ރިސޯޓުތަކުން ދިގު މުއްދަތަށް ވިލާ އާއި ކޮޓަރި ކުއްޔަށް ދިނުމާ ބެހޭ ގަވާއިދު ސަރުކާރުން މިއަދު ގެޒެޓުކޮށްފި އެވެ.
ފަތުރުވެރިކަމާ ބެހޭ މިނިސްޓްރީން މިއަދު ޝާއިއު ކުރި އެ ގަވާއިދުގައިވާ ގޮތުން ދިގު މުއްދަތަށް ކުއްޔަށް ދެވޭނީ ރިސޯޓެއްގައި ހަދާފައި ހުރި އެޕާޓްމަންޓެއް، ވިލާއެއް ނުވަތަ ކޮޓަރިއެކެވެ.
އެފަދަ ކޮޓަރިތައް ކުއްޔަށް ދޭއިރު، ކުއްޔަށް ހިފާ ފަރާތަށް އެކަނި ބޭނުން ކުރެވޭ ބިމުގެ ޒޯނެއް ބޭނުން ނަމަ ކަނޑައެޅިދާނެ އެވެ. ގަވާއިދުގެ ދަށުން، ރިސޯޓެއް ހަދަމުންދާއިރު އަދި ހަދަން ފެށުމުގެ ކުރިން ވެސް ދިގު މުއްދަތަށް ކުއްޔަށް ދެވިދާނެ އެވެ.
އެ ގަވާއިދުގައިވާ ގޮތުން ދިގު މުއްދަތަށް ވިލާ ނުވަތަ ކޮޓަރި ކުއްޔަށް ދިނުމުގެ ހައްގު ލިބެނީ ފަސް ބަޔަކަށެވެ. އެއީ ރިސޯޓު ހެދުމަށް ރަށް ކުއްޔަށް ނަގާފައިވާ ފަރާތްތަކަށާއި ސަބްލީސް ކޮށްފައިވާ ނަމަ އެ ލީސްގެ ވެރި ފަރާތަށާއި އިންޓަގްރޭޓެޑް ރިސޯޓެއް ހަދާ ޑިވެލޮޕަރު އަދި އެފަދަ ރިސޯޓެއް ސަބްލީސްކޮށްފައިވާ ނަމަ އެ ފަރާތަށެވެ.
ދިގު މުއްދަށް ވިލާއެއް ނުވަތަ ކޮޓަރިއެއް ކުއްޔަށް ދޫކުރާ ނަމަ، ގަވާއިދުގައިވާ ގޮތުން އެތަނެއް ކުރިއާލައި ރަޖިސްޓްރީ ކުރަންޖެހެ އެވެ. އެގޮތަށް ކޮޓަރިއެއް ރަޖިސްޓްރީކޮށްދެނީ 5،000ރ. ސަރުކާރަށް ދެއްކުމުންނެވެ.
އެ ގަވާއިދުގެ ދަށުން، ދިގު މުއްދަތަށް ކުއްޔަށް ދޫކުރާ ކޮޓަރިތަކުގެ ދަފުތަރެއް ސަރުކާރުން ބަލަހައްޓަންޖެހެ އެވެ. އަދި އެފަދަ ކޮޓަރިތަކުގެ މައުލޫމާތާއި ކުއްޔަށް ހިފާ ފަރާތުގެ މައުލޫމާތު ވެސް އެ ދަފުތަރުގައި ހިމަނަންޖެހެ އެވެ.
