އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގެ 11 ވަނަ ކުޅިވަރުގެ އީދު ރޭ ކުލަގަދަ ހަރަކާތްތަކަކުން މަޑަގަސްކަރާގައި ފަށައިފި އެވެ.
މަޑަގަސްކަރައިގެ މަހާމަސީނާ މުނިސިޕަލް ސްޓޭޑިއަމްގައި ރޭ ބޭއްވި ހުޅުވުމުގެ ރަސްމިއްޔާތުގައި މަޑަގަސްކަރާގެ ސަގާފީ ކަންކަމާއި މަޑަގަސްކަރަ ރަމްޒުކޮށްދޭ އެކިއެކި ކަންކަން ދައްކުވައިދޭ ހުށަހެޅުންތަކުގެ ފެނިގެންދިޔަ އެވެ. އޭގެ އިތުރުން، ޑްރޯން އަދި ލޭސާ ޝޯ އެއްވެސް ވަނީ ފުރިބާރުވެފައި އޮތް ދަނޑުގައި ކުރިއަށް ގެންގޮސްފަ އެވެ.
ދެތިން ގަޑިއިރަށް ދިގުދެމިގެންދިޔަ ރޭގެ އިވެންޓްގައި މަޑަގަސްކަރައިގެ ރައީސް އަންދްރޭ ރަޖޮއެލީނާގެ ދެކަނބަލުންނާއި އައިއޯއައިޖީ 2023 ގައި ވާދަކުރާ ގައުމުތަކުގެ އެކިއެކި އިސް ފަރާތްތައް ބައިވެރިވެވަޑައިގެންފައިވެ އެވެ.
ރޭގެ ފެށުމުގެ ރަސްމިއްޔާތުގައި އިންޑިއަން އޯޝަން އައިލެންޑް ގޭމްސްގައި ވާދަކުރާ އެކި ގައުމުތަކުގެ އިސް ޑެލިގޭޓުން ވެސް ބައިވެރިވެވަޑައިގަތެވެ. އެ ގޮތުން، ރާއްޖޭގެ ޔޫތު މިނިސްޓަރު އަހުމަދު މަހްލޫފް އާއި މޯލްޑިވްސް އޮލިމްޕިކް ކޮމިޓީ (އެމްއޯސީ)ގެ ރައީސް މުހައްމަދު އަބްދުލް ސައްތާރު އަދި އޮލިމްޕިކް ކޮމިޓީގެ ޖެނެރަލް ސެކްރެޓަރީ ތަމޫހް އަހުމަދު (ތަމޫ) ވެސް ބައިވެރިވެވަޑައިގެންފައިވެ އެވެ.
އައިއޯއައިޖީގެ ހުޅުވުމުގެ ރަސްމިއްޔާތުގެ ތެރެއިން.--- ފޮޓޯ: ރާއިފް ޔޫސުފް / މޯލްޑިވްސް އޮލިމްޕިކް ކޮމިޓީ
ރޭގެ އިވެންޓަށް ފަހު ދަނޑު ސަރަހައްދުގައި ހިނގި ހަމަނުޖެހުމެއްގައި 12 މީހުން މަރުވެ، 80 މީހުންނަށް އެކި ވަރުގެ ގެއްލުން ލިބިފައިވާ ކަމަށް މަޑަގަސްކަރާގެ މީޑިއާ އިންނާއި ސަަރުކާރުން ވަނީ ހާމަކޮށްފަ އެވެ. އެކަމަކު، ރާއްޖޭގެ އެއްވެސް އެތުލީޓަކަށް އަދި އޮފިޝަލަކަށް ގެއްލުމެއް ލިބިފައިނުވެ އެވެ.
ރޭގެ ފެށުމުގެ ރަސްމިއްޔާތު ރާއްޖޭގެ ދިދަ ވިހުރުވާލުމުގެ ޝަރަފް ލިބުނީ 2019 ވަނަ އަހަރު އައިއޯއައިޖީގައި ރަން މެޑަލް ހޯދި އެއް ވަނަ ޓޭބަލް ޓެނިސް ކުޅުންތެރިޔާ، ފާތިމަތު ދީމާ އަލީ އާއި ރާއްޖޭގެ އެއް ވަނަ ފިރިހެން ޓެނިސް ކުޅުންތެރިޔާ އަބްދުﷲ ފާއިހް ފަޒީލް (ފާއީ) އެވެ.
އިންޑިއާ ކަނޑުގެ ޖަޒީރާ ގައުމުތަކުގެ މެދުގައި ކޮންމެ ހަތަރު އަހަރަކުން ކުރިއަށްގެންދާ މި ގޭމްސްގައި ރާއްޖޭގެ އިތުރުން ފެންނަނީ މޮރިޝަސް، ކޮމޮރޮސް، މަޔޮޓޭ، ރިޔޫނިއަން، މަޑަގަސްކަރަ އަދި ސީޝެލްސް އެވެ. މި ފަހަރުގެ ގޭމްސްގައި، ޖުމްލަ 2000 އަށް ވުރެ ގިނަ އެތުލީޓުން 17 ކުޅިވަރެއްގައި ވާދަކުރާ އިރު، ރާއްޖެއިން ވާދަކުރަނީ ނުވަ ކުޅިވަރެއްގަ އެވެ.
ރާއްޖޭން ވާދަކުރަނީ އެތުލެޓިކްސް، ޓޭބަލް ޓެނިސް، ޓެނިސް، ވޮލީބޯޅަ، ބާސްކެޓްބޯޅަ، ހޭންޑްބޯޅަ، ޓައެކްވަންޑޯ، ސްވިމިން އަދި ބެޑްމިންޓަނެވެ. ބީޗްވޮލީބޯޅަ އާއި ސާފިން ނުހިމެނުމަކީ ރާއްޖެ އަށް މެޑަލް ހޯދަން ބަލާއިރު، ލިބުނު ދެރައެކެވެ. މި ފަހަރުގެ ގޭމްސްގައި ރާއްޖޭން ޖުމްލަ 172 އެތުލީޓުން ފެންނާނެ އެވެ. ރާއްޖޭގެ އަމާޒަކީ، 2019 ވަނަ އަހަރަށް ވުރެ ބޮޑު ކާމިޔާބީއެއް ހޯދުމެވެ.
