މެޑްރިޑް (ސެޕްޓެމްބަރު 17) - ސްޕެނިޝް ލީގުގައި ރޭ ރެއާލް ބެޓިސް އަތުން 5-0 އިން މޮޅުވެ، ބާސެލޯނާ ލީގު ތާވަލުގެ އެއް ވަނަ އަށް ޖެހިލައިފި އެވެ.
މިއީ، 2021 ވަނަ އަހަރުގެ އޭޕްރީލް މަހުގެ ފަހުން ސްޕެނިޝް ލީގު މެޗެއްގައި ބާސެލޯނާ އިން ފަސް ގޯލު ޖެހި ފުރަތަމަ ފަހަރެވެ.
ބާސެލޯނާ އެއް ވަނަ އަށް އެރީ ފަސް މެޗުން 13 ޕޮއިންޓް ހޯދައިގެންނެވެ. ދެ ވަނައިގައި އޮތް ރެއާލް މެޑްރިޑަށް ހަތަރު މެޗުން ވަނީ 12 ޕޮއިންޓް ލިބިފަ އެވެ. ތިން ވަަނައިގައި އޮތީ ރޭ ކަޑިޒް އަތުން 3-0 އިން މޮޅުވެ، ފަސް މެޗުން 10 ޕޮއިންޓް ހޯދި އެތުލެޓިކް ބިލްބާއޯ އެެވެ.
ރޭގެ މެޗުގައި ބާސެލޯނާ އިން ފުރަތަމަ ހާފުގައި ވަނީ ދެ ގޯލު ޖަހައިފަ އެވެ. މެޗުގެ 25 ވަަނަ މިނިޓްގައި އޭރިއާތެރެއިން ލިބުނު ފުރުސަތަކުން ބާސެލޯނާ އަށް ލީޑުނަގައިދިނީ ޔާއޯ ފެލިކްސް އެވެ. އޭގެ ހަތް މިނިޓް ފަހުން، އަންދްރެއަސް ކްރިސްޓެންސަން ދިން ބޯޅައަކުން ރޮބަޓް ލެވަންޑޯސްކީ ވަނީ ބާސެލޯނާގެ ލީޑުފުޅާކޮށްދީފަ އެވެ.
ދެ ވަަނަ ހާފުގައި ބާސެލޯނާ އިން ތިން ގޯލު ޖެހިއިރު، މި ހާފުގައި އެ ޓީމުގެ ފުރަތަމަ ގޯލު ޖެހީ 62 ވަނަ މިނިޓްގައި ފެރާން ޓޮރޭޒް އެވެ. އޭގެ ހަތަރު މިިނިޓް ފަހުން، ރަފީނިއާ ގޯލެއް ޖެހިއިރު، މެޗުގައި ބާސެލޯނާގެ ފަހު ގޯލު ކާމިޔާބުކުރީ ލޯން އެއްބަސްވުމެއްގެ ދަށުން އެ ޓީމާ ގުޅުނު ޔާއޯ ކަންސޭލޯ އެވެ.
ލީގުގައި މިރޭ ރެއާލް ސޮސިއެޑާޑް އަތުން މޮޅުވެގެން ރެއާލް މެޑްރިޑަށް އަލުން އެއް ވަަނަ އަށް އެރޭނެ އެވެ.
