ރާއްޖޭގައި އެންމެ ފުރަތަމަ އުފެދިގެން އައި ޑިމޮކްރަޓިކް ވެރިކަން ބަދަލުވާން ޖެހުނީ އޭރު ރައީސުލްޖުމްހޫރިއްޔާގެ މަގާމަށް ވަޑައިގެންނެވި ރައީސް މުހައްމަދުގެ ނަޝީދުގެ ނާގާބިލުކަމުން ކަމަށާއި އެމަނިކުފާނު ވެރިކަން ވައްޓާލީ ބަގާވާތަކުން ކަމަށް ވިދާޅުވާތީ އެކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ރައްދު ދެއްވައިފި އެވެ.
ނަޝީދުގެ ވެރިކަން ގެނައުމަށް ޖޭޕީން އެމްޑީޕީއާއެކު އިއްތިހާދު ވުމަށް ފަހު އެކުލަވާލި ފުރަތަމަ ކެބިނެޓުގައި ގާސިމަށް ދިނީ ހޯމް މިނިސްޓަރު ކަމެވެ. ހިޔާލު ތަފާތުވުންތައް ގިނަވެ އެންމެ 21 ދުވަހުގެ ތެރޭގައި ގާސިމް އިސްތިއުފާ ދެއްވި އެވެ.
ރިޔާސީ އިންތިހާބަށް ކުރައްވާ ކެމްޕޭނުގެ ތެރެއިން ނ. ޅޮހީގައި ބޭއްވި ޖަލްސާގައި ގާސިމް ވިދާޅުވި ގޮތުގައި ނަޝީދު ވެރިކަމާ ހަވާލުވެވަޑައިގަތުމަށް ފަހު އެންމެ ފުރަތަމަ ވެސް މަސައްކަތް ކުރެއްވީ ސަރުކާރުން އޭނާ ބޭރުކުރުމަށެވެ. ނަޝީދުގެ ވެރިކަމުގައި ގާސިމް އާރަށުގައި ބަންދު ވެސްކުރި އެވެ. އޭނާ އޭރު ދޫކޮށްލީ ސުޕްރީމް ކޯޓުން އަމުރު ކުރުމުންނެވެ.
"އަމިއްލައަށް އިސްތިއުފާ ދިނީ ސަރުކާރުން ހިންގަން ނޭނގިގެން. އެ ކެޕޭސިޓީ އާއި ކެޕެބިލިޓީ ނެތީމަ. އެކަމުގެ ތަމްރީނެއް އަހްލާގިއްޔަތެއް އެއްވެސް އެއްޗެއް ނެތީމަ. ވަރަށް ސާފުކޮށް މި ދަންނަވަނީ. ރައްޔިތުންގެ ޕްރެޝަރާއި އިންޓަނޭޝަލް ޕްރެޝަރު މެދުވެރިވެގެން އައިމަ އޭނާއަށް ކެތް ނުކުރެވިގެން އިސްތިއުފާ ދިނީ," ނުރުހުން ފާޅުކުރައްވަމުން ނަޝީދު ވިދާޅުވި އެވެ.
ނަޝީދުގެ ވެރިކަން ވައްޓާލީ ސިފައިންނާއި ފުލުހުންނާއި އިދިކޮޅު ފަރާތްތަކުން ގުޅިގެން ހިންގި ހަރަކާތެއްގެ ތެރެއިން ފެބްރުއަރީ 7, 2012 ގަ އެވެ. އޭރު ގާސިމް ވެސް ހުންނެވީ އިދިކޮޅުގަ އެވެ. އެ ދުވަހު ފުލުހުންގެ މައި މަރުކަޒު ކަމަށްވާ ޝަހީދު ހުސައިން އާދަމް ބިލްޑިންގައި ގާސިމް އާއި އެހެން އިދިކޮޅު ލީޑަރުން އުފާ ފާޅުކުރާ ވީޑިއޯއެއް ވެސް އާންމުވި އެވެ.
"ކާކުތޯ ބަޣާވާތް ކުރީ. އޭނާ އަމިއްލައަށޭ ސުޕްރީމް ކޯޓުގައި ތަޅު އެޅުވީ. އޭނާ އަމިއްލައަށޭ ފަނޑިޔާރުން ގެންގޮސް ހައްޔަރުކުރީ ގާނޫނާ ހިލާފަށް . އަމިއްލައަށޭ ވިދާޅުވީ ޗާޓުން ބޭރުން ކަންކަން ކުރާނަމޭ. ނުކުރޭތޯ. ކަށި ނެތް ދޫ ބޭނުން ގޮތަކަށް ތެޅުވޭނޭ މުސްކުޅިން ބުނޭ ބޭނުން ގޮތަކަށް. އެއީ ތެދު ވާހަކައެކު," އެކަމަށް އިޝާރާތްކުރައްވައި ގާސިމް ވިދާޅުވި އެވެ.
ނަޝީދުގެ ވެރިކަން ބަދަލުކުރުމުގައި ގާސިމް އިސް ދައުރެއް އަދާކުރެއްވި ކަމަށް އެމްޑީޕީން ތުހުމަތު ކުރެ އެވެ. އެހެން ނަމަވެސް, ގާނޫނުން ބޭރުން ވެރިކަން ބަދަލުކުރަން މަސައްކަތް ކޮށްފައި ނުވާނެ ކަމަށް ގާސިމް އަބަދުވެސް ވިދާޅުވެ އެވެ.
އަދި, ރައްޔިތުންނަށް އެމްޑީޕީން ހަގީގަތް އޮޅުވާލަފައިވާ ކަމަށް ވިދާޅުވެ ގާސިމް ވަނީ "ފަސް އަޅަން ބަޔަކު މަސައްކަތް ކުރި ނަމަވެސް އެކަމެއް ނުވާނެ" ކަމަށް ވިދާޅުވެފަ އެވެ.
މިއަހަރު އިންތިހާބަށް ވެސް ކޯލިޝަނެއްގެ ތެރެއިން ނުކުތުމަށް ގާސިމްގެ ޖޭޕީ އާއި ނަޝީދު ލީޑު ކުރައްވާ ދަ ޑިމޮކްރެޓްސް ޕާޓީން މަޝްވަރާކުރި އެވެ. ނަމަވެސް, އެ މަޝްވަރާތަކުން އަލިމަގެއް ނުފެނި ދެ ޕާޓީން ވެސް ފުރަތަމަ ބުރުގައި ވާދަކުރަނީ ވަކިންނެވެ.
