މަރުކަޒީ ބޭންކް، އެމްއެމްއޭ އިން ތައާރަފްކުރި ގައުމީ އިންސްޓަންޓް ޕޭމަންޓް ސިސްޓަމް، ފަވަރަ މެދުވެރިކޮށް ދެ ދުވަސްތެރޭ 10.6 މިިލިއަން ރުފިޔާގެ މުއާމަލާތް ހިންގައިފި އެވެ.
ފަވަރަ ޕޭމަންޓް ސިސްޓަމަކީ އެއް ބޭންކުން އަނެއް ބޭންކަށް ފަސޭހަކަމާއެކު ވަގުތުން ފައިސާ ފޮނުވޭ ގޮތައް ހަދާފައިވާ ސިސްޓަމެކެވެ. އެކި މަރުހަލާތަކަށް ޑިވެލޮޕްކުރާ މި ސިސްޓަމްގެ ފުރަަތަމަ މަރުހަލާ ރަސްމީކޮށް ލޯންޗުކޮށް ބޭނުންކުރަން ފެށީ މިިދިޔަ ހޮނިހިރު ދުވަހުގެ ރޭގެ ވަގުތެއްގަ އެވެ.
އެމްއެމްއޭ އިން ބުނިގޮތުގައި ފަވަރަ ސިސްޓަމް ބޭނުން ކުރަން ފެށިތާ ދެ ދުވަސްތެރޭ އެ ސިސްޓަމްގެ ތެރެއިން 3،676 މުއާމަލާތް ވަނީ ހިންގާފަ އެވެ. އެ މުއާމަލާތްތަކުގެ އަދަދު 10.6 މިލިއަން ރުފިޔާ އަށް އަރަ އެވެ.
ފަވަރަ ޕޭމަންޓްގެ ހިދުމަތް މިވަގުތު ލިބެމުންދަނީ ތިން ބޭންކަކުންނެވެ. އެއީ ބޭންކް އޮފް މޯލްޑިވްސް (ބީއެމްއެލް), ސްޓޭޓް ބޭންކް އޮފް އިންޑިއާ (އެސްބީއައި) އަދި މޯލްޑިވްސް އިސްލާމިކް ބޭންކް (އެމްއައިބީ) އެވެ. ފަވަރަ މިވަގުތު ބޭނުންކުރެވޭނީ މި ތިން ބޭންކުތަކުގެ އިންޓަނެޓް އަދި މޯބައިލް ބޭންކިންގެ ތެރެއިންނެވެ.
ފަވަރަ އިންސްޓަންޓް ޕޭމަންޓް ސިސްޓަމުން މިހާރު ލިބެން ހުންނަ ހިދުމަތްތަކަކީ އެއް ބޭންކުން އަނެއް ބޭންކަށް ވަގުތުން ފައިސާ ފޮނުވާލުމާއި، ރިކުއެސްޓް ޓު ޕޭގެ ހިދުމަތާއި، ފައިސާ ފޮނުވެނީ ރަނގަޅު މީހަކަށްތޯ ޔަގީންކުރުމަށް އެކައުންޓް ވެރިފިކޭޝަންގެ ހިދުމަތުގެ އިތުރުން، ޔޫސާ އައިޑެންޓިފިކޭޝަން އަށް ފަސޭހަ ސްމާޓް އެޑްރެސިންގެ ހިދުމަތެވެ.
ސްމާޓް އެޑްރެސިންގެ ހިދުމަތާއެކު ބޭންކުތަކުގެ އެކައުންޓު ނަންބަރުގެ ބަދަލުގައި އީމެއިލް ނުވަތަ ފޯނު ނަންބަރު ބޭނުންކޮށްގެން ފަވަރަ އޭލިއަސް އެއް ރަޖިސްޓްރީކޮށް އެއް އެކައުންޓުން އަނެއް އެކައުންޓަށް ފައިސާ ޖަމާކުރެވޭނެ އެވެ.
އެމްއެމްއޭ އިން ބުނީ އެހެން ބޭންކުތަކުން ވެސް މުސްތަގުބަލުގައި ސިސްޓަމް ބޭނުންކުރަން ފަށަން ކުރަން ޖެހޭ މަސައްކަތްތައް ކުރިއަށްދާ ކަމަށާއި އަހަރުގެ ނިޔަލަށް ރާއްޖޭގައި ތިބި ހުރިހާ ބޭންކަކުން މި ނިޒާމުގައި ބައިވެރިވާނެ ކަމަށެވެ.
އޭގެ އިތުރުން، ފަވަރަ އިތުރަށް ފައްކާކުރުމުގެ މަސައްކަތާއި ދެވަނަ މަރުހަލާގެ މަސައްކަތްވެސް ކުރަމުންދާ ކަމަށާއި އެގޮތުން މުސްތަގުބަލުގައި ރާއްޖޭގައި ބޭނުންކުރާ އީވޮލެޓުތަކަށްވެސް ފަވަރަ އިންޓްގްރޭޓު ކުރެވިގެންދާނެ ކަމަށް އެމްއެމްއޭއިން ބުންޏެވެ.
މި ސިސްޓަމްގެ ދެވަނަ ފިޔަވަހި ތައާރަފުކުރާއިރު ފަވަރަ އަށް ހާއްސަ އެޕްލިކޭޝަނެއް ނެރެންވެސް އެމްއެމްއޭ އިން ވަނީ ރާވާފަ އެވެ.
އެމްއެމްއޭއިން ބުނެފައިވާ ގޮތުގައި މިއީ ރާއްޖޭގެ ޕޭމަންޓް ސްޓްރަކްޗާއަށް މިފަހުން ގެނެވޭ އެންމެ ބޮޑު ބަދަލެވެ. އަދި މި ނިޒާމު ވުޖޫދަށް އައުމާ ގުޅިގެން މާލީ މުއާމަލާތްތައް ރައްކާތެރިކަމާ އެކީ ފަސޭހަވެ އަވަސްވެ، މުޅި މާލީ ނިޒާމަށް އީޖާދީ، އިންގިލާ ބަދަލުތަކެއް އަންނާނެ ކަމަށް ވެސް އެ އިދާރާއިން ބުނެފައިވެ އެވެ.
