ސިއްހީ ހިދުމަތް ހޯދަން އަތޮޅުތެރޭގެ ރަށްރަށުން ރީޖަނަލް ހޮސްޕިޓަލުތަކަށް ރައްޔިތުން ކުރަންޖެހޭ ދަތުރުތަކަށް ހައްލެއް ހޯދައިދިނުމަށް ސަރުކާރުން ގާއިމުކުރި "މޯލްޑިވްސް ހެލްތު ލައިން" މިއަދު އިފްތިތާހުކޮށްފި އެވެ.
ޖުމްހޫރީ މައިދާނުގައި މިއަދު ބޭއްވި ހާއްސަ ރަސްމިއްޔާތެއްގައި މޯލްޑިވްސް ހެލްތު ލައިން އިފްތިތާހުކޮށްދެއްވީ ހެލްތް މިނިސްޓަރު އަހުމަދު ނަސީމެވެ.
އެ ރަސްމިއްޔާތުގައި ވާހަކަ ދައްކަވަމުން ނަސީމު ވިދާޅުވީ ސަރުކާރުގެ އަމާޒަކީ ސިއްހީ ދާއިރާއަށް އިންގިލާބީ ބޮޑު ބަދަލެއް ގެނައުން ކަމަށާއި ހެލްތު ލައިން ޕްރޮޖެކްޓާ އެކު މިނިސްޓްރީން ކުރިއަށްގެންދާ އައުޓްރީޗް ޕްރޮގްރާމު ވެސް އިތުރަށް ފުޅާވެގެންދާނެ ކަމަށެވެ.
އަދި, ސަރުކާރުން މަސައްކަތް ކުރަމުންދަނީ ސިއްހީ ފަރުވާ ހޯދުމަށް ރައްޔިތުން ކުރަންޖެހޭ ދަތުރު މަދުކޮށް އެ ރައްޔިތުންނާއި ވީހާވެސް ގާތުން ސިއްހީ ހިދުމަތް ފޯރުކޮށްދިނުން ކަމަށާއި "މޯލްޑިވްސް ހެލްތު ލައިން" އާއެކު ސިއްހީ ހިދުމަތް ހޯދަން ރައްޔިތުން ކުރަންޖެހޭ ދަތުރުތަކަށް ވަރަށް ބޮޑު ލުޔެއް ލިބިގެންދާނެ ކަމަށް ވިދާޅުވި އެެވެ.
ހެލްތު މިނިސްޓްރީން މައުލޫމާތު ދޭ ގޮތުގައި މިއަދު އިފްތިތާހުކުރި މި ހެލްތް ލައިންގެ ދަށުން ކޮންމެ އަތޮޅެއްގައިވެސް ގާއިމުކޮށްފައިވާ އަތޮޅު ހޮސްޕިޓަލު ނުވަތަ ރީޖަނަލް ހޮސްޕިޓަލުގައި ތިއްބަވާ އެކި ދާއިރާތަކުގެ ޑޮކްޓަރުން ކޮންމެ މަހަކުވެސް އެ އަތޮޅެއްގެ ރަށްރަށުގައި ތިބޭ ބަލިމީހުން ގާތަށް ގޮސް ފަރުވާ ދޭނެ އެވެ.
މޯލްޑިވްސް ހެލްތް ލައިންގެ ދަށުން އަތޮޅުތަކަށް ފޮނުވާ ލޯންޗުތައް. މި ޕްރޮގްރާމާއެކު ސިއްހީ ފަރުވާ ހޯދަން ކުރަންޖެހޭ ދަތުރުތަކަށް ވަރަށް ބޮޑު ލުޔެއް ލިބޭނެ ކަމަށް ހެލްތް މިނިސްޓްރީން ގަބޫލުކުރޭ--- ފޮޓޯ: މިރާން/އަދަދު
މި ދަތުރުތަކަށް ހާއްސަކޮށްގެން ބަނދެފައިވާ 20 ހައިސްޕީޑް ލޯންޗު ރާއްޖޭގެ 20 އަތޮޅަށް ފޮނުވަން ވަނީ ހަމަޖެހިފަ އެވެ. އޭގެ ތެރެއިން ހަތް އަތޮޅަކަށް ސްޕީޑް ލޯންޗު މިއަދު ވަނީ ހަވާލުކޮށްފަ އެވެ. އަދި ބާކީ 13 އަތޮޅަށް ފޮނުވަން ހަމަޖެހިފައިވާ ލޯންޗުތައް އަންނަ ނޮވެމްބަރު މަސް ނިމެންވާއިރަށް ހަވާލުކުރެވޭނެ ކަމަށް މިނިސްޓްރީން ބުންޏެވެ.
މި ރަސްމިއްޔާތުގައި ވާހަކަަ ދައްކަމުން ހެލްތު މިނިސްޓްރީގެ ސްޓޭޓް މިނިސްޓަރު އަހުމަދު އާދިލު ވިދާޅުވީ މި ލޯންޗުތައް ބޭނުންކޮށްގެން އައުޓްރީޗް ޕްރޮގްރާމުތައް ހިންގުމުގެ އިތުރުން އިމަޖެންސީތަކުގައި ބަލިމީހުންވެސް އުފުލާނެ ކަމަށެވެ. އެގޮތުން މި ލޯންޗުތައް ޑިޒައިންކޮށްފައިވަނީ ފަސޭހަކަމާއެކު ބަލި މީހުންނާއި ލެބޯޓަރީ ސާމްޕަލް ފަދަ ތަކެތިވެސް އުފުލޭ ގޮތަށް ކަމަށް ވިދާޅުވި އެވެ.
އާދިލު ވިދާޅުވީީ މި ހެލްތު ލައިންގެ ދަށުން އެސްޓީއޯ އާއި ގުުޅިގެން ޑްރޯންގެ ޒަރިއްޔާއިން އެއް ރަށުން އަނެއް ރަށަށް ލެބޯޓްރީ ސާމްޕަލް، އިމަޖެންސީ މެޑިސިން އާއި ކޮންސިއުމަބަލް އުފުލުމުގެ ހިދުމަށްވެސް ފެށިގެންދާނެ ކަމަށެވެ.
އަދި, ޑްރޯންގެ ހިދުމަތް ފުރަތަމަ ފަށާނީ ލެބޯޓްރީ ނެތް ރަށުން ކަމަށާއި މިނިސްޓްރީގެ އަމާޒަކީ އެންމެ ފަހުގެ ޓެކްނޮލޮޖީ ބޭނުންކޮށްގެން ސިއްހީ ދާއިރާ ކުރިއެރުވުން ކަމަށް އާދިލު ވިދާޅުވި އެވެ.
މިނިސްޓްރީން މައުލޫމާތު ދޭ ގޮތުގައި މޯލްޑިވްސް ހެލްތު ލައިން ޕްރޮޖެކްޓަކީ ޖުމްލަ 54.5 މިލިއަން ރުފިޔާގެ ޕްރޮޖެކްޓެކެވެ. އެގޮތުން މި ލޯންޗުތަކަށް 50 މިލިއަން ރުފިޔާ ހަރަދުކޮށްފައިވާއިރު ޑްރޯންތަކަށް 4.5 މިލިއަން ރުފިޔާ ހަރަދުކޮށްފައިވާ ކަމަށް މިނިސްޓްރީން ބުންޏެވެ.
