ރާއްޖޭގެ ވެރިކަމުގެ ނިޒާމު އަލުން ކަނޑައަޅަން ކުރައްވާ މަސައްކަތުގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ކުރީގެ ރައީސް އަދި ޕީޕީއެމް/ޕީއެންސީގެ ލީޑަރު ރައީސް އަބްދުﷲ ޔާމީނާ ބައްދަލުކުރެއްވުމަށް އެދުމުން އެކަމަށް ދެކޮޅުހައްދަވައިފި އެވެ.
ޖަލަށް ވަޑައިގެން ޔާމީނާ ބައްދަލުކުރެއްވުމުގެ ހުއްދަ އަށް ނަޝީދު އެދިވަޑައިގެންނެވީ ރައްޔިތުންގެ މަޖިލީހުގެ އިދާރާ މެދުވެރިކޮށެވެ. އެމަނިކުފާނަށް އެ ހުއްދަ ދެއްވުން އެދި މަޖިލީހުން އިއްޔެ ވަނީ ހޯމް މިނިސްރީއަށް ސިޓީއެއް ފޮނުވައިފަ އެވެ.
ކަރެކްޝަންސް އިން މިއަދު "އަދަދު"އަށް ބުނީ ރައީސް ޔާމީނު ނަޝީދާ ބައްދަލުކުރެއްވުމަށް އިއުތިރާޒްވުމުން އެކަން މަޖިލީހުގެ އިދާރާއަށް އަންގާފައިވާނެ ކަމަށެވެ.
ރާއްޖެއަށް ރަނގަޅީ ބަރުލަމާނީ ނިޒާމުކަމަށް ވިދާޅުވެ، ނަޝީދު ދައްކަވާ ވާހަކަފުޅު މިފަހުން އާކުރެއްވީ ރިޔާސީ އިންތިހާބުގެ ފުރަތަމަ ބުރުގެ ނަތީޖާއަށް ފަހުގަ އެވެ.
މިމަހުގެ ނުވަވަނަ ދުވަހު ބޭއްވި ފުރަތަމަ ބުރުގައި ރައީސް ކަމަށް އިންތިހާބުވެވަޑައިގަންނަވަން ހޯއްދަވަން ޖެހޭ އަދަދަށް އެއްވެސް ކެންޑިޑޭޓަކަށް ވޯޓު ލިބިވަޑައެއް ނުގަންނަވަ އެވެ. އިންތިހާބުގެ ދެވަނަ ބުރުގައި ތާއީދު ކުރުމަށް، ތިން ވަަނައަށް އެންމެ ގިނަ ވޯޓު ހޯދި ޕާޓީގެ ހައިސިއްޔަތުން، ނަޝީދުގެ ދަ ޑިމޮކްރެޓްސް އިން އެމްޑީޕީއަށާއި ޕީޕީއެެމް އަށް ވެސް ހުށަހެޅި ޝަރުތަކީ ނިޒާމު ކަނޑައެެމުގެ ފެންނަ ނުފެންނަ ވޯޓެއް ނެގުމެވެ.
ނަޝީދު އެދިވަޑައިގަނަންވަނީ ޔާމީނާ އެކު އެ މަޝްވަރާ ކުރިއަށް ގެންދަވާށެވެ.
"ރައީސް ޔާމީނު އަރިހުގައި ދަންނަވަން ބޭނުންވަނީ ވެރިކަމުގެ ނިޒާމާ ގުޅޭ ގޮތުން 25 ސެޕްޓެމްބަރު ދުވަހުގެ ކުރީގައި އެ ވޯޓު ނެންގެވުމަށް އެމަނިކުފާނު ދެކެވަޑައިގަންނަވާ ގޮތަކާއި، އަޅުގަނޑުމެންނަށް އެ ކަމުގައި އެހީތެރިވެވޭނެ ގޮތެއް އޮތްނަމަ އެ ވާހަކައަކާ،" ޑިމޮކްރެޓްސްގެ މެމްބަރުންނާ އެކު އިއްޔެ ބޭއްވެވި ބައްދަލުނަޝީދު ވިދާޅުވި އެވެ.
