ލަންޑަން (އޮގަސްޓް 31) - މެންޗެސްޓާ ސިޓީން ވުލްވްސް އަށް ކުޅެމުން އަންނަ މަތެއުސް ނޫނޭސް ގެންނަން ނިންމައި، ސިޓީ އަށް ކުޅެމުން އަންނަ ޒުވާން ވިންގް، ކޯލް ޕާމާ ޗެލްސީ އަށް ވިއްކާލަން މަޝްވަރާތައް ފަށައިފި އެވެ.
މިދިޔަ ހަފްތާގައި ނޫނޭސް ގަންނަން ސިޓީން ކުރި ބިޑް ވުލްވްސް އިން ވަނީ އަނބުރާ ފޮނުވާލައިފަ އެވެ. ވުލްވްސް އިން ނޫނޭސް، 25، ވިއްކާލަން ކިޔާ އަގު އުޅެނީ 70 މިލިއަން ޑޮލަރުގަ އެވެ. އެކަމަކު، ސިޓީން މިހާރު ވުލްވްސްއާ މަޝްވަރާ ކުރަމުން އަންނަނީ 60 މިލިއަން ޑޮލަރުގެ ފީ އަކަށް އެ ޑީލް ނިންމުމަށެވެ.
ސިޓީ އަށް ބަދަލުވާން ބޭނުންވާތީ ނޫނޭސް, ވުލްވްސްގެ ފަރިތަކުރުންތަކަށް ނުނިކުމެ އެވެ. ކުރިން ސްޕޯޓިން ލިޒްބަން އަށް ކުޅުނު ނޫނޭސް ގަންނަން މީގެ ކުރިން ލިވަޕޫލުން ވެސް މަސައްކަތްކުރި އެވެ. އެކަމަކު، ރަސްމީކޮށް ބިޑެއް ކޮށްގެން މަޝްވަރާތައް ކުރިއަށް ނުގެންދެ އެވެ.
ނޫނޭސް ގެންނަން ސިޓީން ބޭނުންވި އެންމެ ބޮޑު ސަބަބަކީ އެ ޓީމުގެ ތަރި، ކެވިން ޑި ބްރޭނާ އަށް ދިމާވެފައިވާ އަނިޔާގެ މައްސަލަތަކެވެ. ޑި ބްރޭނާ މި ވަގުތު ވެސް ހުރީ އަނިޔާއެއްގަ އެވެ.
ސިޓީން އަންނަނީ އެ ޓީމުގެ ޒުވާން ވިންގް، ޕާމާ ޗެލްސީ އަށް ވިއްކާލަން މަޝްވަރާ ކުރަމުންނެވެ. އެ ގޮތުން، ސިޓީން ޕާމާ ވިއްކާލަން ކިޔާ އަގު ކަމަށްވާ 47 މިލިއަން ޑޮލަރުގެ ފީ އަކަށް އެ ޑީލް ކުރިއަށް ގެންދަން ޗެލްސީން އޮތީ ތައްޔާރަށެވެ.
އިންގްލެންޑް 21 އަހަރުން ދަށުގެ ޓީމުގެ ފޯވާޑް، ޕާމާ އަކީ ހުނަރުވެރި ކުޅުންތެރިއެއް ނަމަވެސް ސިޓީގައި ގަވާއިދުން އޭނާ އަށް ކުޅުމުގެ ފުރުސަތު ނުލިބޭނެތީ އޭނާ ދޫކޮށްލަން އޮތީ ތައްޔާރަށެވެ.
ޗެލްސީން ޕާމާގެ ޑީލްގައި ކުރިއެރުން ހޯދާފައިވޭތޯ ސުވާލުކުރުމުން އެ ޓީމުގެ ކޯޗު މައުރީސިއޯ ޕޮޗެޓީނޯ ބުނީ ޓްރާންސްފާގެ ވާހަކަތައް މީޑިއާގައި ދެއްކުމަކީ އެއްވެސް އިރެއްގައި ކުރާ ކަމެއް ނޫން ކަމަށެވެ.
