ލަންކާއަށެވެ.
ބްލެކްލިސްޓު ކުރި ކަމުގެ ތުހުމަތު އޭނާ އަޅުވަނީ ދޮންދަރި މުއިއްޒު އަށެވެ. އެކަމަށް މިހާތަނަށް ވެސް މުއިއްޒު ރައްދެއް ނުދެއްވަ އެވެ. ނަމަވެސް، މުއިއްޒުގެ އަނބިކަނބަލުން ސާޖިދާ މުހައްމަދު ވިދާޅުވީ ސްކީލާން ރާއްޖެއަށް އެތެރެނުވެވުނީ ވިސާ ކެންސަލްވެފައި އޮތުމުން ކަމަށެވެ.
އަދަދުގެ ތަހުގީގުން އެނގިފައިވާ ގޮތުގައި ސްކީލާން ރާއްޖެ އެތެރެވާން އުޅުނީ ޓޫރިސްޓު ވިސާގަ އެވެ. ނަމަވެސް އެތެރެ ނުވެވުނީ ބްލެކްލިސްޓުކޮށްފައި އޮތުމުންނެވެ.
ސްކީލާން ބުނި ގޮތުގައި އޭނާ ބްލެކްލިސްޓުކުރީ ކީއްވެގެންކަން އަންގާފައެއް ނެތެވެ. އެ މައްސަލަ ސާފުކުރުމަށާއި ބްލެކްލިސްޓުން ނަން ނަގައި ދިނުމަށް އެދި ސަރުކާރުގެ މުއައްސަސާތަކަށް ހުށަހެޅި އެވެ. ނަމަވެސް އެކަން އޮތީ ހައްލުނުކޮށެވެ.
އަދަދުން ގެނެސްދިން ޑޮކިއުމެންޓަރީއަށް ފަހު ބްލެކްލިސްޓުން ނަން ނަގައިދިނުމަށް އެދި ސްކީލާން އަލުން ސިޓީ ފޮނުވި އެވެ. އަދި މިހާރު އޭނާގެ ނަން ބްލެކްލިސްޓްގައި ނެތްކަން އަދަދު އަށް ވަނީ ކަށަވަރުވެފަ އެވެ. އެހެންވުމާއެކު މިހާރު އޭނާ އަށް ރާއްޖެ އެތެރެވެވޭނެ އެވެ.
މިކަމާ ގުޅޭ ގޮތުން އިމިގްރޭޝަންގެ ރަސްމީ ބަހެއް އަދި ނުލިބެ އެވެ.
އިންސާނީ ވަގުފާރީގެ ތުހުމަތުކޮށް، ގާނޫނާ ހިލާފަށް ސްކީލާން ބްލެކްލިސްޓުކުރިއިރު، އޭނާގެ މައްޗަށް ކުރި އެ ތުހުމަތާ ގުޅޭ އެއްވެސް ތަހުގީގެއް ޕޮލިހުން އަދި އިމިގްރޭޝަނުން ހިންގާފައެއް ނެތެވެ.
އިމިގްރޭޝަންގެ ސިސްޓަމުން ފެންނަން އޮތީ އެ މައްސަލައާ ގުޅޭ މެމޯ ނަންބަރަކާއި މީޓިން ބޭއްވި ނަންބަރެކެވެ. މައްސަލައާ ގުޅޭ އެއްވެސް ލިޔުމެއް އުފައްދައި، ފައިލްކޮށްފައި ވެސް ނެތެވެ. ޔައުމިއްޔާ އެއްވެސް ނެތެވެ.
