މި މަހުގެ 30 ގައި ބާއްވާ ރިޔާސީ އިންތިހާބުގެ ދެވަނަ ބުރުގައި އެކުގައި މަސައްކަތް ކުރުމަށް އެމްޑީޕީ އާއި ޑިމޮކްރެޓްސްއިން މަޝްވަރާކުރަމުންދަނިކޮށް، އެމްޑީޕީގެ ކެންޑިޑޭޓު ރައީސް އިބްރާހިމް މުހައްމަދު ސޯލިހާއި ޑިމޮކްރެޓްސް ލީޑުކުރައްވާ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ފޯނުން ވާހަކަދައްކަވައި މަޝްވަރާ ކުރައްވައިފި އެވެ.
އިންތިހާބުގެ ދެވަނަ ބުރަށް 12 ދުވަހަށް ވެފައިވަނިކޮށް ދެ ރައީސުން ފޯނުން ވާހަކަދެއްކެވިކަން އެމްޑީޕީގެ ލީޑަޝިޕުގައި ހިމެނޭ ފަރާތްތަކުން ވަނީ "އަދަދު" އަށް ކަށަވަރުކޮށްދީފަ އެވެ. ނަމަވެސް ދެ ރައީސުން ވާހަކަދެއްކެވި ދިގުމިނެއް އަދި މައުލޫއެއް މިހާތަނަށް އެއްވެސް ބޭފުޅަކު ހާމަކުރައްވާފައެއް ނުވެ އެވެ.
މިއަދުގެ ވަގުތެއްގައި އެ ދެ ބޭފުޅުން ފޯނުން މަޝްވަރާކުރެއްވިއިރު، ދެވަނަ ބުރުގައި އަމަލުކުރާނޭ ގޮތެއް ނިންމުމަށް މިރޭ ޑިމޮކްރެޓްސްގެ ކައުންސިލްގެ ބައްދަލުވުމެއް ބޭއްވުމަށް ވަނީ ހަމަޖެހިފަ އެވެ.
ރިޔާސީ އިންތިހާބުގެ ފުރަތަމަ ބުރުގައި 15،000 އަށްވުރެ ގިނަ ވޯޓާއެކު ތިންވަނައަށްދިޔަ ޑިމޮކްރެޓްސްއަކީ ޖެނުއަރީ 28، ގައި ބޭއްވި އެމްޑީޕީގެ ރިޔާސީ ޕްރައިމަރީން މުހައްމަދު ނަޝީދަށް ލިބިވަޑައިގެންނެވި ނާކާމިޔާބީއަށް ފަހު އެމްޑީޕީގައި ތިބެގެން ސަރުކާރާ ދެކޮޅަށް މަސައްކަތް ކުރަން ފެށުމުން އެމްޑީޕީން ވަކިކުރަން އުޅޭ ކަން އެނގުމުން ނަޝީދުގެ ސަޕޯޓަރުން އުފެއްދި ޕާޓީއެކެވެ.
ނަޝީދު އެމްޑީޕީ ދޫކުރެއްވީ އެ ޕާޓީގެ ރައީސްގެ މަގާމުގައި ހުންނެވުމަށްފަހު އެވެ. އެ ޕާޓީން އެމްޑީޕީއާއެކު ކުރަމުން ގެންދާ ނުރަސްމީ މަޝްވަރާތަކުގައި ކުރާ އެންމެ ބޮޑު ޑިމާންޑަކީ މި މަހުގެ 25 ގައި ރާއްޖޭގައި ވެރިކަންކުރުމުގެ ނިޒާމު އަލުން ކަނޑައެޅުމާއި މެދު ފެންނަ ނުފެންނަ ވޯޓެއް ނެގުމެވެ.
އެމްޑީޕީއިން މިއަދު ވަނީ އިންތިހާބުގެ ދެ ވަނަ ބުރުގެ ވޯޓަށް ފަހު ވެރިކަމުގެ ނިޒާމާ ގުޅޭ ގޮތުން ރައްޔިތުންގެ ފެންނަ ނުފެންނަ ވޯޓަކަށް ދިޔުމާ މެދު މައްސަލައެއް ނެތް ކަމަށް ބުނެފަ އެވެ. އެ ޕާޓީގެ ޗެއާޕާސަން ފައްޔާޒު އިސްމާއިލް "އަދަދު" އަށް ވިދާޅުވީ، އެކަން މިހާރު ޑިމޮކްރެޓްސްއަށް ނުރަސްމީކޮށް [އަނގަބަހުން] އަންގާފައިވާނެ ކަމަށެވެ.
ރިޔާސީ އިންތިހާބުގެ ފުރަތަމަ ބުރުގައި އެއްވެސް ކެންޑިޑޭޓަކަށް 50 ޕަސެންޓަށް ވުރެ ގިނަ ވޯޓު ލިބިފައި ނެތް އިރު އެންމެ ގިނަ ވޯޓު ލިބިވަޑައިގަތީ އިދިކޮޅު ޕީއެންސީގެ ކެންޑިޑޭޓު ޑރ. މުހައްމަދު މުއިއްޒަށެވެ. މުއިއްޒަށް 101،635 ވޯޓު ލިބިވަޑައިގަތެވެ. އެއީ ވޯޓުލީ މީހުންގެ 46 ޕަސެންޓެވެ. އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހަށް ލިބިވަޑައިގަތީ 86،161 ވޯޓެވެ. އެއީ 39 ޕަސެންޓެވެ.
