ފާމަސޫޓިކަލް ޕްރޮޑަކްޓު އުފެއްދުމުގައި ދުނިޔޭގެ އެންމެ ކުރިއަރާފައިވާ އެއް ކުންފުނި ކަމަށްވާ އިނގިރޭސިވިލާތުގެ އެސްޓްރާޒެނިކާގެ އުފެއްދުންތަކެއް ރާއްޖެއަށް ތައާރަފްކޮށް އެސްޓީއޯ އިން ރާއްޖެއަށް ފެންވަރު ރަނގަޅު ބޭސް އެތެރެކުމުގައި އިންގިލާބީ ކުރިއެރުމެއް ހޯދައިފި އެވެ.
ރާއްޖޭގެ އެންމެ ބޮޑު އެއް ވިޔަފާރި ކުންފުނި، އަދި ރާއްޖޭގެ ލީޑިން މެޑިކަލް ސަޕްލަޔަރު، އެސްޓީއޯ އިން އެސްޓްރަޒެނިކާގެ މި އުފެއްދުންތައް ފޯރުކޮށްދެމުންދާނީ ރާއްޖޭގެ އެކްސްކުލޫސިވް ޑިސްޓްރިބިއުޓަރުގެ ގޮތުގައެވެ.
އެކަން އިއުލާނުކުރުމަށް ކުރުނބާ މޯލްޑިވްސްގައި ހޮނިހިރު ދުވަހު ބޭއްވި ރަސްމިއްޔާތު ޝަރަފްވެރިކޮށްދެއްވީ ހެލްތް މިނިސްޓްރީގެ ސްޓޭޓް މިނިސްޓަރު އަހުމަދު އާދިލެވެ. މި ރަސްމިއްޔާތުގައި އެސްޓީއޯގެ ސީއީއޯ އަދި މެނޭޖިން ޑިރެކްޓަރު އަބްދުﷲ ސައީދު އާއި އެސްޓްރަޒެނިކާގެ ބިޒްނަސް މެނޭޖަރު އަބިޝެކް ކައުޝިކްގެ އިތުރުން ރާއްޖޭގެ ސިއްހީ ދާއިރާގައި މަސައްކަތްކުރައްވާ ފާހަގަކޮއްލެވޭ ބައެއް ބޭފުޅުން ބައިވެރިވެވަޑައިގެންނެވިއެވެ.
އެސްޓީއޯ އިން ބުނީ މި އެއްބަސްވުމާއެކު އެސްޓްރާޒެނިކާގެ ބޭސް އުފައްދާ ކުންފުންޏާ ގުޅިގެން ހަރަދު ކުޑަކޮށް ބޭސް އެތެރެކުރެވި، ދާއިމީ ބަލިތަކަށް އާއްމުކޮށް ބޭނުންކުރަންޖެހޭ ބޭސް ހުސްނުވެ ލިބޭނެކަމުގެ ޔަގީންކަން އިތުރުކުރުމަށް ސަރުކާރުން ކުރަމުންދާ މަސައްކަތަށް ބާރު ލިބިގެންދާނެ ކަމަށެވެ.
އަދި އެކުންފުނިން އަބަދުވެސް ކަށަވަރުކުރާ އެއްކަމަކީ ރާއްޖެ އެތެރެކުރެވޭ ބޭސް ތަކަކީ ފެންވަރު ރަނގަޅު ބޭސްތަކަކަށްވުން ކަމަށްވާއިރު، އެސްޓްރަޒެނިކާ ފަދަ ކުންފުންޏެއްގެ އުފެއްދުންތައް ލިބޭނެ މަގު ހޯދުން ވެގެންދާނީ އެސްޓީއޯއިން ފޯރުކޮށްދޭ ބޭހާމެދު ރައްޔިތުންގެ އިތުބާރު އިތުރަށް ބޮޑުވެގެންދާނެ ކަމަށް އެސްޓީއޯއިން ބުނެއެވެ.
އެސްޓްރާޒެނީކާ އާއި އެސްޓީއޯއާއި ދެމެދު ވެވުނު އެއްބަސްވުމުގެ ދަށުން އެ ކުންފުނީގެ 14 ބޭހެއް އާސަންދައިގެ ދަށުން ކަވަރު ކުރުމަށްވަނީ ރަޖިސްޓްރީ ކުރެވިފައެވެ. މީގެ ތެރޭގައި ކެންސަރު ބައްޔާއި، ގޭސްޓްރިކް، އަދި ހަކުރު ބަލީގެ މީހުންނަށް ހާއްސަ ބޭސްތައްވެސް ހިމެނެއެވެ. މި އެއްބަސްވުމުގެ ދަށުން ސިއްހީ ދާއިރާ ކުރިއެރުވުމަށް ސަރުކާރުން ކުރަމުންދާ މަސައްކަތަކާއި، އެސްޓީއޯގެ އަމާޒުތަކައް ވާސިލްވުމަށް އިތުރު ކުރިއެރުންތައް ގެނުވައިދެވޭނެކަމަށް އެސްޓީއޯއިން ބުނެއެވެ.
އެސްޓީއޯއިން ބުނީ އެކުންފުނީގެ އަމާޒަކީ އިތުރު މެދުވެރިއަކާ ނުލައި ބޭހާއި ސިއްހީ ދާއިރާގެ އުފެއްދުންތައް އުފައްދާ ސީދާ ކުންފުނިތަކުން ފެންވަރު ރަނގަޅު އުފެއްދުންތައް ރާއްޖެ އެތެރެކޮށް ފުޅާދާއިރާއެއްގައި ލިބޭނެ މަގު ފަހިކޮށްދިނުން ކަމަށެވެ.
އެގޮތަށް ބޭހާއިި ސިއްހީ ދާއިރާގެ އުފެއްދުންތައް އެތެރެ ކުރުން ވެގެންދާނީ ޑޮކްޓަރުން ބޭސް ލިޔެދިނުމުގައި ފެންވަރު ރަނގަޅު ބޭސް އިހްތިޔާރުކުރުން އިތުރުވެ ބަލި މީހާއަށް އަވަހަށް ނަތީޖާ ފެންނާނެފަދަ ގޮތަކަށް ފަރުވާ ލިބުމަށް މަގުފަހިވެގެންދާނެ ކަމަކަށް ކަމަށާއި މިއީ ދިވެހިންގެ އާންމު ސިއްހަތާއި ދިރިއުޅުމަށް ލިބިގެން އަންނަ އިތުރު ކުރިއެރުމެއް ކަމަށް އެކުންފުނިން ބުންޏެވެ.
އެ ރަސްމިއްޔާތުގައި ވާހަކަދައްކަވަމުން އެސްޓީއޯގެ ސީއީއޯ އަބްދުﷲ ސައީދު ވިދާޅުވީ އެސްޓްރަޒެނިކާގެ ނަމަކީ ކޮވިޑުގެ ތެރޭގައި މީހުންގެ ސިކުނޑީގައި އެ ނަމެއް ހަރުލި، އިތުބާރު އޮތް ބްރޭންޑެއް ކަމަށެވެ. އަދި މީގެ އިތުރުން އެސްޓީއޯއިން އަންނަނީ މިހާރުވެސް ރާއްޖެއަށް ބޭނުންވާ ބޭހާއި ސިއްހީ ދާއިރާގެ އުފެއްދުންތައް އެތެރެކުރުމަށް 26 ކުންފުންޏާއެކު އެއްބަސްވުން ހަދައި ސީދާ ކުންފުނިތަކުން ރާއްޖެއަށް ބޭސް އެތެރެކުރަމުން ކަމަށާއި މިއީ ރާއްޖޭގެ ސިއްހީ ދާއިރާއަށް ލިބިގެން އަންނަ ފާހަގަ ކޮށްލެވޭ ކުރިއެރުމެއް ކަމަށް ސައީދު ވިދާޅުވި އެވެ.
ރާއްޖޭގެ ރައްްޔިތުން ބޭނުން ކުރަމުން އަންނަ ބޭހުގެ ފެންވަރު ރަނގަޅުކޮށް އެސްޓީއޯ މެދުވެރިކޮށް އަގުހެޔޮކޮށް ބޭސް މެދުނުކެނޑި ލިބޭނެ މަގުފަހިކުރުމުގެ ގޮތުން ސަރުކާރުން ވަނީ ޔޫއެންޑީޕީއާ އެކު އެއްބަސްވުމެއްވެސް ގާއިމުކޮށްފަ އެވެ.
ޔޫއެންޑީޕީގެ ގްލޯބަލް ހެލްތު ޕްރޮކިއުމަންޓް ސާވިސަސް މެދުވެރިކޮށް ރާއްޖެއަށް ގަނޑުކޮށް ބޭސް ގެނައުމުގެ މި އެއްބަސްވުން ގާއިމުކުރީ މިދިޔަ ޖޫން މަހުގަ އެވެ. މި އެެއްބަސްވުމުގެ ސަބަބުން އެސްޓީއޯއިން ބޭސް އެތެރެކުރުމަށް ކުރަން ޖެހޭ ހަރަދު ކުޑަވެ ރާއްޖެއިން ބޭސް ލިބޭ އަގު ދަށްވާނެ އެވެ. އަދި ފެންވަރު ރަނގަޅު ބޭހާއި ސިއްހީ ސާމާނު އެތެރެކުރުމަށް މަގުފަހިކޮށް، އާންމު ސިއްހަތުގެ ދާއިރާގެ ތެރޭގައި ކެޕޭސިޓީ ބިނާކޮށް، ދެމެހެއްޓެނިވި ގޮތެއްގައި އެންމެންނަށް ސިއްހީ ހިދުމަތް ހޯދުމުގެ ފުޅާ އަމާޒު ހާސިލުކުރެވޭނެ އެވެެ.
