މިއާމީ، ޔުނައިޓެޑް ސްޓޭޓްސް (އޮގަސްޓް 24) - އިންޓަ މިއާމީއާ އެކު ލިއޮނަލް މެސީ، މި ވަނީ ޔޫއެސް އޯޕަން ކަޕްގެ ފައިނަލަށް ދަތުރުކޮށްފި އެވެ.
ސިންސިނާާޓީ އަތުން 2-0 އިން ފަހަތުގައި އޮއްވައި ފަަހަތުން އަރައި، 3-3 ކުރުމަށް ފަހު، އިންޓަ މިއާމީ މޮޅުވީ ޕެނަލްޓީ ޖަހައިގެންނެވެ. މިދިޔަ ހޮނިހިރު ދުވަހު މެސީ ވަނީ އިންޓަ މިއާމީއާ އެކު، ޕެނަލްޓީ ޖަހައިގެން ލީގު ކަޕް ކާމިޔާބުކޮށްފަ އެވެ.
ޔޫއެސް އޯޕަން ކަޕް ފައިނަލް އޮންނާނީ އަންނަ މަހުގެ 27 ވަނަ ދުވަހު އެވެ. ބައްދަލުކުރަން ޖެހޭނީ ހިއުސްޓަން ޑައިނަމޯއާ އެވެ. ހިއުސްޓަން ޑައިނަމޯ ފައިނަލަށް ދަތުރުކުރީ، ރެއަލް ސޯލްޓް ލޭކް އަތުން 3-1 އިން މޮޅުވެގެންނެވެ.
ޔޫއެސް އޯޕަން ކަޕަކީ އެމެރިކާގައި އެންމެ ގިނަ ދުވަސްވީ ފުޓްބޯޅަ މުބާރާތެވެ. އެ ގޮތުން، މި މުބާރާތަށް 100 އަށް ވުރެ ގިނަ އަހަރު ވެފައިވާއިރު، އެންމެ ފުރަތަމަ މި މުބާރާތް ބޭއްވީ 1914 ވަނަ އަހަރު އެވެ. މިއީ، އިނގިރޭސި އެފްއޭ ކަޕާއި ސްޕެނިޝް ކޮޕަ ޑެލް ރޭ ފަދަ މުބާރާތެކެވެ.
އިންޓަ މިއާމީގެ ކޯޗަކަށް ހުރީ މެސީއާ އެކު ބާސެލޯނާ އާއި އާޖެންޓީނާގައި މަަސައްކަތްކުރި ޓަޓާ މާޓީނޯ އެވެ. އޭނާ ވަނީ މިދިޔަ މަހު މެސީ އާއި ޖޯޑީ އަލްބާ އަދި ސާޖިއޯ ބުސްކެޓްސް އިންޓަ މިއާމީ އަށް އައިސް އެ ޓީމާ އެކު ހޯދަމުން އަންނަ ކާމިޔާބީގެ އަސްލަކީ އެ ކުޅުންތެރިންގެ "ޕްރޮފެޝަނަލިޒަމް" ކަމަށް ބުނެފަ އެވެ.
