ރަޝިއާގެ ކުލީ ސިފައިންގެ ގްރޫޕް ވާގްނާގެ ވެރިޔާ ޔެވްގެނީ ޕްރިގޯޝިން މަރުވެފައިވާކަން ކަށަވަރުވެއްޖެ ކަމަށް އެ ގައުމުގެ އޮފިޝަލުން ބުނެފި އެވެ.
އެކަން ކަށަވަރުވީ ބުދަ ދުވަހު ވެއްޓުނު މަތިންދާބޯޓުން މަރުވި މީހުންގެ ޖެނެޓިކް ތަހުލީލުތައް ކުރުމަށް ފަހުގަ އެވެ. މަރުވި 10 މީހުން ވެސް މިހާރު ވަނީ ދެނެގަނެވިފަ އެވެ.
ޕްރިގޯޝިން އާއި ވާގްނާގެ އެހެން ބައެއް ވެރިން ދަތުރު ކުރި ބޯޓު ވެއްޓުމުގައި ރަޝިއާ ސަރުކާރުގެ އަތެއްވާ ކަމަށް ކުރާ ތުހުމަތުތައް ރަޝިއާއިން ދޮގުކުރެ އެވެ.
މަރުވި މީހުންގެ ތެރޭގައި ޕްރިގޯޝިންގެ އިތުރުން ވާގްނާގެ އަސްކަރީ އޮޕަރޭޝަންތައް މެނޭޖްކުރާ ޑިމިޓްރީ އުތްކިން އާއި ވެލެރީ ޗެކަލޯވް، ސާގެއި ޕްރޮޕުސްތިން، ޔެވްގެނީ މަކަރްޔާން، އެލެގްޒެންޑާ ޓޮޓްމިން އަދި ނިކޮލެއި މަތުސެޔެވް ހިމެނެ އެވެ.
ބޯޓުގެ ޕައިލެޓް އެލެގްޒެއި ލެވްޝިން، ކޯޕައިލެޓް ރުސްތަމް ކަރިމޯވް އަދި ފްލައިޓް އެޓެންޑެންޓް ކްރިސްޓީނާ ރަސްޕޮޕޯވާ ވެސް ވަނީ މަރުވެފަ އެވެ.
ވާގްނާއަކީއަކީ ޕްރިގޯޝިން އުފެއްދި ކުލީ ސިފައިންގެ ގްރޫޕެކެވެ. އެ ގްރޫޕުން ވަނީ ޔޫކްރެއިނާއި ސީރިއާ އާއި އެފްރިކާގެ ބައެއް ހިސާބުތަކުގައި ހަރަކާތްތެރިވެފަ އެވެ.
ގްރޫޕްގެ ވެރިޔާ އާއި އެހެން މެމްބަރުން ތިބި ބޯޓު ވެއްޓުނީ، ރަޝިއާ ސިފައިންނާ ދެކޮޅަށް ބަގާވާތެއް ހިންގަން އުޅުނުތާ ދެ މަސް ފަހުންނެވެ.
