ރާއްޖޭގެ ކަޅު ބާޒާރުގައި ޑޮލަރުގެ އަގު ދަށްނުވަނީ ރާއްޖެއަށް ވަންނަ ޑޮލަރު ނުހިފެހެއްޓޭތީ ކަމަށާއި އެކަން ހައްލުކުރުމަށް ވިޔަފާރިތަކާއި މަޝްވަރާކޮށްފައިވާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެެވެ.
ރާއްޖެ ޓީވީގެ ފަށާއިރު ޕްރޮގްރާމުގައި މިއަދު ވާހަކަދައްކަމުން ރައީސް ވިދާޅުވީ ރާއްޖޭގެ އިގްތިސާދަށް އެކަށޭނެ މިންވަރަށް މިހާރުވެސް ޑޮލަރު ވަންނަ ކަމަށެވެ. ނަމަވެސް ރާއްޖޭގެ އިގުތިސާދުގައި އެ ޑޮލަރު ނުހިފެހެއްޓޭ ކަމަށާއި އެކަން ހައްލުކުރުމަށް މި ސަރުކާރުން ކަނޑައެޅި ސިޔާސަތުތައް މަޑުޖައްސާލީ ކޮވިޑާ ގުޅިގެން ކަމަށް ރައީސް ވިދާޅުވި އެވެ.
ރައީސް ވިދާޅުވީ ސަރުކާރުން ކަނޑައެޅި ސިޔާސަތުތަކުގެ ތެރޭގައި އެއް ކަމަކީ "ޑީ ޑޮލަރައިޒޭޝަން" ނުވަތަ ރާއްޖެއިން ޑޮލަރު ބޭނުންކުރާ މިންވަރު ދަށްކުރުން ކަމަށެވެ. އޭގެ ސަބަބުން ޑޮލަރަށް އޮންނަ ޑިމާންޑު ދަށްވެ އަގު ދަށްވާނެ ކަމަށް އެމަނިކުފާނު ވިދާޅުވި އެވެ.
"އަޅުގަނޑުމެން އެއާ ދޭތެރޭ ސިޔާސަތުތަކެއް ކަނޑައެޅިން. ކޮވިޑާއި ގުޅިގެން ކުޑަކޮށް މަޑުޖެއްސީ. މީގަ ކުރަންޖެހޭ އެއް ކަަމަކީ ޑީ ޑޮލަރައިޒޭޝަން އަށް ދިއުން. އެއީ ރާއްޖޭގެ ހުރިހާ މުއާމަލާތެއް ހިންގަންޖެހޭނީ ދިވެހި ރުފިޔާއިން ކަމަށް އަޅުގަނޑުމެން ކަނޑައެޅުން. އެހެންވެއްޖެ ކަމަށްވަންޏާ ރާއްޖެއަށް ވަންނަ ޑޮލަރު މާރުކުރަންޖެހޭނީ އެމްއެމްއޭ އިން ނުވަތަ ބޭންކަކުން. ދިވެހިން ގެންގުޅޭނީ ދިވެހި ރުފިޔާ އެކަނި" ރައީސް ވިދާޅުވި އެވެ.
އެމަނިކުފާނު ވިދާޅުވީ ރާއްޖެއަށް ވަންނަ ޑޮލަރުގެ 30 ޕަސެންޓު ބޭރުވިޔަ ނުދީ ވަކި މުއްދަތަކަށް ހިފެހެއްޓިއްޖެ ނަމަ ޑޮލަރުގެ އަގު 15ރ އަށްވުރެ ދަށްކުރެވޭނެ ކަމަށެވެ. އަދި އެކަމަށްޓަކއި ޓޫރިޒަމް ދާއިރާގެ ފަރާތްތަކާއެކު މަޝްވަރާތަކެއް މިހާރުވެސް ކޮށްފައިވާ ކަމަށް ރައީސް ވިދާޅުވި އެވެ.
"އެބޭފުޅުންގެ ޔަގީންކަން ކުޑަކޮށް ނެތިގެން މިއުޅެނީ ރާއްޖޭގެ މަނިޓަރީ ޕޮލިސީ އާއި އުސޫލުތަކާއި ގާނޫނުތަކާ ދޭތެރޭ ހުރި ޝައްކުތަކެއް. ކޮންމެހެން އެވަންނަ ޑޮލަރު ރާއްޖޭގައި ނުބަހައްޓާކަށްވެސް ނޫން"
ރައީސް ވިދާޅުވީ ވިޔަފާރިތަކުން އެގޮތައް ބަހައްޓާ ޑޮލަރު އެ މުއްދަތު ފަހަނައަޅައި ދިއުމުން ބޭރުކުރެވޭނެ ކަމުގެ ޔަގީންކަން އެމްއެމްއޭ ތެރެއިން ގާނޫނީ ގޮތުން ދެވިއްޖެނަމަ އެކަމަށް އަމަލުކުރަން ވިޔަފާރިވެރިން ތިބީ ތައްޔާރަށް ކަމަށެވެ.
އަދި ކުރިއަށް އޮތް ދައުރުގައި ޑޮލަރުގެ އަގު ދަށްކުރުމުމަށް މީގެން ކޮންމެވެސް އެއް ސިޔާސަތަކަށް އަމަލުކުރަން ފައްޓަވާނެ ކަމަށާއި އަންނަ ދައުރުގެ ތެރޭގައި ޑޮލަރުގެ އަގު 15ރ އަށްވުރެ ދަށްކުރެވޭނެ ކަމުގެ އުއްމީދު އެބައޮތް ކަމަށް ރައީސް ވިދާޅުވި އެވެ.
