ރައްުޔިތުންގެ މަޖިލީހުގައި މިއަދު ބާއްވަން ތާވަލުކުރި ޖަލްސާ ވެސް، ވަޑައިގެންނެވި މެމްބަރުންގެ އަދަދު މަދުކަމުން ގަޑިއަށް ނުފެށި އިންތިޒާޒުކުރަންް ޖެހިއްޖެ އެވެ.
ރައްޔިތުންގެ މަޖިލީހުގައި ޖުުމްލަ 87 މެމްބަރަކު ތިއްބަވާ އިރު ޖަލްސާއެއް ކުރިއަށް ގެންދަން ކޯރަމް ހަމަވަނީ 22 މެމްބަރަކު ވަޑައިގެންނެވުމުންނެވެ. މިއަދު ހެނދުނު 9:00 ވީ އިރު ތަޅުމުގައި ވަޑައިގެން ތިއްބެވީ އެންމެ 18 މެމްބަރުންނެވެ.
މެމްބަރުން ހަމަ ނުވި ނަމަވެސް މަޖިލީހުގެ ރައީސް މުހައްމަދު ނަޝީދު ރިޔާސަތަށް ވަޑައިގެން ޖަލްސާ ފަށްޓަވަން ކުރައްވާ މަސައްކަތް މަޖިލީހުގެ ޔޫޓިއުބް ޗެނަލް މެދުވެރިކޮށް ވަގުތުން ދުރަށް ދެއްކެވި އެވެ. އެމަނިކުފާނު ވިދާޅުވި ގޮތުގައި މިއަދު ކުރިއަށް ގެންދަވާނީ މުޅި މަޖިލީހުގެ ކޮމިޓީ ބައްދަލުވުމެކެވެ.
އެއީ ރާއްޖޭގެ ވެރިކަމުގެ ނިޒާމު ބަރުލަމާނީ އަށް ބަދަލުކުރަން ފެނޭތޯ ބަލަން އާންމު ވޯޓެއް ނަގަން ގޮވާލައި ހުޅުދޫ ދާއިރާގެ މެމްބަރު އިލްޔާސް ލަބީބު ހުށަހެޅުއްވި ގަރާރު މުޅި މަޖިލީހުގެ ކޮމިޓީއަށް ފޮނުވަން އިއްޔެ ފާސްކޮށްފައި ވާތީ އެވެ.
ވަޑައިގެން ތިއްބެވި 18 މެމްބަރުން ތަޅުމުގައި މަޑުކުރައްވަން ނަޝީދު އެދިވަޑައިގެންނެވި އެވެ. އެއީ އެމަނިކުފާނު ވިދާޅުވި ގޮތުގައި މަޖިލީހުގެ މަސައްކަތަށް މެމްބަރުން ވަޑައިގެންނެވުމާ މެދު ސިޔާސީ ޕާޓީތަކުން ކުރާ މަޝްވަރާއެއް ކުރިއަށް ދާތީ އެވެ.
"ކޮމިޓީގައި ތިއްބެވުން ވަރަށް ބޮޑަށް އެދެން އެއީ ސިޔާސީ ޕާޓީތަކުގެ މަޝްވަރާކުރެވެމުން ދަނީ. އަޅުގަނޑު ހިތުން އެމްޑީޕީގެ ޕާލަމެންޓްރީ ގްރޫޕްގެ ލީޑަރުންނާއި ޕީޕީއެމް/ޕީއެންސީގެ ލީޑަރުންނާއި ޑިމޮކްރެޓުންގެ ލީޑަރުން ދަނީ މަޝްވަރާކުރަމުން. މަޝްވަރާކުރަމުން މިދަނީ މަޖިލީހަށް ބޭފުޅުން ވަޑައިގަންނަވާނެތޯ ނުވަތަ ނޫންތޯ، އެކަމާ ގުޅޭ ގޮތުން،" ސަމާސާ ރާގެއްގައި ނަޝީދު ވިދާޅުވި އެވެ.
މަޖިލީހަށް މެމްބަރުން ވަޑައިނުގަންނަވާތީ ޖަލްސާ ނުފެށި އިއްޔެ އާއި އޭގެ ކުރީ ދުވަހު ވެސް ގިނަ އިރުތަކެއް ވަންދެން މަޑުކުރަން ޖެހުނެވެ.
މަޖިލީހުގެ މެމްބަރުންނަށް މުސާރަޔާ އިނާޔަތްތަކުގެ ގޮތުގައި މަހަކު ގާތްގަނޑަކަށް 60،000 ރުފިޔާ ލިބިވަޑައިގަންނަވަ އެވެ. އޭގެ އިތުރުން، ކޮމިޓީގެ ބައްދަލުވުންތަކަށް ވަޑައިގަންނަވާ ނަމަ އިތުރު 20،000 ރުފިޔާ ލިބިވަޑައިގަންނަވަ އެވެ.
