ބާސެލޯނާ (ސެޕްޓެމްބަރު 22) - މި ސީޒަނަށް ފަހު ބާސެލޯނާ އިން އޭނާ ގަންނަން ބިޑު ކުރާނެ ކަމަށް އުންމީދުކުރާ ކަމަށް، އެ ޓީމަށް ލޯން އެއްބަސްވުމެއްގެ ދަށުން ކުޅެމުން އަންނަ ޔާއޯ ފެލިކްސް ބުނެފި އެވެ.
ސްޕެނިޝް ލީގުގެ އެތުލެޓިކޯ މެޑްރިޑުން ލޯން އެއްބަސްވުމެއްގެ ދަށުން ފެލިކްސް ބާސެލޯނާ އަށް ބަދަލުވީ މި ސީޒަންގެ ނިޔަލަށެވެ. ސީޒަނަށް ފަހު ފެލިކްސްގެ ކޮންޓްރެކްޓް ދާއިމީ ކުރުމުގެ މާއްދާއެއް މި އެއްބަސްވުމުގައި ނެތެވެ. އެހެންކަމުން ބާސެލޯނާ އިން ޖެހޭނީ ފެލިކްސް ގަތުމަށް ބިޑުކުރާށެވެ.
ބާސެލޯނާގައި ހޭދަކުރަމުން އަންނަ ދުވަސްތަކާ ގުޅޭގޮތުން ނޫސްވެރިން ސުވާލުކުރުމުން ފެލިކްސް ބުނީ ބާސެލޯނާ އަށް ބަދަލުވުމަކީ އޭނާ އަބަދުވެސް ބޭނުންވި ކަމެއް ކަމަށާއި، އެ ކުލަބުގައި އޭނާ ބޭނުންވާ ގޮތަށް ބޭނުންވާ ސްޓައިލަށް ކުޅެވޭ ކަމަށެވެ.
މިހާތަނަށް މި ސީޒަންގައި ފެލިކްސް ބާސެލޯނާ އަށް ކުޅުނު ތިން މެޗުގައި ތިން ގޯލު ޖަހައި އިތުރު ގޯލެއް ޖެހުމަށް ފުރުސަތު ތަނަވަސްކޮށްދީފައިވެ އެވެ.
ފެލިކްސް ބުނީ ބާސެލޯނާގައި ރަނގަޅު ކުޅުމެއް ދެއްކޭނެކަމުގެ އިތުބާރު އޮންނަ ކަމަށާއި، ނަމަވެސް ސީޒަންގެ ކުރީކޮޅު މިހާ ރަނގަޅަށް ފެށޭނެ ކަމަށް ހީނުކުރާ ކަމަށެވެ. އެކަމަކު، މިހާރު ވިސްނުން ހުރީ މި ފޯމު ދަމަހައްޓައި ކާމިޔާބު ސީޒަނެއް ފުރިހަމަކުރަން ކަމަށް ވެސް އޭނާ ބުންޏެވެ.
ފެލިކްސް ބުނީ އޭނާ ބާސެލޯނާ އަށް ބަދަލުވީ އެތުލެޓިކޯ އިން ލިބޭ މުސާރަ އަށް ވުރެ ކުޑަ މުސާރައެއްގައި ކަމަށާއި، އެކަމާ އެއްވެސް ޝަކުވާއެއް ވެސް ނެތް ކަމަށެވެ.
އަދި އޭނާގެ އުއްމީދަކީ މި ސީޒަނަށްފަހު ބާސެލޯނާ އިން އޭނާ ގަތުމަށް ބިޑުކޮށް، އެތުލެޓިކޯ އިން ވެސް އެ ބިޑް ގަބޫލުކޮށް ބާސެލޯނާގެ ދާއިމީ ކޮންޓްރެކްޓެއް ލިބުން ކަމަށެވެ.
އެތުލެޓިކޯ މެޑްރިޑްގެ ކޯޗު ޑިއޭގޯ ސިމިއޯނީގެ ކޯޗިން ސްޓައިލާއި، ޓީމު ކުޅޭ ސްޓައިލަށް ފާޑުކިޔުމުގެ ސަބަބުން ޓީމުން ބާކީވެފައިވާ ފެލިކްސް މިދިޔަ ސީޒަންގެ ފަހުކޮޅު ކުޅުނީ އިނގިރޭސީ ޕްރިމިއާ ލީގުގެ ޗެލްސީ އަށެވެ. ނަމަވެސް އެ ކުލަބުގައި އޭނާ އަށް އެދެވޭ ކުޅުމެއް ނުދެއްކުނެވެ.
ދުނިޔޭގައި ތިބި އެެންމެ އުއްމީދީ ހުނަރުވެރި ޒުވާން ކުޅުންތެރިންގެ ލިސްޓުގެ އެންމެ ކުރީގައި މީގެ ދެތިން އަހަރު ކުރިން އުޅުނު ފެލިކްސް އެތުލެޓިކޯ މެޑްރިޑަށް ބަދަލުވީ 2019 ވަނަ އަހަރު 109 މިލިއަން ޕައުންޑް (135 މިލިއަން ޑޮލަރު) އަށެވެ.
