އިދިކޮޅު ޕީޕީއެމް/ޕީއެންސީގެ ކެންޑިޑޭޓް ޑރ. މުހައްމަދު މުއިއްޒަށް ވޯޓު ދިނުމުގެ ބަދަލުގައި އެ ޕާޓީގެ ސަޕޯޓަރުން ދަ ޑިމޮކްރެޓްސްގެ ކެންޑިޑޭޓް އިލްޔާސް ލަބީބަށް ވޯޓު ދިނުމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިރޭ އެދިވަޑައިގަނެފި އެވެ.
ސޯޝަލް މީޑިއާ ޕްލެޓްފޯމް ޓުވިޓާގައި ނަޝީދު މިރޭ ލިޔުއްވީ ޕީޕީއެމްގެ ސަޕޯޓަރުން އިލްޔާސްއަށް ވޯޓު ދެއްވުމަކީ "ވަރަށް އެދޭ" ކަމަށެވެ. އޭގެ ބޭނުމަކީ ރައީސް އިބްރާހިމް މުހައްމަދު ސޯލިހު ދެ ވަނަ ބުރަކަށް ނުގެންދިއުން ކަމަށް ވެސް ނަޝީދު ވިދާޅުވި އެވެ.
"ރައީސް ސޯލިހު ނޫން ގޮތެއް ހޯދުމަށް ދެ ވަނަ ބުރަކަށް ރައީސް ސޯލިހު ދިޔަ ނުދިނުން ވަރަށް މުހިންމު،" ނަޝީދު ވިދާޅުވި އެވެ.
ނަޝީދު އެހެން ވިދާޅުވިއިރު މިއަދު ރ. އަލިފުށީގައި ވާހަކަ ދައްކަވަމުން ރައީސް ސޯލިހު ވަނީ، ސިޔާސީ ގޮތުން ހިޔާލުތަފާތުވާ ހުރިހާ އެންމެން އެމަނިކުފާނަށް ވޯޓު ދެއްވުމަށް އިލްތިމާސް ކުރައްވައިފަ އެވެ.
"އަޅުގަނޑުގެ އިލްތިމާސަކީ ސިޔާސީ ހިޔާލު ތަފާތުވިޔަސް ރާއްޖޭގެ ތަރައްގީއަށް ކުރާ މަސައްކަތުގައި މިފަހަރު ހުރިހާ ބޭފުޅުން ބައިވެރިވެވަޑައިގެން އަޅުގަނޑަށް ވޯޓު ދެއްވަން،" ރައީސް ވިދާޅުވި އެވެ.
އަންނަ ހޮނިހިރު ދުވަހު ބާއްވާ ރިޔާސީ އިންތިހާބުގައި ރައީސް ސޯލިހާއި އިލްޔާސް އާއި ޑރ. މުއިއްޒުގެ އިތުރުން ވާދަ ކުރައްވަނީ ޖުމްހޫރީ ޕާޓީގެ ގާސިމް އިބްރާހިމާއި އެމްއެންޕީގެ މުހައްމަދު ނާޒިމެވެ. އޭގެ އިތުރުން އުމަރު ނަސީރާއި ފާރިސް މައުމޫނާއި ހަސަން ޒަމީލު އަމިއްލަ ގޮތުން ވާދަ ކުރައްވަ އެވެ.
