ރާއްޖޭގައި އިސްލާމްދީނަށް ފުރައްސާރަކުރުން ހުއްޓުވަން ހާއްސަ ޕްލޭނެއް އެބަ އޮތް ކަމަށް ހޯމް މިނިސްޓަރު އިމްރާން އަބްދުﷲ މިރޭ ވިދާޅުވެއްޖެ އެވެ.
ބައެއް ދިވެހިން އިސްލާމްދީން ދޫކޮށް، ދީނަށް ފުރައްސާރަކުރާ މައްސަލަ ދޭތެރެދޭތެެރެއިން ކުރިމަތިވާ އިރު އެކަމަށް ސަރުކާރުން އެކަށީގެންވާ ފިޔަވަޅު ނާޅާ ކަމަށް ބުނެ ސަރުކާރަށް ކުރިން ފާޑުކިއުންތައް އަމާޒުވި އެވެ.
އަންނަ ހޮނިހިރު ދުވަހު ބާއްވާ ރިޔާސީ އިންތިހާބަށް، ކެމްޕެއިންކުރަން އެމްޑީޕީއާއި ގުޅިފައިވާ ޕާޓީތަކުން ހދ. މަކުނުދޫގައި މިރޭ ބޭއްވި ޖަލްސާގައި އިމްރާން ވިދާޅުވީ ދީނަށް ފުރައްސާރަކުރާ "ކުދިން" އިސްލާހުކުރަން މަސަައްކަތްކުރާނެ މުރައްބީންނާއި ދާއީން ތަމްރީނުކުރާނެ ކަމަށެވެ. އެކަމަށް ފަރުވާދޭނެ ރަނގަޅު ނިޒާމެއް ސަރުކާރުން އެކަަށައަޅަމުން އަންނަ ކަމަށް ވެސް އޭނާ ވިދާޅުވި އެވެ.
"އާދެ މިހުރިހާ ކަމެއް ވަށައިޖެހުނީމާ ﷲ ސުބްހާނަހޫ ވަތަޢާލާގެ ރަހުމަތުން އަަޅުގަނޑުމެންނަށް އުފާވި އަމާން ރާއްޖެ އެއް ލިބޭނީ،" އިމްރާން ވިދާޅުވި އެވެ.
"ރާއްޖެ އަމާންކުރަން ކުރަން ޖެހޭ ހުރިހާ ކަމެއް ޕްލޭންކޮށް ނިމިއްޖެ"
ރާއްޖޭގެ ހާލަތު ބަދަލުވަމުން ދާ ގޮތް ސަރުކާރަށް އެނގޭ ކަމަށާއި އެހެންވީމާ ރާއްޖެ އަމާންކުރުމަށް ޓަކައި ކުރަން ޖެހޭ ހުރިހާ ކަމެއްގެ ޕްލޭން މިހާރު އޮތީ ނިމިފައި ކަމަށް ވެސް މިނިސްޓަރު ވިދާޅުވި އެވެ. އެފަދަ ގިނަ ކަންތައްތައް މިހާރު ހުރީ ނިމިފައި ކަމަށް ވެސް ވިދާޅުވި އެވެ.
ސަރުކާރަށް ރާއްޖޭގެ ކުށުގެ ވެށި އެނގޭ މިންވަރުގެ މިސާލެއްގެ ގޮތުގައި އޭނާ ދެއްކެވީ މަސްތުވާތަކެތީގެ ވިޔަފާރިކުރާ ގްރޫޕްތަކާއި ގޭންގްތަކާ ގުޅޭ މީހުން ވަކިންވަކިން އެނގުމެވެ.
"އެނގިގެންނާއި ނޭނގި ތިބެ އެ ގްރޫޕްތަކަށް ވަދެފައި ތިބި ކުދިން އަޅުގަނޑުމެންނަށް އެބަ އެނގޭ. އެކުދިންނ އިސްލާހުކޮށް، އުފެއްދުންތެރި ބައެއްގެ ގޮތުގައި މުޖުތަމައަށް އަނބުރާ ގެންނާނެ ގޮތް ރައީސުލް ޖުމްހޫރިއްޔާއަށް އެނގިވަޑައިގަންނަވާ،" އިމްރާން ވިދާޅުވި އެވެ.
އޭނާ ވިދާޅުވި ގޮތުގައި ބޮޑެތި ޑްރަގް ނެޓްވޯކްތަކާއި އެ ނެޓްވޯކްތައް މަސައްކަތްކުރާ ގޮތް ވެސް ސަރުކާރަށް އެނގެ އެވެ.
ކުޑަކުދިން ކުށުގެ ވެށިން ދުރުކުރަން މަސައްކަތްކުރަންވީ ގޮތް ވެސް ސަރުކާރަށް އެނގޭ ކަމަށާއި މީގެ 20 އަކަށް އަހަރު ކުރިން ރާއްޖޭގައި ހުއްޓާލާފައިވާ "އިސްލާހިއްޔާ" އަލުން ހިންގަން ނިންމީ އެހެންވެ ކަމަށް ވެސް އޭނާ ވިދާޅުވި އެވެ.
ބޭރުގައުމުތަކުގައި ހިނގާ ހަނގުރާމަތަކަށް ދާ މީހުން އަނބުރާ ގެނެސް ރިހެބިލިޓޭޓްކުރާނެ ނިޒާމު ގާއިމްކޮށްފައިވާ ކަމަށާއި އެއީ ދުނިޔޭގެ ގައުމުތަކުން އެ ނިޒާމުން މިސާލު ނަގާ ނިޒާމެއް ކަމަށް ވެސް ވިދާޅުވި އެވެ.
