މިއުނިކް (ސެޕްޓެމްބަރު 3) - ޖަރުމަން ލީގުގައި ބޮރޫޝިއާ މުންޗެންގްލަޑްބެކް އަތުން ބަޔާން މިއުނިކުން 2-1 އިން އުނދަގޫ މޮޅެއް ހޯދިއިރު، ޑާމްސްޓަޑް 5-1 އިން ބަލިކޮށް ބަޔާ ލެވަކޫސަން ލީގުގެ އެއް ވަނަ އަށް ޖެހިލައިފި އެވެ.
ބަޔާނުން ޖުމްލަ 25 ހަމަލާ އުފެއްދި ރޭގެ މެޗުގެ ފުރަތަމަ ހާފުގައި މުންޗެންގްލަޑްބެކްގެ ގޯލު ޖަހައި، ލީޑު ނަގައިދިނީ ޖަޕާގެ ޑިފެންޑަރު ކޯ އިޓަކޫރާ އެވެ. މެކްސިމިލިއަން ވޮބާ ނަގައިދިން ކޯނަރުން ހުރަސްވި ބޯޅަ އިޓަކޫރާ ބޮލުން ފޮނުވާލުމުން އަމާޒުވީ ގޯލުގެ މަތީ ކަނަށެވެ.
ބަޔާނުން ނަތީޖާ އަނބުރާލީ ދެ ވަނަ ހާފުގަ އެވެ. އެ ގޮތުން، މެޗުގެ 58 ވަނަ މިނެޓުގައި ލެރޯއި ސާނޭ ޖަހައިދިން ގޯލުން އެ ޓީމުން ނަތީޖާ ހަމަހަމަކުރިއިރު، މެޗުން މޮޅުވި ގޯލު ޖެހީ މެޗު ނިމެން ތިން މިނެޓަށް ވެފައި ވަނިކޮށެވެ. މި ގޯލު ޖަހައިދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި މިޑްފިލްޑަރު މަތައިސް ޓެލް އެވެ.
މި މެޗުން މޮޅުވެ ބަޔާނުން ލީގުގައި ކުޅުނު ތިން މެޗުން ނުވަ ޕޮއިންޓް ހޯދާފައިވާއިރު، އެއް ވަނައިގައި ލެވަކޫސަން އޮތީ ނުވަ ޕޮއިންޓް ހޯދައި ފައިދާ ގޯލު އިތުރުވުމުންނެވެ.
ލެވަކޫސަން ރޭ ބޮޑު މޮޅެއް ހޯދިއިރު، ގޯލުތައް ޖަހައިދިނީ ވިކްޓާ ބޮނިފޭސް، ޖޯނަސް ހޮފްމަން، އެޒެކުއެލް ޕަލާސިއޯސް އަދި އެޑަމް ހްލޯޒެކް އެވެ. އޭގެ ތެރެއިން، ބޮނިފޭސް މި މެޗުގައި ދެ ގޯލު ޖެހި އެވެ. ޑާމްސްޓަޑްގެ ހަމައެކަނި ގޯލު ޖަަހައިދިނީ އޮސްކާ ވިލްހެމްސަން އެވެ.
ޖަރުމަން ލީގުގައި ރޭ ކުޅުނު އެހެން މެޗުތަކަށް ބަލާއިރު، ހޮފެންހެއިމުން ވަނީ ވުލްފްސްބާގު 3-1 އިން ބަލިކޮށްފަ އެވެ. ވާޑާ ބްރޭމާން އިން މައިންޒް އަތުން 4-0 މޮޅުވިއިރު، ސްޓުޓްގާޓުން ވަނީ 5-0 އިން ފްރައިބާގު ބަލިކޮށްފަ އެވެ.
