އުމުރުން 65 އަހަރުން މަތީގެ މީހުންނަށް ދެމުން އަންނަ އިނާޔަތް ބޮޑުކުރަން ވެވަޑައިގެންނެވި ވައުދަށް ރަނގަޅު ތަރުހީބެއް ލިބެމުންދާ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
މިދިޔަ ބުރާސްފަތި ދުވަހުގެ ރޭ މާލޭގައި ބޭއްވި ކެމްޕެއިން ޖަލްސާއެއްގައި އެމަނިކުފާނު ވަނީ އުމުރުން ދުވަސްވީ މީހުންނަށް ދެމުން އަންނަ 5000ރ. ގެ އިނާޔަތް 7000ރ. އަށް ބޮޑަކުރައްވާނެ ކަމަށް ވިދާޅުވެފަ އެވެ.
މިއަދު ހަވީރު ރިޔާސީ އިންތިހާބުގެ ދެވަނަ ބުރުގެ ކެމްޕެއިނަށް މާލޭގައި ބޭއްވި ދޮރުން ދޮރަށް ހިނގުމުގެ ހަރަކާތް ނިންމަވާލެއްވުމަށްފަހު މީޑިއާ ވާހަކަ ދައްކަވަމުން ރައީސް ވިދާޅުވީ، އެ ސިޔާސަތު އާންމުން ބަލައިގަންނަ ކަމަށާއި ތަރުހީބު ރަނގަޅު ކަމަށެވެ.
"އަޅުގަނޑު ހިތުން އެކަމަށް ރަނގަޅު ރެސްޕޮންސެއް އެބަ ލިބޭ. މީހުންނަށް ގަބޫލުކުރެވޭ ކަހަލަ ކަންތައްތަކަށް އެބަވޭ އެބަ،" ރައީސް ވިދާޅުވި އެވެ.
އުމުރުން ދުވަސްވީ މީހުންނަށް މިހާރު ދެމުން އަންނަ 5000ރ. ގެ އެލަވަންސް މުތާލިއާ ކުރައްވަމުން އަންނަ ކަމަށާއި އެ އެލަވަންސަށް ހެޔޮ ބަދަލެއް ގެންނަވާނެ ކަމަށް ރައީސް އެންމެ ފުރަތަމަަ ވިދާޅުވީ މިދިޔަ ޖޫން މަހުގެ ތެރޭގައި އައްޑުއަށް ކުރެއްވި ދަތުރުފުޅުގަ އެވެ.
އުމުރުން ދުވަސްވީ މީހުންނަށް އިނާތެއް ދޭން ފުރަތަމަ ފެށީ އެމްޑީޕީގެ ފުރަތަމަ ސަރުކާރުގައި ރައީސް މުހައްމަދު ނަޝީދުގެ ވެރިކަމުގަ އެވެ. އޭރު ދިނީ 2،000ރ. އެވެ. އޭގެ ފަހުން ކުރީގެ ރައީސް އަބްދުﷲ ޔާމީނުގެ ވެރިކަމުގައި އެ އިނާޔަތް 5،000ރ. ބޮޑުކުރި އެވެ.
