މިއުނިކް (އޮގަސްޓް 28) - ޖަރުމަނު ލީގުގައި ރޭ އޮއުސްބާގް ކޮޅަށް ހެރީ ކޭން ޖެހި ދެ ގޯލާ އެކު ބަޔާން މިއުނިކް 3-1 އިން މޮޅުވެއްޖެ އެވެ.
ޓޮޓެންހަމް ހޮޓްސްޕާްސް ދޫކޮށް ބަޔާން އަށް ބަދަލުވި ފަހުން ޖަރުމަނު ލީގުގައި ކުޅުނު ދެ މެޗުން، ކޭން ވަނީ ތިން ގޯލު ޖަހައިފަ އެވެ. ކޭން އަކީ ޖަރުމަނު ލީގުގައި ކުޅުނު ފުރަތަމަ ދެ މެޗުގައި ވެސް ގޯލު ޖެހި އިނގިރޭސި ފުރަތަމަ ކުުޅުންތެރިޔާ އެެވެ.
ބަޔާނުން މި މެޗުގައި ލީޑުނެގީ އޮއުސްބާގްގެ ފީލިކްސް އުޑޯކާއި އަތުން ބައިކޮޅަށް ވަން ގޯލުންނެވެ. މެޗުގެ 32 ވަނަ މިނިޓްގައި ބަޔާންގެ ލެރޯއި ސާނޭ ޖެހި ޝޮޓެއް ދަނޑީގައި ޖެހިފައި ގޯލަށް ވަނީ އުޑޯކާއި ގައިގައި ޖެހިފަ އެވެ. އޭގެ އަށް މިނިޓް ފަހުން، ކޭން ވަނީ ބަޔާނަށް ލީޑުފުޅާކޮށްދީފަ އެވެ. މިއީ އޮއުސްބާގްގެ ނިކޮލަސް ޑޯޝް އަތުގައި ބޯޅަ ޖެހުމުން، ދިން ޕެނަލްޓީ އަކުން ކޭން ޖެހި ގޯލެކެވެ.
ފުރަތަމަ ހާފުގައި ތިން ވަނަ ގޯލެއް ޖަހަން ބަޔާނުން ކުރި މަސައްކަތް ކާމިޔާބުނުވި ނަމަވެސް މެޗުގެ 69 ވަނަ މިނިޓްގައި ކޭން ވަނީ އިތުރު ގޯލެއް ޖަހައިފަ އެވެ. މިއީ ބަޔާންގެ ފުލްބެކް، އަލްފަންސޯ ޑޭވީސް ނެގި ހުރަހަކަށް އަރައި، ކޭން ޖެހި ގޯލެކެވެ. ހެޓްރިކް ހަދަން ކޭން އަށް ލިބުނު ފުރުސަތުގައި އޭނާ ބޮލުން ޖެހި ބޯޅަ ދިޔައީ ގޯލާ ސީދާނުވެ އެވެ.
އޮއުސްބާގް އިން ވަނީ މެޗުގެ ފަހުކޮޅުގައި ގޯލެއް ޖަހައިފަ އެވެ. ބަދަލަކަށް ކުޅެން އެރި ޑިއޯން ބެލްޖޯ މި ގޯލު ޖަހާފައިވަނީ ޑެމިރޯވިޗް ދިން ބޯޅައަކުން މެޗު ނިމެން ފަސް މިނިޓަށް ވެފައި ހުއްޓަ އެވެ.
ޖަރުމަނު ލީގުގެ ފުރަތަމަ ދެ ހަފްތާ ނިމުނުއިރު، ހަ ޓީމަކުން ވަނީ ފުރަތަމަ ދެ މެޗުން މޮޅުވެފަ އެވެ. އޭގެ ތެރޭގައި އެންމެ ފަހުގެ ޗެމްޕިއަން ބަޔާން ވެސް ހިމެނެ އެވެ.
