ބާސެލޯނާ (ސެޕްޓެމްބަރު 4) - ރޮބާޓް ލެވަންޑޯސްކީ ކާމިޔާބުކޮށްދިން ޕެނަލްޓީއާ އެކު އޮސަސޫނާ އަތުން ބާސެލޯނާ އިން އުނދަގޫ މޮޅެއް ހޯދައިފި އެވެ.
ސްޕެނިޝް ލަލީގާގައި ބާސެލޯނާ ކުޅުނު ހަތަރު ވަނަ މެޗުން މޮޅުވެ އެ ޓީމަށް 10 ޕޮއިންޓް ލިބިފައިވާއިރު، އެ ޓީމު ވަނީ ލީގު ތާވަލްގެ ތިން ވަނަ އަށް ޖެހިލާފަ އެވެ. ދެ ވަނައިގައި އޮތީ 10 ޕޮއިންޓް ހޯދައި ފައިދާ ގޯލުގެ ތަފާތުން ޖިރޯނާ އެވެ. އެއް ވަނައިގައި އޮތީ މިހާތަނަށް ކުޅުނު ހަތަރު މެޗުވެސް ކާމިޔާބުކޮށްފައިވާ ރެއަލް މެޑްރިޑް އެވެ.
ބާސެލޯނާ އިން ރޭ ކުޅުނު މެޗު 2-1 އިން ކާމިޔާބުކުރިއިރު، މެޗުގެ ފުރަތަމަ ގޯލު ޖެހީ ބާސެލޯނާ އިންނެވެ. މިއީ ލިބުނު ކޯނަރަކުން އިލަކާއީ ގުންޑޮގާން ނަގައިދިން ހުރަހަކުން ޖޫލްސް ކޫންޑޭ ޖަހައިދިން ގޯލެކެވެ. މެޗުގެ 76 ވަނަ މިނެޓުގައި އޮސަސޫނާ އިން ނަތީޖާ ހަމަހަމަކުރި ނަމަވެސް މެޗު ނިމެން ފަސް މިނެޓަށްވެފައި ވަނިކޮށް ލިބުނު ޕެނަލްޓީއެއް ކާމިޔާބުކޮށް ބާސެލޯނާ މޮޅުކޮށްދިނީ ލެވަންޑޯސްކީ އެވެ.
މި މެޗުގައި ބާސެލޯނާއާ އަލަށް ގުޅުނު ތިން ކުޅުންތެރިއަކު ކުޅުނެވެ. މިގޮތުން ޓްރާންސްފާގެ ފަހު ދުވަހު އެޓީމާ ގުޅުނު ޑިފެންޑަރު ޖޮއާއޯ ކާންސެލޯ އާއި ފޯވާޑް ޖޮއާއޯ ފެލިކްސް ދެވަނަ ހާފުގައި ކުޅެން ނުކުތްއިރު، ފަހު ވަގުތުކޮޅު ޑިފެންޑަރު އިނީޚޯ މާޓިނޭޒްވެސް ކުޅެން ނުކުތެވެ.
ސްޕެނިޝް ލީގުގައި ރޭ ކުޅެން ހަމަޖެހިފައި އޮތް އެތުލެޓިކޯ މެޑްރިޑާއި ސެވިއްޔާގެ މެޗު ވަނީ މުއްދަތެއް ނެތް ގޮތަށް ފަސްކޮށްފަ އެވެ.
މި މެޗު ފަސް ކުރަން ޖެހުނީ ސްޕެއިންގެ ގިނަ ހިސާބުތަކަކަށް ބޯކޮށް ވާރޭވެހި ފެންބޮޑުވެފައިވާތީ، ދަތުރު ފަތުރު ކުރުމުގައި ދަތިތައް ދިމާވާތީ އެވެ. ވިއްސާރަވެ ފެންބޮޑުވެފައިވާ ސަރަހައްދުތަކުގެ ތެރޭގައި މެޗު ކުޅެން ހަމަޖެހިފައިވާ މެޑްރިޑްވެސް ހިމެނެ އެވެ.
ރޭ ކުޅުނު އެހެން މެޗުތަކަށް ބަލާއިރު ލީގުގެ ދެ ވަނައިގައި އޮތް ޖިރޯނާ އިން ވަނީ 1-0 އިން ލަސް ޕަލްމާސް ބަލިކޮށްފަ އެވެ. މަޔޯކާ އާއި އެތުލެޓިކް ބިލްބާއޯ ވާދަކުރި މެޗު ނިމުނީ 0-0 އިން އެއްވަރުވެގެންނެވެ.
