ރާއްޖޭގައި ވެރިކަންކުރާ ނިޒާމު ބަރުލަމާނީއަށް ބަދަލުކުރުމާ މެދު ރައްޔިތުންނަށް ފެންނަ ގޮތެއް ބަލަން ވޯޓެއް ނަގަން ގޮވާލައި ހުށަހަޅާފައިވާ ގަރާރުގެ ބަހުސް ފަށަން މާދަމާއަށް އެޖެންޑާކުރަނީ އެމްޑީޕީގެ ޕާލަމެންޓްރީ ގްރޫޕްގެ ލީޑަރު މުހައްމަދު އަސްލަމްގެ ރުހުމާއެކު ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
މަޖިލީހަށް ހުށަހަޅާފައިވާ ގަރާރެއް އެޖެންޑާކުރުމަކީ އެހެން ނަމަވެސް މަޖިލީހުގެ ރައީސަށް އޮންނަ އިހުތިޔާރެކެވެެ. ގަރާރެއް އެޖެންޑާކުރަން އެއްވެސް ޕާޓީއެއްގެ ރުހުން ހޯއްދަވާކަށް މަޖިލީހުގެ ރައީސަކަށް ލާޒިމެއް ނޫނެވެ.
މަޖިލީހުގެ މިއަދުގެ ޖަލްސާގެ ކޯރަމް ހަމަނުވެގެން، ޖަލްސާ ނުފެށި، މެމްބަރުންގެ އިންތިޒާރުގައި، ރިޔާސަތުގައި އިންނެވި އިރު އެކިއެކި ބިލުތަކާއި ގަރާރުތަކާ ބެހޭ ގޮތުން ނަޝީދު ވާހަކަފުޅު ދެއްކެވި އެވެ. އެމަނިކުފާނުގެ ދަ ޑިމޮކްރެޓްސްގެ މެމްބަރު އިލްޔާސް ހުށަހެޅުއްވި ގަރާރުގެ ބަހުސް މާދަމާ ފަށާ ވާހަކަ ވެސް އެގޮތުން ވިދާޅުވި އެވެ.
"ހުޅުދޫ [ދާއިރާގެ] މެމްބަރު އިލްޔާސް ލަބީބު ހުށަހަޅުއްވާފައި އޮތް ދިވެހިރާއްޖޭގައި ވެރިކަމުގެ ނިޒާމު ބަދަލުކުރުމާ ގުޅޭ ގޮތުން ރައްޔިތުންގެ ހިޔާލު ހޯދުމުގެ އާއްމު ވޯޓު ނެގުމުގެ ގަރާރު، މިވެސް 13 ސެޕްޓެމްބަރުގައި ހުށަހެޅިފައި ވަނީ. އެހެން ނަމަވެސް މިހާރު މާދަމާ އެއަށް ބަހުސްކުރެވޭ ގޮތަށް މިއޮތީ ފުރުސަތު ލިބިފައި. އެއީ ހައުސް މެޖޯރިޓީ ލީޑަރާއި މައިނޯރިޓީ ލީޑަރު އެއްބަސްވެފައި ވާތީ،" ނަޝީދު ވިދާޅުވި އެވެ.
ހައުސް މެޖޯރިޓީ ލީޑަރަކީ ހިތަދޫ އުތުރު ދާއިރާގެ އެމްޑީޕީ މެމްބަރު މުހައްމަދު އަސްލަމެވެ. މައިނޯރިޓީ ލީޑަރަކީ އޭދަފުށި ދާއިރާގެ ޕީޕީއެމް މެމްބަރު އަހުމަދު ސަލީމެވެ.
އިލްޔާސް ހުށަހެޅުއްވި ބަރުލަމާނީ ގަރާރު މާދަމާއަށް އެޖެންޑާ ކުރިއިރު، ރިޔާސީ އިންތިހާބުގެ ދެ ވަނަ ބުރުގައި އެމްޑީޕީއާ ގުޅޭނީ ނިޒާމާ ގުޅޭ ގޮތުން ފެންނަ ނުފެންނަ ވޯޓެއް ސެޕްޓެމްބަރު 30، ގެ ކުރިން ނަގަން އެއްބަސްވާ ނަމަ ކަމަށް ދަ ޑިމޮކްރެޓްސް ބުނެ އެވެ.
ސެޕްޓެމްބަރު 9، ގައި ބޭއްވި ރިޔާސީ އިންތިހާބުގެ ފުރަތަމަ ބުރުގައި އެމްޑީޕީގެ ކެންޑިޑޭޓް ރައީސް އިބްރާހިމް މުހައްމަދު ސޯލިހަށް ލިބިވަޑައިގަތީ 39 ޕަސެންޓު ވޯޓެވެ. އިދިކޮޅު ކެންޑިޑޭޓު ޑރ. މުހައްމަދު މުއިއްޒު 46 ޕަސެންޓު ވޯޓު ހޯއްދެވިއިރު، ޑިމޮކްރެޓްސްގެ އިލްޔާސްއަށް ލިބިވަޑައިގަތީ ހަތް ޕަސެންޓު ވޯޓެވެ.
