މާލެ ސަރަހައްުދުގެ ބޯހިޔަވަހިކަމަށް ހައްލެއް ހޯދައިދިނުމަށް މި ސަރުކާރުން ގެންގުޅޭ ސިޔާސަތުގެ ދަށުން އިތުރު ގޯއްޗާއި ފުލެޓު ދޫކުރަން ހުޅުވައިލަން ނިންމާފައިވާ ކަމަށް ހައުސިން މިނިސްޓަރީގެ ސްޓޭޓު މިނިސްޓަރު، އަކްރަމް ކަމާލުއްދީން ވިދާޅުަވެއްޖެ އެވެ.
އަކްރަމް މިއަދު "އަދަދު" އަށް މިއަދު ވިދާޅުވީ މާލެ ސަރަހައްދުން އިތުރު 6000 ފުލެޓާއި 4500 އަށްވުރެ ގޯތި ދޫކުރުމަށް މާދަމާގެ ކުރިން ހުޅުވައިލާނެ ކަމަށެވެ.
"މާދަމާގެ ކުރިން އަޅުގަނޑުމެން އިއުލާނު ކުރާނަން އެކަމާ ގުޅޭ ހުރިހާ މައުލޫމާތެއް، އެއީ މާލެއާ ބުރިޖުން ގުޅާލާނެ ސަރަހައްދެއް،" އޭނާ ވިދާޅުވި އެވެ.
އަކްރަމް ވިދާޅުވީ މިފަހަރު ދޫކުރާ ގޯއްޗަށް އެދި ހުށަހެޅުމުގެ ފުރުސަތު ހުޅުވައިލާއިރު، ބިންވެރިޔާ ސްކީމުގެ ދަށުން ގޯއްޗަށް އެދި ހުށަހެޅުމަށް ކަނޑައެޅި ޝަރުތުތަކަށް ރައްޔިތުންގެ ފަރާތުން ލިބުނު ޝަކުވާތަކަށް ބެލުމަށްފަހު މިފަހަރު އާންމުކުރާ އުސޫލުގައި ހައްލުތަކެއް ހޯދައިދީފައި ވާނެ ކަމަށެވެ.
މި ސަރުކާރުގެ ބޯހިޔާވަހިކަމުގެ މަޝްރޫއުގެ ދަށުން އެންމެ ފުރަތަމަ އިއުލާނު ކުރި ގޯތިތައް މިހާރު ވަނީ ލިބޭނެ ހައްގުވެރިން ކަނޑައަޅައި ލިބޭނެ ތަންތަން ވެސް ގުރުއަތުން ހޮވައިފަ އެވެ. މިހާރު ކުރިއަށް ދަނީ ގޯތި ލިބުނު މީހުންނަށް އެތަންތަން ހަވާލު ކުރުމުގެ މަސައްކަތެވެ.
ބިންވެރިޔާ ސްކީމްގެ ދަށުން ގޯއްޗަށް އެދި 23،088 މީހުންގެ ފަރާތުން، 15،164 އެޕްލިކޭޝަން ހުށައަޅާފައިވެ އެވެ. ސަރުކާރުން ނިންމާފައި ވަނީ ޝަރުތު ހަވަމަވާ ހުރިހާ އެންމެންނަސް ވެސް ގޯތި ދިނުމަށެވެ.
އަދި ގެދޮރުވެރިޔާ ސްކީމުގެ ދަށުން ފުލެޓަށް އެދި 20،697 މީހުން ހުށަހެޅި އެވެ. ސަރުކާރުން ނިންމާފައި ވަނީ އޭގެތެރެއިން ވެސް ޝަރުތު ހަމަވާ ހުރިހާ އެންމެންނަށް ފުލެޓު ދިނުމަށެވެ.
އެ ސްކީމްގެ ދަށުން ޕްލޭނިން މިނިސްޓްރީން މިދިޔަ އޮގަސްޓް 8، ގައި އާންމުކުރި ފުލެޓު ލިބޭ މީހުންގެ ވަގުތީ ލިސްޓުގައި 15،000 އަށްވުރެ ގިނަ މީހުންގެ ޝަރުތު ހަމަވާ ކަމަށް ކަނޑައަޅާފައިވެ އެވެ. އެއީ 13،000 ފްލެޓެވެ.
ގެދޮރުވެރިޔާ ސްކީމުގެ ދަށުން ހުޅުމާލޭގެ ދެވަނަ ފިޔަވަހީގައި ސަރުކާރުން އަންނަނީ 18 ބުރީގެ 32 ޓަވަރު އިމާރާތް ކުރަމުންނެވެ. އޭގެތެރޭގައި ހިމެނެނީ ދެ ކޮޓަރީގެ 1،200 ޔުނިޓް، ތިން ކޮޓަރީގެ 2،800 ޔުނިޓެވެ
އޭގެ އިތުރުން މިމަހުގެ ދެ ވަނަ ދުވަހު ފަހި ދިރިއުޅުން ކޯޕަރޭޝަނުން ވަނީ ހުޅުމާލޭގައި އިތުރު 4،000 ހައުސިން ޔުނިޓު އެޅުމަށް އިންޑިއާގެ ކަލްޕަޓަރު ޕްރޮޖެކްޓްސް އިންޓަނޭޝަނަލް ލިމިޓެޑް (ކޭޕީއައިއެލް) އާ ހަވާލުކޮށްފަ އެވެ. އޭގެ އިތުރުން 2،000 ޔުނިޓު އިމާރާތް ކުރާން ވަނީ ބަޔަކާ ހަވާލުކޮށްފަ އެވެ
ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވަނީ ފްލެޓަށް އެދި ހުށަހެޅި މީހުންގެ ތެރެއިން ޝަރުތު ހަމަވި މީހުންނަށް ފްލެޓު ދިނުމަށްޓަކައި އިތުރު 3،500 ހައުސިން ޔުނިޓު އިމާރާތްކުރަން ބަޔަކާ ހަވާލު ކުރަން ތައްޔާރު ވަމުން އަންނަ ކަމަށް ވެސް ވިދާޅުވެފަ އެވެ.
