ބިންވެރިޔާ ސްކީމުގެ ދަށުން މާލެ ސަރަހައްދުން ގޯތި ލިބޭ ފަރާތްތަކަށް ގޯތީގެ ރަޖިސްޓްރީ ހަވާލުކުރާނީ ބިން ކަނޑާދީފައި ކަމަށާއި އެ ރަޖިސްޓްރީތައް ވާނީ ގާނޫނީގޮތުން ސައްހަ ރަޖިސްޓްރީތަކަށް ކަމަށް ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެ އެވެ.
މާލޭ ރައްޔިތުންނަށް ގޯތި ދިނުމަށް ސަރުކާރުން ހިންގާ 'ބިންވެރިޔާ' ސްކީމުގެ ދަށުން މާލެ ސަރަހައްދުން ގޯތި ލިބުނު ފަރާތްތަކަށް ގޯތީގެ ރަޖިސްޓްރީ ހަވާލުކުރަން މިއަދު ހުޅުމާލެ ސިންތެޓިކް ޓްރެކްގައި ވަނީ ފަށާފަ އެެވެ. މިއަދު ފަށައިގެން ކުރިއަށް ދަނީ ގޯތި ދޫކުރުމުގެ އެއްބަސްވުމުގައި ސޮއިކުރުމާއި ގޯތި ކަނޑައި، ގޯތީގެ ރަޖިސްޓްރީ ދިނުމުގެ މަސައްކަތްތަކެވެ.
އެ މަސައްކަތް ފަށްޓަވައި ދެއްވައި ނޫސްވެރިންނަށް މައުލޫމާތު ދެއްވަމުން އަކްރަމް ވިދާޅުވީ ގޯތި ދެނީ ނުހިއްކާ އޮތް ތަންތަނުން ކަމަށް ބައެއް ފަރާތްތަކުން ބުނި ނަމަވެސް ސަރުކާރުން ގޯތީގެ ރަޖިސްޓްރީ ހަވާލުކުރާނީ ބިން ކަނޑައިދީފައި ކަމަށެވެ.
"އަޅުގަނޑުމެން ރަޖިސްޓްރީ ހަވާލުކުރާނީ ބިން ކަނޑައިދީފައި. އެހެންވީމާ މިގޮތުން މި ފެށުނީ މިއަދު މި މަސައްކަތް. ކޮންމެ ދުވަހަކުވެސް ބިން ކަނޑަމުން ދާނީ. ގުޅީފަޅުންވެސް، ގިރާވަރުންވެސް ކެނޑެމުން ދާނެ," އަކްރަމް ވިދާޅުވި އެވެ.
ކުރީ ސަރުކާރުން ނުވެސް ހިއްކާ ތަންތަނުން ގޯތި ދީ ރަޖިސްޓްރީ ދިންކަމަށް ބުނެ ފާޑުވިދާޅުވަމުން އަކްރަމް ވިދާޅުވީ މި ސަރުކާރުން ގޯތި ކެނޑުމަށްފަހު ދޭ ރަޖިސްޓްރީއަކީ ގާނޫނީ ގޮތުން ސައްހަ ރަޖިސްޓްރީއެއް ކަމަށާއި އެ ރަޖިސްޓްރީއާ މެދު އިތުރު ސުވާލެއް ނުއުފެދޭނެ ކަމަށެވެ. އަދި ގޯތި ރަޖިސްޓްރީ ކުރުމުގެ މަސައްކަތްތައް ކުރަމުން ދާނީ ގާނޫނީ ވަކީލުން ކަމަށާއި ގޯތި ދޫކުރާނީ ގާނޫނީ ގޮތުން ފުރިހަމަކުރަން ޖެހޭ ހުރިހާ ކަމެއް ފުރިހަމަ ކުރުމަށް ފަހުގައި ކަމަށްވެސް އަކްރަމް ވިދާޅުވި އެވެ.
"އަޅުގަނޑުމެން މި ރަޖިސްޓްރީ ކޮށްދެމުން މި ދަނީ އެގްރިމަންޓާ، އެޔާ ނޮޓޮރައިޒްކުރައްވަނީ ގާނޫނީ ވަކީލުން. އެހެންވީމާ މިއީ އެއްވެސް އޮޅުމެއް އޮތް ކަމެއް ނޫން. ކުރީގަ އެބަހުރި ކަނޑުފަޅުން ގޯތި ދޫކޮށްފަ އޭގެ ލިޔުންތައް އަޅުގަނޑުމެންނަށް ލިބެމުންދޭ," އަކްރަމް ވިދާޅުވި އެވެ.
ބިންވެރިޔާ ސްކީމުން ގޯތި ލިބުނު ފަރާތެއްގެ ނަމުގައި 600 އަކަފޫޓަށްވުރެ ކުޑަ ބިމެއް އޮވެއްޖެ ނަމަ ބިން ދޫކޮށްލަންޖެހޭއިރު އަކްރަމް ވިދާޅުވީ ކުރިން ލިބިފައިވާ ބިން ވަގުތުން ވަގުތަށް ދޫކޮށްލަން ނުޖެހޭނެ ކަމަށެވެ. އަދި އެ ބިން ދޫކޮށްލުމުގެ ކަންތައް ކޯޓަށް ހުށަހަޅައި ނިންމަން ތިން މަސް ލިބޭނެ ކަމަށާއި ބިން އެއްކޮށް ދޫކޮށްލުމަށް ދެ އަހަރު ދުވަހުގެ މުއްދަތެއް ލިބޭނެ ކަމަށް ވެސް ވިދާޅުވި އެވެ.
ބިންވެރިޔާ ސްކީމުގެ ދަށުން ގޯއްޗަށް އެދި ހުށަހެޅި 97 ޕަސެންޓު މީހުންނަށް ގޯތި ދިނުމަށް ސަރުކާރުން ވަނީ ނިންމާފަ އެވެ. އެއީ 18،955 މީހުންނަށް 9003 ގޯއްޗެވެ.
ގޯތި ދެނީ ހުޅުމާލެއާއިި ގުޅީފަޅާއި ގިރާވަރުފަޅުންނެވެ. ގެދޮރުވެރިޔާ ސްކީމުން ހުޅުމާލޭން 1351 ގޯތި، ގުޅިފަޅުން 2219 އަދި ގިރާވަރު ފަޅު ހިއްކައިގެން 5433 ދިނުމަށް ނިންމާފައި ވެއެވެ.
