ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ދަ ޑިމޮކްރެޓްސް ޕާޓީގެ މިސްރާބު މިހާރު ހުރީ އުފެއްދި މަގުސަދާއި ހިލާފަށް، "ހަރުކަށި ފިކުރާއި އަނިޔާވެރިި ކަމުގެ ފަހަތަށް ދީލާލަން" ކަމަށް، އެ ޕާޓީ އުފެއްދުމުގައި އިސްކޮށް އުޅުއްވި ތޮއްޑޫ ދާއިރާގެ މެމްބަރު ހަސަން ޝިޔާން ވިދާޅުވެއްޖެ އެވެ.
އޭނާ ވަނީ އެ ޕާޓީން ވަކިވެވަޑައިގެން އަލުން އެމްޑީޕީއާ ގުޅިވަޑައިގެންފަ އެވެ.
ނަޝީދާ ގާތް ގުޅުމެއް އޮންނަ ޝިޔާން ރޭ ކުރެއްވި ޓްވީޓެއްގައި ވިދާޅުވީ ދަ ޑިމޮކްރެޓްސް އުފައްދަން މަސައްކަތް ކުރި މީހެއްގެ ހައިސިއްޔަތުން އޭނާ އަށް ސާފުވާ ކަމަކީ އެ ޕާޓީ އުފައްދަން ދެއްކި ވާހަކައާ އިދިކޮޅަށް މިހާރު މިސްރާބު ހުރި ކަމަށެވެ.
އެއީ ހަރުކަށި ފިކުރާ އަނިޔާވެރިކަމުގެ ފަހަތަށް ދީލާލުމަށް ކަމަށްވާތީ، ޑިމޮކްރެޓްސްގައި ތިބި ވިސްނޭ މީހުން އަވަހަށް އެމްޑީޕީއަށް ގުޅިވަޑައިގަތުމަށް އޭނާ ގޮވާލެއްވި އެވެ.
ޝިޔާން އިޝާރާތް އެ ކުރެއްވީ ކުރިއަށް އޮތް ރިޔާސީ އިންތިހާބު ދެ ވަނަ ބުރަކަށް ގޮސްފި ނަމަ، ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒަށް، ނަޝީދާއި ޑިމޮކްރެޓްސް ތާއިދު ކޮށްފާނެ ކަމަށް ގަބޫލު ކުރެއްވޭ ވާހަކަ އެވެ.
ހޯމަ ދުވަހުގެ ރޭ ނަޝީދު ވަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީންގެ އަނބިކަނބަލުން ފާތުމަތު އިބްރާހިމްއާއެކު، މަގުމަތީގައި ހުންނަވައި ރައީސް ޔާމީން މިނިވަން ކުރަން އަޑު އުފުލައިފަ އެވެ.
ފެހި ގާނޫނު އަސާސީގެ ފަހުން ރާއްޖޭގައި އެންމެ ބިރުވެރި ދުވަސްތަކެއް ތަޖުރިބާކުރަން ޖެހުނީ ޔާމީންގެ ވެރިކަމުގަ އެވެ. އެ ވެރިކަމުގައި ކުރީގެ ރައީސް މައުމޫން އަބްދުލް ގައްޔޫމާއި ސިޔާސީ ހުރިހާ ލީޑަރުން ޖަލަށްލި އެވެ.
