ބަރުލަމާނީ ނިޒާމަކަށް ވެރިކަމުގެ ނިޒާމު ބަދަލުކުރަން ރައްޔިތުންގެ ފެންނަ ނުފެންނަ ވޯޓެއް ނެގުމަށް ޑިމޮކްރެޓްސްއިން ހުށަހަޅާފައިވާ ގަރާރުގެ މަސައްކަތް އެއްކޮށް ނިމި އިލެކްޝަންސް ކޮމިޝަނަށް މަޖިލީހުގެ ނިންމުން ހިއްސާކުރުމާ ހަމައަށް މިއަދު މަޖިލީހުގެ ޖަލްސާ ކުރިއަށް ގެންދަވާނެ ކަމަށް އެ މަޖިލިހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ނިޒާމު ބަދަލުކުރުމުގެ ފެންނަ ނުފެންނަ ވޯޓެއް ނެގުމަށް ގޮވާލާ ގަރާރެއް މަޖިލިހަށް ހުށަހެޅުއްވީ، ނިމިދިޔަ ރިޔާސީ އިންތިހާބުގެ ފުރަތަމަ ބުރުން ތިން ވަނައަށް ގިނަ ވޯޓު ހޯއްދެވި ޑިމޮކްރެޓްސްގެ ރިޔާސީ ކެންޑިޑޭޓު އަދި ރައްޔިތުންގެ މަޖިލިހުގެ ހުޅުދޫ ދާއިރާގެ މެމްބަރު އިލްޔާސް ލަބީބެވެ. މިއަދުގެ ޖަލްސާއަށް އެޖެންޑާކުރީ އެ ގަރާރުގެ އިބްތިދާއީ ބަހުސްގެ މަރުހަލާ ކުރިއަށް ގެންދިޔުމެވެ.
ނަމަވެސް ކޯރަމް ހަމަނުވެ ގަޑިއިރެއް ވަން ދެން ޖަލްސާ ނުފެށި ވަނިކޮށް ހެނދުނު 10:00 ޖަހާކަށް ހާއިރު ކޯރަމް ހަމަކޮށް އިލްޔާސް ވަނީ ތަޅުމަށް ގަރާރު އިއްވަވައިފަ އެވެ.
އޭގެ ފަހުން ހެނދުނުގެ ނާސްތާއަށް ޖަލްސާ މެދުކަނޑާލުމުގެ ވަގުތު ޖެހުމުން، އެ ކަން އިއުލާން ކުރައްވަމުން ނަޝީދު ވިދާޅުވީ އިބްތިދާއީ ބަހުސްގެ އިތުރުން ގަރާރުގެ ދިރާސާ ކުރުމާއި ފަހު ބަހުސް އަދި ގަރާރަށް ވޯޓަށް އެހުން ވެސް މިއަދު އޮންނާނެ ކަމަށެވެ.
"އަޅުގަނޑު ގަސްތު ކުރަނީ މިއަދު މި މަސައްކަތް ނިންމަން، އެއީ ބަހުސް ނިންމައި، މުޅި މަޖިލިހުގެ ކޮމިޓީއަކަށް ގެނެވި، އެ ކޮމިޓީން ވެސް މަސައްކަތް ނިންމައި، އަލުން އަނބުރާ ތަޅުމަށް ގެނެވި، ވޯޓަށް އަހައި، އަދި އިލެކްޝަންސް ކޮމިޝަނަށް އިންތިހާބު ބޭއްވުމަށް އެންގުމާ ހަމައަށް އަޅުގަނޑުމެންގެ މަސައްކަތް ކުރިއަށް ގެންދަން،" ނަޝީދު ވިދާޅުވި އެވެ.
ނަޝީދު އަބަދުވެސް ވަކާލާތު ކުރައްވަމުން ގެންދެވީ ރާއްޖެއަށް އެންމެ ރަނގަޅު ވާނީ ބަރުލަމާނީ ނިޒާމެއް ކަމަށެވެ. މީގެ ކުރިން 2007 ގައި ބޭއްވި ފެންނަ ނުފެންނަ ވޯޓުގައި ވެސް ނަޝީދާއި އޭރު އެމަނިކުފާނު ލީޑުކުރައްވަމުން ގެންދެވި އެމްޑީޕީން ވެސް ތާއީދުކުރީ ބަރުލަމާނީ ނިޒާމަކަށެވެ.
ނަމަވެސް ރައީސް އިބްރާހިމް މުހައްމަދު ސޯލިހު ވެރިކަމާ ހަވާލުވެވަޑައިގަތް ފަހުން އެމަނިކުފާނާއި އެމްޑީޕީގައި ތިބި އެމަނިކުފާނުގެ ސަޕޯޓަރުން ތާއީދުކުރީ ރިޔާސީ ނިޒާމު މި ގޮތުގައި ބޭއްވުމަށެވެ. ނަޝީދާއި ރައީސް ސޯލިހާ ދެމެދު އޮތް ގުޅުން ގޯސްވެގެން ދިޔައިރު، ހިޔާލު ތަފާތުވި އެއް ކަމަކީ ވެސް ވެރިކަމުގެ ނިޒާމުގެ މައްސަލަ އެވެ.
ރިޔާސީ އިންތިހާބުގެ ފުރަތަމަ ބުރުގައި ތިން ވަނައަށް އެންމެ ގިނަ ވޯޓު، ނަޝީދު އުފެއްދެވި ޑިމޮކްރެޓްސްއިން ހޯދާފައިވާއިރު ދެ ވަނަ ބުރުގައި ރައީސް ސޯލިހަށް ތާއީދު ކުރުމަށް އެ ޕާޓީން ހުށަހަޅާ ޝަރުތަކީ ވެސް ފެންނަ ނުފެންނަ ވޯޓު ނަގައިދިނުމެވެ.
ޑިމޮކްރެޓްސްއިން ޝަރުތުކުރީ ސެޕްޓެމްބަރު 30، ގައި އޮންނަ ދެ ވަނަ ބުރުގެ ކުރިން އެ ވޯޓު ނެގުމަށެވެ. ނަމަވެސް ރައީސް ސޯލިހު އެއްބަސްވީ ދެ ވަނަ ބުރުގެ ވޯޓަށް ފަހު އަދި އެމަނިކުފާނުގެ މި ދައުރު ނިމުމުގެ ކުރިން އެ ވޯޓު ބޭއްވުމަށެވެ. ޑިމޮކްރެޓްސްގެ އިންޓެރިމް ކައުންސިލުން ރޭ ނިންމީ އެ ޕާޓީގެ ހުށަހެޅުމާ އެއް ގޮތަށް މާދަމާއަށް އެއްބަސްނުވެއްޖެ ނަމަ ވަކި ބަޔަކަށް ތާއީދު ނުކޮށް ތިބުމަށެވެ.
