މަޑަގަސްކަރާގައި މިހާރު ކުރިއަށްދާ އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގެ 100 މީޓަރު ދުވުމުގައި ވާދަކޮށް، މުހައްމަދު މިންހާލް ޝާމިން (މިންކޮ)، ގައުމީ ޖޫނިއާ ރެކޯޑް މުގުރާލައިފި އެވެ.
ސަތޭކަ މީޓަރު ދުވުމުގެ ހީޓު ތިނެއްގައި ވާދަކުރި މިންހާލް ދިޔައީ ހީޓުގެ ހަ ވަނަ އެވެ. އޭނާގެ ޓައިމިން އަކީ 10.90 ސިކުންތެވެ. މިންހާލްގެ މި ޓައިމިން އަކީ ގައުމީ ޖޫނިއާ ރެކޯޑް ޓައިމިން އެެވެ. މީގެ ކުރިން މި ރެކޯޑް އޮތީ 2021 ވަނަ އަހަރުގެ ނެޝަނަލް ޗެމްޕިއަންޝިޕްގައި ރެކޯޑް ހެދި އިބާދުﷲ އާދަމް އެވެ. އިބާދުﷲ ރެކޯޑް ހެދީ 10.95 ސިކުންތުން ރޭސް ނިންމައިގެންނެވެ.
މިންހާލް އަކީ ބެންކް އޮފް މޯލްޑިވްސް (ބީއެމްއެލް) ސްކޮލަޝިޕްގެ ދަށުން ޖެމެއިކާގައި ޓްރެއިނިން ފުރިހަމަ ކުރަމުން އަންނަ އެތުލީޓެކެވެ. މިދިޔަ އަހަރު ތުރުކީގެ ކޮންޏާގައި ބޭއްވި އިސްލާމިކް ސޮލިޑާރިޓީ ގޭމްސްގައި ވެސް މިންހާލް ވަނީ ވާދަކޮށްފަ އެެެވެ.
މިއަދު އައިއޯއައިޖީގައި ކުރިއަށްދިޔަ ޕެރަ އެތުލެޓިކްސްގެ އަންހެނުންގެ 100 މީޓަރު ދުވުމުގައި ވާދަކޮށް ރާއްޖޭގެ ފާތިމަތު އިބްރާހިމް ވަނީ ގައުމީ ރެކޯޑް އާ ކޮށްފަ އެވެ.
އެ ގޮތުން، މިއަދުގެ ރޭހުގައި ފާތިމަތު އިބްރާހިމް، އޭނާގެ ގައިޑްރަނާ، ފާތިމަތު ޝަމްހާ، 100 މީޓަރުގެ ރޭސް ނިންމީ، 17.80 ސިކުންތުންނެވެ. މިއީ ކުރީގެ ޓައިިމިންއާ ބަލާއިރު ލިބިގެންދިޔަ ބޮޑު ކުރިއެރުމެކެވެ.
މީގެ ކުރިން ފާތިމަތު އެ ރެކޯޑް ހެދީ 2021 ވަނަ އަހަރުގެ ޕެރަލިމްޕިކް އިވެންޓްގައި 100 މީޓަރު ރޭސް 18.06 އިން ނިންމައިގެންނެވެ. އެ ފަހަރު، ފާތިމަތުގެ ގައިޑްރަނާ އަކީ ރަބާ އިސްމާއިލް އާސިފް އެވެ.
ފާތިމަތު ވަނީ މި ފަހަރުގެ އައިއޯއައިޖީގެ 100 މީޓަރު އިވެންޓްގެ ފައިނަލަށް ދަތުރުކޮށްފަ އެވެ.
